shadow
Diocese de Dili > NOTÍCIAS > Notícias > ESTADO TIMOR-LESTE PRECISA TERAPIA

ESTADO TIMOR-LESTE PRECISA TERAPIA

Iha loron 9 fulan Maio tinan 2019, equipa ida husi Deprtamento Comunicação de Dili (DCDD) entrevista ho Padre Martinho Gusmão iha Salão São José Catedral Dili hafoin participa tiha Conferência Internacional ho tema “The Dili Forum Dialogue” nebe realiza husi Conselho Imprensa Timor-Leste mak organiza.  Entrevista nee, foca liu ba situação real nebe oras nee estado Timor-Leste enfrenta no mos caso nebe público questiona makas sobre eis governante balun nebe sidauk hetan pena um terço, maibe naran iha ona lista Indulto nian. Kona ba situação sira oras nee Estado Timor-Leste hasoru, Padre Martinho Gusmão iha ninia comentário hateten, “Ita hare katak povo haksolok nafatin mesmo que ita nia Governo lao kudeik, ita nia Estado laiha força suficiente atu sustenta povo, então povo sustenta nia an rasik. Hau hanoin loron 20 fulan Maio nee ita halo reflexão oinsa mak realidade ita nia governante sira, ita nia matenek nain sira gosta koalia bebeik katak ita Timor nee Estado Frágil. Mas bele Estado Frágil ita nia povo nee forte, ita nia sociadade nee forte. Tanba sa mak hau dehan povo nee forte, tanba ita quando ba foho, aldeia sira sarani sira festa nafatin, koremetan, Barlake, ema iha osan, ema iha fos, ema iha buat hotu-hotu atu halo lia lor-loron enquanto ita nia governante sira susar atu hetan osan, atu halo ida nee ou ida neba, significa ita nia Estado nee frágil. Agora Estado nee se! Estado nee mak Presidéncia da República, Parlamento Nacional, Governo no Tribunais. Tribunal fraku, Presidente cadeia iha Aitarak laran, Parlamento Nacional ita lahatene koalia saida, Governo ita lahatene se mak manda. Ó hetan servisu laos tanba o iha capacidade intelectual técnico, maibe se o bele ba juramento iha Ramelau; e ita nia governo nee saida! ita nia governo ne se! Laiha identidade. Tanba nee mak ita sai membro G7+ tanba ita estado frágil, mas nação la frágil. Ema ida-idak buka atu hakmatek no moris diak. Nee duni ba hau ita ukunan ona tinan 17 ‘sweet seventeen’ pronto ona atu halao moris iha autonomia pessoal”.

Liu tan nee Padre Martinho Gusmão hateten, hau bele dehan katak ita iha hela ‘desintegração, desorientação no desorganização’ iha ita nia rai timor nee. Desintegração significa saida mak estado hanoin atu halo lahatan ba povo nia hakarak. Desorientação significa ita durante halo campanha eleitoral ita koalia buat ida, kaer tiha governo ita halo tiha fali buat seluk. Desorganização significa iha timor nee se mak manda ita lahatene; Presidente mak ás liu ka ou Secretário geral CNRT no FRETILIN mak as liu ita la hatene. Mas no fundo Presidente bele halo buat ida depende ba oinsa mak Secretário Geral husi partido boot rua nee mear ou husi partido sira seluk. Nee duni, ponto tolu nee (desintegração, desorientação no desorganização) sai hanesan albo ba ita atu reflete oinsa mak 17 tahun ona nee, ita iha nação jovem ida nebe aleijado ituan, ita tem que ser halo tratamento diak. Se aleijado ona mak ita la halo terapia ba ita nia estado ida nee da qui diante ita hetan jovem sira mesak aleijado tantanan.

