shadow
Diocese de Dili > NOTÍCIAS > HOMILIA DO BISPO > MONUMENTO RENAL, REMIXIO

MONUMENTO RENAL, REMIXIO

Ohin ita hotu mai hamutuk iha fatin ida nee ho finalidade ida deit, agradece ba Na’i Maromak ba graça ida nebe Na’i Maromak haraik liu husi ema oi-oin; liu husi amo, comunidade no família sira nebe ohin lori ita mai hamutuk atu hanoin fila fali kona ba ita nia maun alin sira nebe lakon sira nia vida iha fatin ida nee e liu husi fatin ida nee mos sira contribui ba ita nia rain too hetan libertação. Nee duni ita mai ho sentido atu agradece ba Maromak ba graça moris ninian.

Se ohin ita rona didiak Leitura sira nee hotu iha ponto comum ida koalia kona ba Sentido moris ba sarani, sentido terus ba sarani no sentido mate ba sarani. Nee duni wainhira ita rona didiak leitura sira hahu husi Primeiro too Evangelho koalia kona ba sentido ida nee: oinsa mak ita sarani buka atu identifica ita nia an ho Jesus nia terus, Nia mate no Nia moris hias. Wainhira ita koko atu hare ita nia moris liu husi prespectiva ka liu husi óculo ida nee bele fo nafatin esperança ba ita. Tan nee, ohin ita mai iha nee atu hanoin kona ba ita nia maluk matebian sira nebe tinan 40 resin liu ba nebe terus no mate, ita mai atu celebra páscoa hamutuk ho sira. Nee duni ohin ita bele dehan katak, uluk sempre mai iha nee iha 12 de Novembro ka loron matebian nian, maibe ohin ita mai celebra páscoa katak ita fo sentido ida oin seluk, laos hanoin kona ba terus no mate maibe sira nia mate fo moris ba ita, sira nia terus no mate mak esperança ba ita. Tan nee mak ita mai fo sentida no ksolok ida nee tanba ita tem que agradece ba Maromak ba buat nebe sira halo liu husi terus mak ita ohin goja no ita bele hamrik iha fatin ida nee.

Nee duni, iha celebração ohin ninian hanoin kona ba ita nia maluk matebian sira ninia restos mortais iha fatin memorial ida nee lori ita atu hanoin kona ba sentido moris ninian. Moris nee ita laos nain ba ita nia moris, maibe moris nee Na’i Maromak empresta deit mai ita atu ita oinsa hatene uja moris nee didiak. Malae sira sempre dehan katak tempo nee osan mean. Nee duni ita nunca bele husik tempo nee liu saugate deit. Dala barak ita ema ohin loron nian ho meis moderno saúde nian iha, dalabarak ita hakarak saudável nafatin, atu nuee bele moris naruk, maibe ita mos tem que hanoin; laos hanoin moris naruk deit depois fo todan ba ema seluk. Maibe atu dehan katak moris nee laos ida nebe naruk liu eh badak liu, maibe oinsa maka hau halo hau nia moris nee sai útil ba iha hau nia maluk sira, ba hau nia família, ba hau nia comunidade no ba hau nia rain.

Ita ohin mai iha nee hanoin fila fali ita nia maluk sira nebe balun moris naruk no balun moris badak hanesan Avo Xavier nia oan nain rua nebe mate ho tinan ida nebe nurak. Ida nee ita hanoin kona ba oinsa sira nee mos ho maske sira nee ho tinan kiik, maibe depois de tinan naruk nee ohin lori ita hanoin fila fali ba contribuição nebe sira fo ba iha rai ida nee. Maske la koalia buat barak, maibe sira nia terus, sira nia mate halo ita hanoin mos kona ba sentido moris, la gasta sira nia vida saugate deit. Fila mos mai ita nebe ohin mai iha nee atu oinsa mak hau uja hau nia moris, oinsa mak moris nebe Na’i Maromak fo mai hau nee hau moris didiak duni atu halo buat ruma ka hau moris atu goja deit hodi ikus mai la husik hela buat ida. Tanba nee moris nee fila fali mai ita atu reflecte kona ba sentido moris iha ita ida-idak nia an. Tanba tempo nee osan mean precisa atu uja ho didiak.

Razão nebe lori ita ohin mai iha nee mak ita hanaran katak momento ida, momento histórico tan lori fila fali ita atu hanoin kona buat hotu nebe liu tiha, buat hotu nebe acontece ona iha fatin ida nee. Nee duni ita ohin mai uluk nanain liu husi Santa missa nebe ita celebra dadaun no cruz nebe ita hari iha ita hotu nia oin fo hanoin mai ita katak ita mai iha nee laos mai atu halo campanha política ida maibe ita mai ho objetivo ida nebe claro katak, ita mai hakarak atu hamutuk nudar comunidade, família sarani no ita hotu nebe conhece ita nia maluk sira nee ita mai atu reza ba sira atu nunee ita nia maluk sira nebe gasta sira nia vida hodi contribui ba ita nia rain, sira mos meresse atu simu ita nia oração no sacrifício.

