shadow
Diocese de Dili > NOTÍCIAS > LETURA DIÁRIA > Domingo de Ramos (ANO C)

Domingo de Ramos (ANO C)

Primeira Leitura                            Is 50. 4-7

Lia housi livro profeta isaías nian:

Na’i haraik tulun, atu ha’u ko’alia nu’udar escolante ida, hodi hatene tulun ho lia fuan ida, ema sira be iha susar laran. Dadersan-dadersan, Nia loke Ha’u tilun atu Ha’u rona, hanesan escolante sira rona. Na’i Maromak loke Ha’u nia tilun, Ha’u la sees, Ha’u la hakiduk. Ha’u, see Ha’u kotuk ba ema sira be baku Ha’u; Ha’u see Ha’u hasan ba ema sira be fokit Ha’u hasanrahun; Ha’u la subar Ha’u oin ba lia aat no kaben tasak. Na’i Maromak mai tulun Ha’u, tan ne’e Ha’u la moe. Ha’u halo Ha’u oin to’os hanesan fatuk, Ha’u hatene katak Ha’u sei la hein leet.

Maromak Futar Lia.   

 

Salmo Responsorial                                                      Sal 21 (22), 8-9, 17-18ª, 19-20, 23-24

Refrão : Ha’u nia Maromak, Ha’u nia Maromak tan sá hewai ha’u? Repete-se

Sira bé har’e ha’u, hamoe ha’u,

Sira biu ibun, hodi doko ulun:

“Nia fiar iha nia Na’i, Na’i nee sadia Nia ba!

Sadia Nia, tan hakarak Nia di’ak!” Refrão

 

Asu lubun boot haleu ha’u,

Ema aat lubun boot hadulas ha’u.

Sira hedi borus ha’u liman no ain,

Ha’u bele sura ha’u ruin tomak. Refrão

 

Sira lees fahe Ha’u unuk ba sira,

Sira har’e Ha’u tais atu monu ba sé.

Maibé, Na’i, Ita keta hadook-An housi Ha’u;

Ho kbiit, mai sadia Ha’u! Refrão

 

Ita naran Ha’u sei haklaken ba maun-alin sira,

Ha’u sei hahii Ita iha ema sira leet.

Imi be ta’uk Na’i, hahí Nia ba,

Jacob oan sira houtu, imi fo glória ba Nia,

Israel oan sira houtu, hanai Nia ba. Refrão

 

Segunda  Leitura                                                                                                                                                                     Flp 2, 6-11

Lia housi São Paulo nia surat ba sarani sira iha Filipo:

Maun-alin sira: Jesus Cristo maski Maromak los, Nia la hatudu Nia ilas nu’udar Maromak, maibé, Nia haraik-An nu’udar atan, hodi mosu mai nu’udar mane los. Nu’udar mane los, Nia haraik-An liu atan, wainhira Nia halo tuir deit too mate, hodi mate iha Cruz! Tamba nee, Maromak hahí Nia, hodi haraik naran boot ida ba Nia, naran ida boot liu naran hotu hotu iha rai-klaran. Tan ne’e, ema hotu-hotu rona tiha Jesus nia naran, sei tuku tur hanai Nia iha lalehan, ka iha rai-klaran, ka iha inferno laran! Nunee mak povo houtu sei hatene katak Jesus Cristo mak Na’i, hodi fo glória ba Aman Maromak.

Maromak Futar Lia.

 

Aclamação                                                                                                                                                                                 Flp. 2, 8-9

Refrão : Liurai, glória rohan laek, ami hahí Ita!! Repete-se

Cristo halo tuir de’it to’o mate, mate iha cruz Tan ne’e, Maromak hahí Nia,

Hodi fó naran ida ba Nia, Boot liu naran houtu. Refrão

 

Evangelho (Forma Longa)                                                                                                                                      Lc. 22, 14-23. 56

† Na’i Jesus Cristo nia Evangelho nu’udar São Lucas haktuir:

N. To’o ona loron, Jesus halibur Apóstolo sira atu han. Jesus dehan ba sira:

J. Ha’u hakarak teb-tebes han Páscoa ne’e ho imi, molok atu terus. Ha’u dehan lia lós ba imi: Ha’u sei la han tan Páscoa ne’e to’o Nia halo tuir lolós iha Reino lalehan.

