shadow

MISSA CRISMAL

Maun no alin belun amululik sira, Irmão, Irmãs, Seminarista no sarani doben sira hotu; ita nia celebração dader ninian lori ita hanoin kona ba evento inportante rua liu-liu iha ami amululik sira nia moris; primeiro, semana ida taniha Quinta oin mai ita sei hahu Tridum Pascal. Loron tolu nebe santo, loron tolu nee fo hanoin fali mai ita ba acontecimento boot salvação nian nebe mai husi ita Nai Jesus Cristo. Ita amululik sira iha Quaresma tomak nia laran ita servisu makas prepara sarani sira liu husi dalan oi-oin atu bele celebra didiak loron boot. Momento ida nee no celebração ida nee bele sai hanesan opurtunidade ida mos mai ita, fanun ita dala ida tan atu hola conciência liu tan kona ba celebração loron boot ida nee.

Tridum nee hanesan ita hotu hatene sei termina ho liafuan ida “CRISTO RESSUCITOU”. Ida nee laos deit anúncio ida ksolok no esperança ninian, maibe apelo ida nakonu ho responsabilidade ba missão ida. TRIDUM lori ita fila ba centro ita nia ‘FIAR’ ninian, ESPERANÇA ninian. Mistério paixão Cristo ninian bele renova dala ida tan ita nia moris, ita nia hahalok amululik ninian.

Daruak, ita amululik sira tinan ida dala ida ho ksolok ita halibur hamutuk atu agradece ba Maromak ba ita nai Sacerdócio. Amululik mak belun no ida nebe tulun Maromak nebe Santo atu halo sa? Santa Creda bolu nafatin ita nia atenção atu hare fila fali ba ita nia identidade nudar colaborador Maromak nian nebe Santo, atu halo Santo Maromak nia povo. Ida nee ita bele dehan furak no murak Sacerdócio ninian. Buat nebe ita halo mak hatudu iha ita nia moris no ita nia hahalok nebe santo mak sei hasanto Maromak nia povo. Hahalok rua nee labele haketak malu.

Maun alin amululik doben sira diocesano ka religioso nebe namkari iha diocese Dili ninian husi kedas rai rohan Bauknana ninian to’o iha Alas, husi Hatubuilico Ramelau nia hun ba to’o iha foho Makadadi ninian, imi hotu nebe servisu makas no sacrifica an iha fatin oi-oin ba Maromak nia reino. Ohin ita halibur hamutuk manifesta ita nia comunhão iha Uma Creda. Ita nia celebração momento ida atu purifica ao mesmo tempo atu motiva liu tan ita nia missão iha Uma Creda. Momento ida nee mak liu-liu Uma Creda iha diocese tem que ser mos sai ita nia comunhão nebe visível no credível. Ho buat hotu nebe mosu no sei iha buat barak nebe sei acontece tan, maibe ita nia comunhão sacerdoral tem que ser mais visível no credível iha ita nia sociadade no diocese. Nee la dehan katak sidauk iha, maibe loron ba loron ita precisa hadia nafatin. Keta haluha São Bernardo ninia conselho Espiritual ba nia irmão sira nia dehan; “Se ita la ho progresso nee laos dehan katak ita parado, se ita la halo progresso katak ita fila ba kotuk, katak ita continua ita nia moris precisa nafatin atu renova ita nia an. Tan nee maluk amululik doben sira, iita mai ohin laos atu hare malu deit, hasoru malu deit, maibe ita mai ho objetivo ida katak dala ida iha tinan ida atu hafoun ita nia comprimisso sacerdócio ninian. E hafoun oinsa? Hodi lori ita atu descobre fila fali beleza no inportância sacerdócio ninian. Convite ida ba existência Cristo forma, nebe atu esforço ida mais radical tuir Cristo besik liu tan. Santo ida nia descreve iha nia vocabulário wainhira koalia kona ba amululik nia dehan; “Amululik mak Jesus nia Futar Fuan Domin”. Amu Papa Francisco wainhira nia sei archebispo nia halo nia discrição kona ba Dom sacerdócio ninian nee, nia descreve ho liafuan ida hanesan nee; “Ita amululik sira wainhira ita celebra Eucaristia, ita tau ita nia kabás leten povo nebe Na’i Maromak entrega ba ita atu lori, sira nia naral hakerek iha ita nia fuan. Ida nee hatudu wainhira ita hatais ita nia Casula” diak mos mai ita atu sente iha ita nia kabás leten no ita nia fuan todan ita nia sarani sira nia ksolok sira nia terus no sira nia moris tomak. Ida nee pessoalmente halo ita atu hanoin fila fali wainhira ba dala uluk ita simu ita nia batina sempre marca ho cerimónia nebe solene. Tanba nee ohin momento ida ba ita atu hare oinsa ita expressa ita nia domin liu husi gesto nebe ita dehan karik la folin buat ida, maibe gesto hirak nee mos hatudu oinsa ita nia besik ba Na’i Maromak. Então fila ba ida nee ita bele husu ba ita nia an; oinsa mak Jesus nia Futar Fuan domin bele sai realidade ida iha ita nia moris amululik ninian ou ita bele dehan oinsa mak hau bele sukat katak hau fo duni sasin ida nebe los no mos.