Momento histórico ida nee nudar sarani atu reza ba sira, nudar sarani ita mos hanoin kona ba sira nia sacrifício, nudar sarani ita mos hanoin kona ba valor nebe sira husik hela mai ita. Nee duni ita nia maluk hirak nee hotu nebe ohin ita hanoin ita hakarak reza atu buat hotu nebe sira halo la liu saugate deit, maibe Na’i Maromak bele haraik ba sira fatin diak ida iha Lalehan, tanba ita rona iha leitura sira hotu ohin nian koalia kona ba esperança ida nee; esperança ida nee mak lori ita hotu mai hakarak atu reza atu sira mos loron ida, sira mos haksolok tanba sira terus ona, sira nia ran fakar ona ba iha rai ida nee, hein katak sira nia terus labele saugate deit, iha Maromak nia futar oin sira mos bele goja graça Nai Maromak nian. Buat ida nebe ohin lori ita mai hamutuk iha nee mos atu reflecte kona ba sentido sacrifício nebe ita nia maluk sira halo hodi contribui ba ita nia rain. Dala barak ita koalia kona ba ita nia rai timor nian, rai ida nebe ita nia liberdade nee laos deit ema ida nian esforço, maibe ita nia liberdade independéncia Timor nian nee ita bele dehan barak nebe ema conhece, barak nebe ema la conhece, maibe liu husi dalan oi-oin ema hirak nee hotu contribui, sacrifica sira nia an tanba sira iha determinação ida katak ita nia liberdade.

Nee duni, saida mak ita aprende husi sira? Ba hau dalabarak hau sempre dehan geração ida nee hanesan ponte nebe liga ba sira nebe liu tiha ona no sira nebe atu mai. Nudar ponte nee ita iha responsabilidade boot ida atu transmite ba geração nebe tuir mai; ita nia cultura, ita nia valor, ita nia identidade nebe los ba iha geração nebe tuir mai. Sira nebe uluk sira funu liu husi dalan oi-oin balun ema reconhece no balun sei iha processo ba iha reconhecimento nian, maibe ita nebe agora ita nia papel mak latoo iha reza deit maibe ita mos oinsa atu bele garante nudar ponte ida nee ita mos iha determinação ida katak hau moris, hau luta hodi hein ba saida mak hau hein iha hau nia moris. Uluk sira luta ba timor ida nebe livre, maibe ita ohin loron luta ba moris nebe diak liu, luta ba ita nia identidade ida nebe timoroan nafatin, luta ita mos hamriik nudar nação ida. Então ita nia determinação tem que claro labele ita nia identidade sai misto hotu deit.

Nee dunia saida mak tulun ita atu too ba ita nia determinação neba! ita nia espírito perseverança kuda iha saida! ita nia mártir sira nee hanourin mai ita espírirto de sacrifício; nee katak ita tem que aprende atu simu terus. Tanba dala barak ita moris jovem sira ohin loron nian nee moris gosta deit mak Rilex lakohi preucupa. Dala ruma ho sasan sira ohin loron nian hakarak halo ita moris iha ida nebe santai lakohi tiha ona buat nebe terus, maibe ita nia funu nain sira, ita nia mártir sira nebe ohin ita celebra, ita nia veteranos sira barak nebe sei moris hela iha ita nia leet sira nia testemunho ba ita mak ida nee; ‘Espírito de sacrifício’.

Nee duni, alin, oan foinsae sira,  celebração ohin loron nian ita laos mai repete deit, maibe hakarak atu transmite hela valor ida, laos deit ita halo monumento ida nee; monumento ida nee ita bele halo furak, maibe monumento ida nee la husik memória ida nebe moris, maske monumento nee furak maibe la tatoli hela valor nebe diak. Tanba nee ita precisa monumento ida moris mak imi sira foinsae, labarik sira, imi mak aban bainrua tem que continua. Ida nee mak ohin ita mai iha nee atu hamoris fila fali ida espírito de sacrifício nian. Liu husi ida nee mak bele tulun ita atu ita bele persevera. Ita nia funu ita lori tinan 24 mak foin too iha rohan, ita ukun an mos besik ona tinan 24, maibe ita hare buat barak sidauk too iha rohan. Maibe ita mos hakasan nafatin contribui.

Hau nia hanoin pessoal mak ida nee; rai ida nee ema barak ninia ran halo sacrifício mak ita hetan ukun rasik an. Dalaruma buat barak halo ita lao ba ita dehan progresso, demoracia, liberdade ita lao ba sidi hela deit nee keta halo fukun barak iha ita nia rain nee precisa hare fila fali karik. Ohin sarani sira iha nee halo ita nia celebração ida nee “Monu Ain” bele hatudu ituan, loke ituan fo naroman ituan, inspira nafatin ita nia ukunain sira atu hanoin hare ba buat barak nebe la lao. Tan nee, ita nia celebração ohin ninian comvida ita laos reza deit ba sira nia klamar atu Nai Maromak haraik perdua ba sira, maibe ita rreza mos ba ita bia ukunain sira, ba ita nia liderança sira ati valoriza ema hotu nebe terus liu husi dalan oin-oin, maibe dala barak mos ita la reconhece ema hirak nee nia contribuição ba iha ita nia rain ba iha ita nia liberdade. Nee duni ida nee mak reflexão nebe hau hakarak partilha ba imi iha celebração ida nee.

Renal, Remexio, 29 de Março 2019

Leave a Reply

Your email address will not be published. Required fields are marked *