N. Jesus kaer tiha kalis ida, fó agradece, dehan:

J. “Imi simu ida ne’e, hodi fahe ba malu;

tan Ha’u sei la hemu tan tua mai housi uvas,

to’o loron Maromak nia reino mai.”

N. Hafoin, Nia kaer pão, fó agradece, silu hodi fahe dehan:

J. “Ne’e ha’u nia isin, saran ba mate tan imi. Imi halo ida ne’e hodi hanoin Ha’u.”

N. Han hotu tiha, Nia kaer kalis dehan:

J. “Ne’e kalis Ha’u ran nian, Ran moruk foun, nebé, tan ba imi, sei nakfakar. Maibe, ida nebé atu saran Ha’u ba mate, han daudaun ho Ha’u ne’e. Mane Maksoyn atu ba ona, nu’udar hakerek nanis ona. Maibe, susar ba ema ida nebé saran Nia ba mate.”

N. Sira husu ba malu, sê lós mak atu halo buat ne’e. Sira haksesuk malu mos sira ne’e, ida nebé mak boot liu hotu. Jesus dehan ba sira:

J. “Liurai sira ukun sira nia nação ho kroat; sira iha kbiit ukun nune’e; ema sira be iha kbiit atu ukun nune’e, halo tiha sira-an nu’udar ema tulun-na’in. Imi keta halo hanesan ne’e. Imi ida nebé mak boot liu sei halo nia-an nu’udar kiik liu; imi ida be ukun sei halo nia-an sai nu’udar ida be serbí. Basá, ida nebé mak boot liu, ida be tur han iha mesa, ka ida be tau han ba mesa? La’os ida be tur han iha mesa? Ha’u iha imi leet nu’udar ema be tau han ba mesa. Imi mak hela nafatin iha Ha’u sorin, iha Ha’u susar laran. Ha’u fó kbiit ida ba imi atu ukun, hanesan Ha’u Aman fó mai Ha’u: Imi sei han hemu hamutuk ho Ha’u iha reino lalehan; imi sei tur iha fatin aas, atu tesi lia ba Israel nia knuan sanulu resin rua. Simão, Simão, Satanás husu kbiit atu doko imi hanesan anin huu trigo kain. Maibé, Ha’u harohan ba imi, atu imi nia fiar keta mihis. Ó, wainhira fila ba kotuk fó brani ba maun-alin sira.”

N. Pedro hatan ba Jesus:

R. “Na’i, ha’u hakarak ba ho Ita, la’os ba dadur de’it, maibé bele ba to’o mate.”

N. Jesus dehan ba nia:

J. “Pedro, Ha’u dehan ba ó: molok manu kokorek ohin, ó ssei heli lia dala toluk katak, ó la hatene Ha’u.”

N. Hafoin, Nia dehan ba sira seluk:

J. “Wainhira Ha’u haruka imi atu ba, imi la lori kohe, la lori osan, la hatais sepatu,… Imi susar ba buat ruma?”

N. Sira hatán katak la susar ba buat ida. Jesus dehan tenik:

J. “Maibé, oras ne’e, imi nebé iha osan, kaer nia osan, foti mos nia kohe. Sê mak la iha karik, faan nia unuk, hodi sosa netik ida. Ha’u dehan ba imi katak, sei sai tuir lolós buat nebé hakerek nanis kona ba Ha’u: ‘Ema tau Ha’u iha ema aat sira leet.’ Tebes, lia hirak ema hakerek, besik to’o ona nia rohan.”