Rona tiha leitura sira ohin nian, fo hanoin fali mai hau passágem ida husi Livro Deuteronómio nian nebe dehan; “Ita nação boot sei iha Maromak ida nebe besik los ba ita, Na’i ita nia Maromak nebe rona nafatin ita wainhira ita halerik no harohan”. Maromak ida nebe besik mai ita no Maromak ida nee hakarak mos ita nebe Nia bolu ona atu besik ba Nia povo. Ida nee mak ita rona iha Primeira Leitura convida ita atu hanoin fila fali Maromak nia atan, atan ida nebe Nia tau mina, atan ida nebe Nia haruka atu hela ho ema sira, besik ba sira nebe kiak, sira nebe moras, sira nebe iha cadeia. No Espírito nebe iha nia leten mak obriga acompanha nia atu saran nia moris.

Prova ida mai ita atu hare katak Maromak nia Liafuan hirak nee laos liafuan mamuk mak Salmo 88 nebe foin ita hananu fo hanoin mai ita oinsa Na’i Maromak nebe lao hamutuk, acompanha ema nebe Nia fihir. Liurai David wainhira hahu processo foinsae too nia katuas Na’i Maromak lao hamutuk ho Nia. Nia nebe fiel ba nia atan, Nia nebe besik ba nia atan halo Nia atan fiel too nia katuas.

Evangelho convida ita atu tama klean tan ituan iha ita Nain Jesus, husi nia maluk sira ema seluk nia matan. Atu contempla Jesus nia isin nia maluk sira nia matan, sira nebe hare, sira nebe fihir, sira nebe rona Nia. Jesus hamrik no le Livro Profeta Isaias ninian. Le hotu Nia dehan; “Na’i nia Espírito hela ho Ha’u Nia foti Ha’u haruka Ha’u”. Atu termina ho liafuan ida Nia dehan; “Liafuan escritura nebe imi foin rona sai tuir los duni”. Maluk doben sira, Nia hahu nia knar nudar Evangelizador, pregador ida nebe laos iha deit ambão, iha deit Sinagoga, maibe Nia lao tuir estrada sira atu haklaken, sai mensageiro boa Nova. Maromak hili hakarak besik ba nia povo. Tinan 30 moris ho ema atu rona. Rona tiha Nia hahu tama sai cidade atu tau matan, kura no haklaken. Ida nee ita bele dehan katak pedagojia da encarnação, pedagojia ida inculturação nian. Laos deit iha rai missão mak ita hanoin kona ba inculturação, maibe dalaruma iha ita nia paróquia, ita nia rain liu-liu iha nebe ho cultura sira foun particularmente cultura foinsae nian nebe ita tinan ida nee, diocese Dili ita nia tema pastoral nebe ita atu bele tama liu tan, fo liu tan fatin ba foinsae sira no rona sira. Então proximidade atitude ida nebe as liu vertude ida nian. Atitude ida nebe convida ita atu hakiak laços ho Na’i Maromak nunee mos ho Maluk sira. Liafuan proximidade mak chave ida Evangelizador nian ba saida mak atitude. Ita mos bele dehan proximidade chave lialos nian basá wainhira ita hakbesik mak ita hatene liu tan realidade grupo no ema ida-idak nian.