Pe. Martinho Gusmão questiona mos kona ba servisu VIII Governo nian durante nee. Tan nee nia hateten, “Pelo menos que besik tinan ida ona ponte tohar, estrada namtate, avião la semo, caso concreto liu katak ita iha Airoporto boot 4 (Baucau, Dili, Suai no Oecusse) ita iha avião rua deit no ida monu tan tiha tula tan iha trek laran. Nee hatudu ba ita dehan katak jornalista sira capta realmente katak hanesan uluk wainhira forma governo hau dehan; nee hanesan careta boot ida sae iha Becora neba, careta nee ninia peso tonelada ida, mas ida agora iha nee nia lori tonelada rua. Governo ida nee dehan tau tonelada ida tau fali tonelada rua sae ba nee patina deit. Hanesan mos avião nia hakarak semo, maibe mina maran iha dalan klaran. Nee duni atu simboliza deit katak ita precisa halo intervensão emergência ba ita nia estado; ba Presidente da República, Governo, Parlamento Nacional no Tribubnal tem que ser tur didiak purque corruptor sira bele lao avontade sidauk buat ida indulto mai uluk ona, sidauk hatama cadeia indulto mai uluk ona. Agora ami padre sira nee empresta deit careta ba halo deit servisu ba povo hatama liu kedas katak lalais la halimar depois koalia tan imunidade. Tanba nee ita nia juiz sira ladun comprende didiak saida mak imunidade.

Oras nee dadaun público qustiona makas kona ba eis membro governante balun nebe alista atu hetan Indulto husi Presidente da República. Tan nee Padre Martinho iha parte afirma katak, “Conforme hau hare, julgamento ba sira sala. Quando sira tama tiha ona decisão final katak sira condenado tem que ser resolve nee resolve processo penal laos Indulto. Tem que ser resolve iha tribunal katak Tribunal uja poder ho força política atu hatama sira nain 3 iha prisão nee mak realidade. E agora foer kaer tuda sae fali ba Presidente nia leten atu Indulto lae! Presidente la precisa indulto, buat nebe Presidente tem que halo mak halo revisão ba processo julgamento. Tanba nee hau dehan nee lalos katak ita nia sistema judiciário nee ita lahatene ajuda corruptor sira nee laiha capacidade no sira hatene deit $ 500 USD nebe hau foti, mas $500USD ba leten sira sura lahatene ona tan nee mak halo processo sala. Tanba nee ita nia Tribunal precisa Matemática”.

Padre Martinho Gusmão haktuir tan katak, “Hau koalia ida nee tan hau rasik iha experiência tuir julgamento. Hau tur iha neba liman ain mamar até próprio hau mak hatudu tan ba Juiz, ba Tribunal dehan katak imi hakarak julga Padre nee dalan mak nee; hau hatudu ba sira Lei mak nee bele julga padre maibe hasai lai hau nia imunidade. Mas hasai hau dalarua depois ba kedas Tribunal. Agora Kalbuady nian dehan imunidade. Imunidade saida! nia labele uja imunidade porque crime nebe nia halo nee manipula certidão ho projeto iha Oecusse nebe laiha relação ho ninia cargo nudar Ministro. Agora Gastão nee nia cargo nudar ministro nia fo ajuda ba hau nee mak dehan imunidade laos fali buat seluk. Nee duni imunidade é dalan nebe keliru total. Presidente la precisa fo indulto ba sira, mas Presidente bele husu ba Tribunal atu halo revisão ba processo julgamento, tem que ser halo anulação ba julgamento laos Indulto. Indulto nee estraga sistema judiciário. Presidente da República iha duni capacidade e nia iha direito legal atu halo Indulto. E caso agora nee laos Presidente mak sala maibe Tribunal mak sala tan ne precisa hadia Tribunal”.

Padre Martinho recomenta mos katak, “Ba hau precisa hadia parte Tribunal ho rigoroso tanba ida halo Lei barbarak depois ida be kaer Lei nee mak la aguenta halo saida. tanba nee buat nebe importante nee mak hare ita nia Tribunal porque estado frágil nee ida mak Tribunal no ida frágil liu tan mak Parlamento Nacional tanba nee ita tem que hare ninia integridade”.  (Angelson/Alin)

Leave a Reply

Your email address will not be published. Required fields are marked *