N. Sira dehan:

R. “Na’i, ami iha surik rua.”

N. Maibé, Jesus hatán:

J. “Lalikan!”

N. Hanesan fila-fila halo, Jesus sai housi uma, hodi sa’e ba foho Oliveiras; ninian Eskolante sira mos tuir Nia. To’o tiha iha nebá, Jesus dehan ba sira:

J. “Imi harohan ba, atu imi keta monu ba babeur.”

N. Hafoin, Nia ba dook tiha housi sira,

bele sukat hanesan fatuk tuda ida nia dook,

Nia hakneak hodi hahu hamulak nune’e:

J. “Aman, Ita hakarak karik, hadook tiha kalis ne’e housi Ha’u.

Maibe, labele halo tuir Ha’u nia hakaran; halo tuir mak Ita nian.”

N. Housi lalehan mosu mai Anjo ida, atu haksolok netik Nia. Ho laran susar teb-tebes, Jesus hamulak liu tan; kosar wen turu mai hanesan ran nebé suli ba rai. Hamulak hotu tiha, Nia ba buka nia Eskolante sira; ho neon sala, Nia hetan sira toba hela. Jesus dehan ba sira:

J. “Tan sá imi toba?

Imi hamriik ba, atu hamulak,

atu keta monu ba babeur.”

N. Jesus ko’alia hela, mosu mai ema lubun boot ida.

Ida be naran Judas, sira na’in sanulu resin rua ne’e ida, mai iha oin.

Nia hakbesik hodi re’in Jesus. Jesus dehan ba sira:

J. “Judas, ho re’in ida, ó saran Mane-Maksoyn ba mate?”

N. Haré buat sá atu mosu daudaun, sira be hale’u Jesus, husu ba Nia:

R. “Na’i, ami bele hakanek ho surik ka lae?”

N. Sira ida hakanek tiha na’ilulik boot nia atan, tesi tiha nia tulun kwanan. Maybe, Jesus hakait netik sira, hodi dehan:

J. “Lalikan! Husik ba!”

N. Hafoin, Jesus kona de’it iha ema nia tilun, nia tilun di’ak kedas. Jesus dehan ba sira nebé mai hasouru Nia, na’ilulik sira, Uma-Kreda nia ulun sira no ema khahen sira:

J. “Imi mai ho surik no ai, hanesan imi ba hasouru ema aat ruma? Loron-loron Ha’u hela ho imi iha Templo, imi la halo buat ida mai Ha’u! … Maibé, ne’e imi nia loron, ne’e nakukun nia kbiit.”

N. Kaer tiha Jesus, sira lori Nia ba to’o sacerdote boot nia uman. Pedro la’o tuir do-dook. Sira tau ahi matan ida iha uma oin, tur hadulas hodi haneruk ahi; Pedro mos iha sira leet. Wainhira sira haré Pedro haneruk ahi, atan feto ida fihir nia hodi dehan:

R. “Ema ne’e mos hela ho Jesus”

N. Maibé, Pedro heli dehan:

R. “Feto, ha’u la hatene Nia.”

N. Hafoin ida seluk dehan:

R. “Ó mos Nia maluk.”

N. Maibé, Pedro hatán:

R. “Ha’u lae!”

N. Liu tiha besik oras ida, ida seluk litik nia, dehan:

R. “Tebes, ema ne’e mos hela ho Jesus, tan nia ema Galileu”.

N. Pedro dehan:

R. “Ha’u la hatene buat sá ó dehan”.

N. Iha oras ne’e duni, nia sei hateten hela, manu ida kokorek. Jesus fila oin, matan monu lós ba Pedro. Pedro hanoin kona Na’i nia liafuan, nebé dehan: “Molok manu ida kokorek, ó sei heli lia dala tolu katak ó la hatene Ha’u”. Ba tiha liur, Pedro tanis ho neon susar. Ema sira nebé dadur Jesus, hahú hamoe hodi foti lia hasouru Nia. Hodi hena ida taka tiha Nia oin, sira husu:

R. “Ó siik took! Sê mak baku Ó ne’e?”

N. Sira foti lia barak hasouru Nia. Molok rai hun mutin, sacerdote kbahen sira halibur hamutuk: sacerdote boot no escriba sira. Sira lori Jesus ba fatin atu tesi lia, hodi dehan:

R. “Ó Messias sá, dehan lolós mai!”

N. Maibé, Jesus hatán:

J. “Ha’u dehan karik, imi sei la fiar; Ha’u husu lia ruma karik, mos imi sei la hatán. Maibé, hodi ohin ba oin Mane-Maksoyn sei tur iha Maromak nia futar kuanan.”