Wainhira hanoin kona ba ida nee, ita ida-idak sei fila ba ita nia an nudar amululik ita bele hare fila fali ba ita nia vocação. Oinsa mak ita nia vocação amululik nian nee mosu. Koko hare fali ita nia vocação sira, ita hare fila fali ba ita ida-idak nia história vocação ninian ita nia vocação nee hahu oinsa! Laos tanba ita atrai ba iha amululik ida nia hamnasa, ba nia liafuan no nia hahalok, nia moris nebe fácil hakbesik no koalia atrai ita. Ita barak descobre Maromak nia bolu liu husi encontro ida nee karik laos direitamente Anjo ida mosu mai ita, visão ida extraordinário, maibe dalabarak liu husi encontro sira Maromak nia ema nebe besik. Liu huis encontro hirak nee mak ita descobre Maromak nebe moris iha ita nia le’et. Então buat ida nebe sadik ita mak ida nee; laos deit proximidade, maibe saida mak ita precisa lori. Ohin ita rona Evangelho Jesus dehan Na’i nia Espírito hela iha Ha’u, Nia foti Ha’u no haruka Ha’u ba. Tan nee ohin loron ita sei rona fila fali nafatin ba experiência amululik sira nian ohin loron ita barak quando lao iha ita nia sarani sira nia leet, ita rona ita nia sarani sira nebe idade ituan gosta hatudu mai ita sira nia missionária ba missionário antigo sira, sira nia gesto pastoral, sira nia proximidade apostólica. Por exemplo Padre Carlos Russo tuir Amo Vigário Geral wainhira konta kona ba Pe. Carlos nia dehan; Uluk nee ema fo naran ba Pe. Carlos missionário Ambulante katak nia la iha paróquia ida, maibe pároco hotu-hotu autoriza nia bele tama sai paróquia sira atu fo comfessa, atu exerce ninia ministério amululik ninian. Ohin loron dala barak hau pessoalmente rona ema sira nebe besik ba nia sei konta nafatin ho amu nia entuciasmo makas kona ba amuluik ida nee ninia an. Laos deit buat nebe nia halo, maibe liu-liu ninia moris oinsa nia celebra sacramento, comfissão no Eucaristia no mos amululik missionário katuas sira nebe ita ida-idak hatene.

Maluk doben amululik sira, ohin momento diak ida mai ita atu redescobre fila fali furak no murak vocação ida nee nian. Ita nia vontade atu haburas vocação ida nee iha mundo ohin loron nian. Dalaruma nebe bele uja hadaet murak mean Maromak nian ida nee, ita nia amo Papa nafatin fo hanoin mai ita amululik sira nia dehan; cria ambiente ida acompanhamento Espiritual nian liu-liu ba sarani sira, disponível nafatin atu rona comfissão, la kole atu haklaken Maromak nia Futar Lia basá ohin loron iha ema diak barak nebe buka Maromak. Nee duni wainhira koalia kona ba proximidade dala barak ita hanoin tem que lao ba fatin sira nebe dook, maibe la precisa hanoin ba fatin nebe dook, karik precisa deit sensitividade ida iha ita nia fatin ho ita nia maun-alin sira nebe haleu ita dalaruma precisa ita nia tulun.

Iha tinan hirak nee hau hare no rona ita nia amululik no madre sira halo esforço atu sai husi duni ita nia zona de conforto sira tama iha realidade hirak nee. Tan nee ba sira hau hakarak congratula ba amululik no madre sira nebe halo esforço ida nee corágem atu hakbesik ba família sira, grupo, liu-liu ba grupo sira nebe existe ho caráter sira nebe ladun sarani. Dalaruma ita rona liafuan sira ita nia foinsae sira, grupos ruma nebe ho naran nebe estranho ituan, maibe la impede ita atu tama ba iha grupo hirak nee atu rona, koalia ho sira. Ida nee mak ita nia amu Papa hanaran sira nebe iha Periferia.

Maun alin doben sira wainhira ita koalia kona ba ita nia proximidade ida nee convida ita atu hare ba ita nia Inan Nain Feto Maria. Maria hanesan ita hotu hatene; Mãe do Sacerdotes; Nossa Senhora da proximidade nudar Inan diak ida nebe atu lao ho ita, acompanha ita, luta ho ita, nunee hakbesik nafatin ba Maromak nia domin. Nain Feto laos deit besik, laos ita admira kona ba nia prontidão atu hatan no servi, maibe mos iha Nia maneira atu koalia. Ita hare iha festa Kanna tua laiha Nain Feto dehan ba atan sira; halo tuir saida mak Nia dehan ba imi. Nee hatudu oinsa Nain Feto nia atensão nudar Inan ida nian ba ita hotu nebe ohin particularmente mai ita amululik sira ida-idak ho nia proximidade amizade especial ho Inan Lalehan  ida nee nian. Nee loron ida nee mai ita hafoun hikas ita nia confiansa no husik ita nia Inan doben nee lao hamutuk ho ita iha dalan cruz ninian no hanourin ita hatene hamrik metin nafatin iha cruz hun maske laloran, maske anin boot, maibe ita metin nafatin hamutuk ho Nia ho Nia Oan Jesus.

Leave a Reply

Your email address will not be published. Required fields are marked *