shadow
Diocese de Dili > NOTÍCIAS > OPINIÃO > INFLUÊNCIA FACEBOOK BA ESTUDANTE SIRA

INFLUÊNCIA FACEBOOK BA ESTUDANTE SIRA

Husi : Marta do Rosário Afoan, Lcs.

 

               Média social sai hanesan meius ida ba ema hotu uza hodi hato’o, fahe, hatutan no halekar informação ba malu liu husi comunicação entre ema ida ho ema ida, entre ema ida ho ema barak kona ba buat saida de’it  mak acontece iha ema ida-idak nia moris lor-loron nian. Facebook mós hola parte nu’udar média social ida nebé ho tulun internet nian facilita comunicação ba malu, cria no  refórça relação ema sira nian.

               Tuir história katak iha tinan  2004, facebook hahu mósu husi Havard iha universidade Americana nian hahu uza iha ensino superior. Iha 2005, MySpace, mósu tan ho naran SNS (Social Networking Sites ) hodi concorre ho facebook. Iha 2006, facebook ultrapassa husi fronteira Americana nian, hodi hatama an iha empreza sira, estudantes ensino superior sira no nakloke ba  comunidade sira hotu lalais liu no sai boot ba bebeik. Ohin loron facebook sai nu’udar rede social nebé ho linha rede boot no ema hamutuk milhões mak uza ativamente facebook  iha mundo hotu.  Ida ne’e sai hanesan fórma ida ba ema  uza atu conecta ho maluk seluk atu buka lalais informação, nomós funciona hanesan centro ida ba contacto nian.  

               Presença facebook  servi no facilita tebes ema ida-idak atu bele moris iha mundo globalização hodi descobre buat foun kona ba mundo, maibé liu-liu bele halo ema conhece malu di’ak liu tan. Hanesan bai-bain ita hotu hatene katak facebook mós hola parte hanesan meio importante ida ba ita nia moris tanba bele facilita ita hodi hetan no fahe informação ba malu iha qualquer fatin nebé ita horik ba. Tuir ninia funsão uza facebook importante liu mak atu haklean ita nia conhecimento kona ba lalaok mundo globalização moderno nian nebé ohin loron avansado teb-tebes. Uza facebook la’os atu chating ba malu de’it, la’os atu  conhece malu de’it liu husi foto nebé tau iha ida-idak ninia pájina maibé precisa hatene katak importante liu uza facebook atu bele hatene informação kona ba acontecimento saida de’it nebé acontece iha mundo nacional no mundo internacional no uza facebook atu bele aprende buat di’ak ruma nebé bele fó vantagen di’ak ba ita nia moris. Infelizmente dala barak liu ita hetan ema uza facebook hodi tolok malu, trata malu, edit ema nia foto áat arbiru de’it no hatún  malu. Hahalok ida ne’e hatudu katak ita seidauk bele atu hakat tuir mundo moderno nian no seidauk hatene uza facebook tuir ninia funsão no ninia importância.

               Haré ba realidade nune’e mak hakerek na’in considera katak tópico kona ba “Influência Facebook ba Estudante Sira” sai  importante atu acentua iha ne’e hodi fanu hikas maluk facebooker sira nebé  seidauk hatene utiliza didi’ak facebook, especialmente ba estudante sira tanba estudante sira  mak uza liu. Estudante sira mak sai fini no rikusoi nação nian  nomós sai  nu’udar geração foun nebé precisa aprende no hatene uza didi’ak hodi fó valór ba sira nia moris tanba média social facebook ohin loron  sai hanesan moras ida nebé bele da’et lalais ba ema, hanesan matenek na’in Kirkpatrick (2011:19) dehan, “As ideias no Facebook têm a capacidade de passar rapidamente por grupos e de tornar muitos indivíduos conscientes de algo quase em simultâneo, espalhando-se de uma pessoa para outra e daí para muitas com uma facilidade única como um vírus ou meme.” Katak ideia sira iha Facebook ho nia capacidade nebé  la’o lalais tebes husi grupo no halo  individu sira consciente ba buat balun ho lalais de’it, naklekar husi ema ida ba sira seluk no fó mós ba ema barak ho facilidade única hanesan vírus ou meme.

               Liga ba realidade nebé acontece iha ita nia nação Timor Leste, nebé mak foin ukun-an iha tinan 2002 maibé los duni katak moras facebook nian hahú da’et ona iha ema ida-idak nia fuan, tanto atu joven feto-mane, inan-aman no labarik sira mós começa moris tuir ona mundo globalização nian hodi envolve an iha rede social nian. Hanesan ita hotu assiste ba buat nebé mak mosu iha ita nia leet, dala barak liu ita uza facebook hodi tolok malu, trata malu arbiru de’it no barani uza ID falsu hodi trata ema seluk no trata lider politico sira liu husi média social. Relaciona ho ne’e, iha estudante timor oan sira ida ou rua mós halo. Sira uza facebook la tuir ninia função hanesan estudante ida nebé lolos uza facebook hodi  aprende no hatene conhecemento foun, hodi fahe informação no conehecimento nebé iha. Iha realidade  geral ita nia estudante sira  iha Timor ne’e dala barak liu kaer ona telefóne maka sira sei la halo atividade seluk, sira sei la kaer caderno atu estuda, sira sei la preocupa ho TPC (Trabalho Para Casa) nebé educadór sira fó, sira garantia liu tempo hodi hatudu an tuir facebook.  Estudante sira nu’udar geração foun nação nian  precisa uza lolós média social facebook, twiter, whatsapp sira, uluk nana’in la’os atu hatudu an maibé atu aprende no halo tuir buat nebé mak di’ak no buat nebé mak fó valor ba sira nia moris rasik ba sira nia futuro no ba nação nia moris no futuro.

 

REFERÊNCIA:

Leave a Reply

Your email address will not be published. Required fields are marked *