N. Sira hotu dehan:

R. “Ó Maromak oan duni?”

N. Jesus hatán:

J. “Hanesan imi dehan. Ha’u duni!”

N. Sira hotu hasée:

R. “Ita sei buka tan sasin atu halo sá? Ita nia tilun rasik rona housi Nia ibun!”

N. Sira hotu hamriik, lori Jesus ba Pilatos. Sira foti lia hasouru Jesus, dehan:

R. “Ami hetan ema ne’e hatatan ita nia povo atu la selu imposto ba César,

hodi hanaran Nia-An rasik: MESSIAS-LIURAI.”

N. Pilatos husu ba Nia:

R. ”Ó ema Judeu sira nia Liurai?”

N. Jesus simu ba nia:

J. ”Hanesan ó dehan:”

N. Pilatos dehan ba sacerdote boot no ema lubun boot sira:

R. “Ha’u la hetan sala ida iha Ema ne’e.”

N. Maibé, sira litik beibeik:

R. “Nia halibur povo, hodi hanourin ha rai Judeia tomak; hahú housi Galileia, to’o mai iha ne’e.”

N. Rona tiha lia hirak ne’e, Pilatos husu katak Nia ema Galileia ka lae; hatene tiha katak Jesus tuir Herodes nia ukun, Pilatos haruka lori Nia ba Herodes. Iha tempo hira ne’e, Herodes mos iha Jerusalém. Wainhira Herodes haré Jesus, nia haksolok teb-tebes, tan dala barak ona nia hakarak haré Jesus, tan lia hirak nia rona. Herodes mos hakarak haré buat foun ruma mosu housi Jesus. Nia husu lia barak ba Jesus, maibé, Jeus la hatán lia ida. Sacerdote boot no ema escriba sira iha nebá, foli lia barak hasouru Jesus. Herodes ho nia soldado sira, hewai hodi halo aat lós ba Jesus. Hafoin, sira fo hatais unuk di’ak ida hodi haruka lori Nia fila fali ba Pilatos. Hahú ba loron ne’e, Herodes ho Pilatos ba dame fali malu. Uluk, sira na’in rua la haré malu di’ak. Pilatos halibur ulun sacerdote sira nian, na’i-ulun sira no povo, hodi dehan:

R. “Imi lori Ema ne’e mai ha’u, nu’udar ema sorandor povo. Maibé, imi haré ha’u husu Nia iha imi rasik nia oin; lia hirak nebé imi foti hasouru Nia, ha’u la hetan iha Nia. Herodes mos la hetan, tan ne’e, nia haruka fali mai ita. Nu’udar imi haré, lia hirak ne’e labele lori Nia mate. Ne’e duni, ha’u sei haruka baku Nia, hafoin, husik fali.”

N. Tuir sira lisan, iha loron festa, Pilatos sei hasai dadur ida housi kastigu. Sira hotu-hotu hamutuk hakilar:

R. “Oho Nia, hasai mak Barrabás!”

N. Barrabás, ema dadur, tan halo lia oi-oin, to’o oho ema. Dala ida tan Pilatos dehan ba sira, haodi hanoin husik tiha Jesus. Maibé, sira hotu hakilar liu tan:

R. Oho Nia! Oho Nia!”

N. Pilatos husu ba sira, ida ne’e dala tolu ona:

R. “Nia halo aat sá? Ha’u la hetan lia ruma bele lori Nia ba mate. Ne’e duni, ha’u sei haruka baku Nia, hafoin husik fali.”

N. Maibé, sira hakilar liu tan, hodi husu atu oho Jesus. Sira hakilar liu tan ho hirus. Tan ne’e, Pilatos hanoin halo tuir sira nia hakaran: nia hasai ema ida be dadur tan halo aat, tan oho ema, nu’udar sira hakarak; nia saran Jesus ba mate, tuir sira husu. Wainhira sira lori Jesus, sira kaer ema ida naran Simão Cireneu, nebé fila housi toos, atu tulun Jesus lori cruz. Ema lubun boot ida tuir; feto barak tuku hirus matan, maibé, Jesus fila oin ba sira dehan:

J. “Feto Jerusalém nian, imi keta tanis tan Ha’u; tanis ba imi-an rasik, tanis ba imi-oan sira. Tamba sei to’o mai, loron nebé ema sei dehan: Rahun-di’ak ba feto la iha oan, rahun-di’ak be feto knotak nebé la ko’us, la fo susu’. Iha loron ne’e, sira sei dehan ba foho sira: Imi monu mai ami leten’; sira sei dehan ba foho kiik sira: Imi taka mai’. Tamba, nu’udar sira halo ba ai-hun matak, nune’e, sira sei halo aat liu ba ai-hun maran.

N. Sira lori tan ema seluk: na’okten na’in rua atu oho hamutuk ho Jesus. Wainhira to’o iha fatin naran Calvário, sira hedi Jesus iha Cruz, hedi mos sira na’in rua; harí ida iha kuanan, ida seluk iha karuk. Jesus dehan:

J. “Ha’u Aman, sadia sira ba: tan sira la hatene sá ne’e sira halo!”

N. Sira taru atu haré, Jesus nia unuk monu lós ba sê. Ema povo sira hateke hela ba sira. Ulun sira hamoe Jesus, dehan:

R. “Nia soy ema seluk; Maromak nia Messias karik, soy Ó-An rasik ba”.

N. Soldado sira mos hateten aat Jesus; sira hakbesik atu fo na’an horum, sira dehan:

R. “Ó Judeu sira nia Liurai karik, soy Ó-An rasik ba!”

N. Iha ai-kabelak ida hakerek nune’e: “Nia, Judeu sira nia Liurai.” Naokten nebé hedi mos iha cruz, dehan aat lós Jesus:

R. “Ó laós Messias?” Soy Ó-An rasik ba, soy mos ami.”

N. Maibé, ida seluk haksi’ak nia, dehan:

R. “Ó mos hetan terus ne’e, ó la hamta’uk Maromak? Tuir justiça, ita terus ne’e, tan ita nia hahalok aat. Maibé, Ema ne’e la halo aat ida.”

N. Nia dehan tenik:

R. “Jesus hanoin ha’u, wainhira Ita tama iha Ita nia Reino.”

N. Jesus hatán ba nia:

J. “Ohin kedas ó sei hamutuk ho Ha’u iha lalehan”.

N. Besik ona loron manas boot, wainhira kalohan taka metin rai; besik tuku tolu loron kraik, loron mate tiha. Uma-Kreda kakuluk fera ba rua. Jeus foti lian maka’as, dehan:

J. “Aman, iha Ita liman, Ha’u hasa’e Ha’u íis!”

N. Dehan tiha ne’e, Jesus mate. Haré tiha buat ne’e hotu, ulun boot soldado sira nian hahí Maromak, dehan:

R. “Tebes, Ema ne’e, Ema di’ak ida.”

N. Ema lubun boot halai ba haré sá ne’e mosu iha fatin nebé; haré tiha sá ne’e mosu, sira fila fali ba uman hodi tuku hirus matan. Jesus nia maluk sira hela dook hodi haré; nune’e mos, feto sira nebé tuir Jesus housi Galileia. Feto sira ne’e, haré lalaok sira hotu. Ema ida naran José, ulun reino nian, ema laran di’ak, nia la tuir nia maluk sira nia tesi-lia, nia la halo tuir maluk sira nia hahalok. Nia ra’in mak kota Arimateia iha Judeia; nia hein hela Maromak nia Reino. José, ba ko’alia ho Pilatos, hodi husu Jesus nia Isin-mate. Hatun tiha Jesus nia Isin-mate housi Cruz, nia falun tiha ho hena mutin ida; hafoin, lori ba hakoi iha rate foun ida, nebé seidauk hakoi ema ida ba. Ne’e, loron sadi’a sasan nian; Ema hahú lori mai ahi-oan sábado nian. Feto sira nebé tuir Jesus housi Galileia, sira tuir José, hodi haré hakoi Jesus iha nebé, no sira hakoi Nia oin sá. Fila fali, sira ba hola mina morin. Iha sábado, sira la kaer servisu, tuir sira lisan.

Lia Maksoyn.

 

Evangelho (Forma Breve)                                                                                                                                                 Lc. 23, 1-49

† Na’i Jesus Cristo nia Evangelho nu’udar São Lucas haktuir:

N. Iha tempo nebá, kbahen sira, sacerdote boot sira no escriba sira, sira hotu hamriik, lori Jesus ba Pilatos. Sira foti lia hasouru Jesus, dehan:

R. “Ami hetan Ema ne’e hatatan ita nia povo atu la selu imposto ba César, hodi hanaran nia-An rasik: MESSIAS LIURAI.”

N. Pilatos husu ba Nia:

R. “Ó ema Judeu sira nia Liurai?”

N. Jesus simu ba nia:

J. “Hanesan ó dehan!”

N. Pilatos dehan ba sacerdote boot no ema lubun boot sira:

R. “Ha’u la hetan sala ida iha Ema ne’e.”

N. Maibé, sira litik beibeik:

R. “Nia halibur povo, hodi hanourin iha rai Judeia tomak; hahú Galileia, to’o mai iha ne’e.”

N. Rona tiha lia hirak ne’e, Pilatos husu katak, Nia ema Galileu eh lae. Hatene tiha katak Jesus tuir Herodes nia ukun, Pilatos haruka lori Nia ba Herodes. Iha loron hirak ne’e, Herodes mos iha Jerusalém. Wainhira Herodes haré Jesus, nia haksolok teb-tebes, tan dala barak ona, nia hakarak haré Jesus, tan lia hirak nia rona. Herodes mos hakarak haré, buat foun ruma mosu housi Jesus. Nia husu lia barak ba Jesus, maibé Jesus la hatán ida. Sacerdote boot no ema escriba sira iha nebá, foti lia barak hasouru Jesus. Herodes ho nia soldado sira hewai hodi halo aat los ba Jesus. Hafoin, sira fo hatais unuk di’ak ida hodi haruka lori Nia fila fali ba Pilatos. Hahú ba loron ne’e, Herodes ho Pilatos ba dame malu fali. Uluk sira na’in rua la haré malu di’ak. Pilatos halibur ulun sacerdote sira nian, na’i ulun sira no povo, hodi dehan:

R. “Imi lori Ema ne’e mai Ha’u, nu’udar ema sorandor povo. Maibé, imi haré ha’u husu Nia iha imi rasik nia oin; lia hirak nebé imi foti hasouru Nia, ha’u la hetan iha Nia. Herodes mos la hetan, tan ne’e, nia haruka fali mai ita. Nu’udar imi haré, lia hirak ne’e labele lori Nia ba mate. Ne’e duni, ha’u sei haruka baku Nia, hafoin husik fali.”

N. Tuir sira lisan, iha loron festa, Pilatos sei hasai dadur ida housi kastigu. Sira hotu hamutuk hakilar:

R. “Oho Nia, hasai mak Barrabás!”

N. Barrabás, ema dadur, tan halo lia oi-oin, to’o oho ema. Dala ida tan Pilatos dehan ba sira, hodi hanoin husik tiha Jesus. Maibé, sira hotu hakilar liu tan:

R. “Oho Nia, oho Nia!”

N. Pilatus husu ba sira, ida ne’e ba dala tolu ona:

R. “Nia halo aat sá? Ha’u la hetan lia ruma bele lori Nia ba mate. Ne’e duni, ha’u sei haruka baku Nia, hafoin, husik fali.”

N. Maibé, sira hakilar liu tan, hodi husu atu oho Jesus. Sira hakilar liu tan ho hirus. Tan ne’e, Pilatos hanoin halo tuir sira nia hakaran: nia hasai ema ida be dadur tan halo aat, han oho ema, nu’udar sira hakarak; nia saran Jesus ba mate, tuir sira husu. Wainhira sira lori Jesus sira kaer ema ida naran Simão Cireneu, nebé fila housi nia toos, atu tulun Jesus lori cruz. Ema lubun boot ida tuir; feto barak tuku hirus matan, hodi hanoin teb-tebes Jesus. Maibé, Jesus fila oin ba sira dehan:

J. “Feto Jerusalém sira, imi keta tanis tan Ha’u, tanis ba imi-an rasik, tanis ba imi-oan sira. Tamba sei to’o loron nebé ema sei dehan: Rahun-di’ak ba feto la iha oan, rahun-di’ak ba feto knotak nebé la ko’us, la fo susu. Iha loron ne’e , sira sei dehan ba foho sira: ‘Imi monu mai ami leten’; sira sei dehan ba foho kiik sira: ‘Imi taka mai’. Tamba, nu’udar sira halo ba ai-hun matak nune’e, sira sei halo aat liu ba ai-hun maran.”

N. Sira lori tan ema seluk: naokten na’in rua atu oho hamutuk ho Jesus. Wainhira to’o iha fatin naran Calvário, sira hedi Jesus iha Cruz, hedi mos sira na’in rua; harí ida iha kuanan, ida seluk iha karuk. Jesus dehan:

J. “Ha’u Aman, sadia sira ba; tan sira la hatene sá ne’e sira halo!”

N. Sira taru atu haré, Jesus nia unuk monu lós ba sê. Ema povo sira hateke hela ba sira. Ulun sira hamoe Jesus, dehan:

R. “Nia soy ema seluk; Ó, Maromak nia Messias karik, soy Ó-an rasik ba.”

N. Soldado sira mos hateten aat Jesus; sira hakbesik atu fo na’an horun, sira dehan:

R. ”Ó, Judeu sira nia Liurai karik, soy Ó-An rasik ba.”

N. Iha ai-kabelak ida hakerek nune’e: “NIA, JUDEU SIRA NIA LIURAI.” Naokten nebé hedi mos iha cruz, dehan aat lós Jesus:

R. “Ó láos Messias? Soy Ó-An rasik ba, soy mos ami.”

N. Maibé, ida seluk haksi’ak nia dehan:

R. “Ó mos hetan terus ne’e, ó la hamta’uk Maromak? Tuir justiça, ita terus ne’e tan ita nia hahalok aat. Maibé, Ema ne’e la halo aat ida.”

N. Nia dehan tenik:

R. “Jesus, hanoin ha’u, wainhira Ita tama iha Ita nia Reino!”

N. Jesus hatán ba nia:

J. “Ohin kedas ó sei hamutuk ho Ha’u iha lalehan.”

N. Besik ona loron manas boot, wainhira kalohan taka metin rai, besik tuku tolu loro-kraik, loron mate tiha. Uma-Kreda kakuluk fera ba rua. Jesus foti lia maka’as dehan:

J. “AMAN, IHA ITA LIMAN HA’U HASA’E HA’U IIS”

N. Dehan tiha ne’e, Jesus mate. Haré tiha buat ne’e hotu, ulun boot soldado nian hahí Maromak, dehan:

R. “Tebes, Ema ne’e, ema di’ak ida!” mosu iha fatin nebá; haré tiha sá ne’e mosu, sira fila fali ba uman hodi tuku hirus-matan. Jesus nia maluk sira hela dook hodi haré; nune’e mos, feto sira nebé tuir Jesus hosi Galileia. Feto sira ne’e haré lalaok sira hotu.

Lia Maksoyn.

Leave a Reply

Your email address will not be published. Required fields are marked *