shadow
Diocese de Dili > NOTÍCIAS > REFLEXÃO > VOCAÇÃO : COMPORTA DIDIAK ATU EMA HARÉ JESUS IHA ITA

VOCAÇÃO : COMPORTA DIDIAK ATU EMA HARÉ JESUS IHA ITA

REFLEXÃO DOMINGO PASCOA IV/Ano C/2019

Act 13,14.43-52 Rev 7,9.-17 Jo 10,27-30

 

Ita hahú reflexão semana nee ho citação Bíblica husi Evangelho São João semana nee: ”Eu dou-lhes a vida eterna e nunca hão-de perecer e ninguém as arrebatará da minha mão”. Semana nee mos considera hanesan semana da vocação. Iha contexto Igreja Timor Leste, wainhira temi lia fuan vocação, ema hanoin mak seminário, convento, asrama feto, asrama mane no movimento religioso sira. Maibé, tuir contexto Igreja Católica nian, vocação nee refere ba dalan moris nebe cada ema hili. Sai condutor mos vocaçao ida, sai religioso ka clero mos vocação ida, forma família mos vocação ida. Nee significa katak vocação nee refere ba profissão moris nebe cada Cristão Católico ida hili. Oinsa atu hatudu qualidade vocação, nee depende ba oinsa ema ida-idak, família ida-idak eh grupo ida-idak maneja vocação nee ho qualidade tuir roman doutrina Cristão Católica nian. Simples liu ita dehan; comporta didiak moris atu ema seluk haré Jesus Cristo iha ita.

Leitura sira semana nee, condus ita ba hanoin ida katak; ita nobun hetan vocação hodi tuir Jesus. Tuir Jesus iha nee significa, moris tuir saida mak Jesus hanorin eh haruka. Ita forma família karik, oinsa ita sai família Católica nebe exemplar. Ita sai condutor karik, ita hetan vocação atu serviço tuir contrato ou lalika manipula setoran ou subar patrão nia osan. Hili dalan religioso ou padres karik, oinsa atu comprometido ho vida celibat’ario, pureza no santidade basea ba costume religioso Igreja Católica nian.

Nudar Católica nebe simu ona we baptismo, semana nee ita hetan chamada de atenção atu moris iha santidade tuir exigência tempo no mentalidade eh estilo de vida ohin loron nian.

Iha Concílio Vaticano II Papa Paulo VI hatete: Santidade mak vocação ohin loron bai ita nobun. Jesus rasik hatete nanis ona katak; Sai santo hanesan imi nia Aman lalehan Santo.

São João Paulo II fil-fila ona bolu atenção ita nobun li-liu foin sae sira atu saran-an ba serviço Cristo nian. Provas concreta balu husi situação nee mak iha Igreja Católica iha mundo tomak existe movimento juvenil oioin nebe guia foin sae sira ba dalan santidade tuir Cristo nia haruka. Evento boot liu entre movimento sira mak Cruz jovem Internacional nebe cada tinan lao haleu mundo hodi halibur Jovem husi fati-fatin.

          Jesus hateten:”Hau mak Bibi atan diak, laos ema naok ten, laos ema bosok ten, laos ema nebe lao husik hela nia bibi sira. Hau mak bibi atan nebe garante bibi sira nia moris”. Capítulo 10 Evangelho São João nian descreve momos oinsa Jesus nudar Bibi atan diak, Nia mos sente susar no terus nebe Nia bibi sira enfrenta. Até, bibi atan diak nee saran Nia-An ba bibi sira nia moris.

Liu tan Jesus hateten: “Ha’u nia bibi sira rona ha’u lian; ha’u hatene sira, sira mai tuir ha’u. Ha’u fo ba sira moris rohan-laek: sira sei la mate; ema ida sei la bele hasai sira housi ha’u liman. Ha’u nia Aman, ida be haraik sira mai ha’u, nia mak boot liu hotu-hotu. La iha ema ida bele hasai sira housi ha’u Aman nia liman. Ha’u ho ha’u aman, ami ida de’it (Jo 10, 27-30)”.

Hau sente, nee nudar lia murak ida nebe fo matak malirin ba ita nia fuan basá, too horas nee, ita sei bele koalia kona ba Bibi atan diak. mundo ohin loron, dignidade ema nian, ema la tau respeita ona. Iha neba, ema barak sai sujeito ba ema seluk nia interese. Ema balu uza ema seluk sai hanesan instrumento ba nia interece económica hanesan prostituição ou tráfico humano. Ita agradece ba Maromak basá, ita sei bele rona ema ida nebe sai bibi atan diak ba ita nobun; JESUS. Hahi adora ba Maromak basá, iha situação crise nia laran hanesan nee, iha nebe, nação barak enfrenta problema oioin maibé, ita iha Bibi atan diak ida nebe hamaluk nafatin ita iha qualquer situação. Nia mak Nai Jesus Cristo Bom Pastor. Ema dehan a friend in need is a friend indeed; Amigo na dificuldade é o verdadeiro amigo.

Ita nobun nebe simu ona we baptismo iha Igreja Católica, hola parte ona iha knaar salvífica Nai Jesus Cristo. Tan nee, se ita temi eh considera Jesus nudar Bibi atan diak, tuir lolos ita ida-idak hetan bolu atu sai bibi atan diak iha ita ida-idak nia sociedade, iha ita nia família, iha ita nia serviço fatin, iha ita nia comunidade, inclui iha ita nia bairro.

Ita nia inan aman hetan bolu sai bibi atan diak ba oan sira. Nailulik eh madre sira hetan bolu hodi sai bibi atan diak ba sarani sira. Mestre eh professor sira hetan vocação nudar bibi atan diak ba aluno sira.  Matros sira hetan bolu hodi sai bibi atan diak ba sira nia empregado sira. Nunee mos governo hetan bolu atu sai bibi atan diak povo nação ida nian.

Impossível ita sai bibi atan diak iha ita nia knaar se wainhira lalaok nee ita halao la tuir mata dalan nebe Cristo hatudu hela ona. Cristo mak odamatan boot hodi tama ba bibi luhan. Tan nee, ita precisa tama tuir Cristo. Nee significa katak; wainhira ita sai bibi atan la liu tuir Cristo nudar odamatan boot, halao buat ruma la tuir Cristo nia hanorin, então ita nee bibi atan falso nebe so existe hodi destroi ka harahun deit bibi sira nia moris nebe Maromak tau fiar hela ba ita.

Liu husi passagem Evangelho Domingo semana nee, Jesus hakarak convida ita hotu nebe moris simples eh moris riku hodi banati tuir Jesus nia hahalok nudar bibi atan diak. Wainhira ita banati tuir Jesus, significa ita unifica ita-an ho Maromak. Ema hotu precisa sai lider eh bibi atan diak hodi prática hahalok diak sira. Funu hasoru buat aat sira, funu hasoru corrupção hodi lori paz ba ema hotu.

Se ema Católico ida consegue sai lider nebe diak, significa nia consegue sai imagem Maromak nian ba ema seluk. Maromak mak odamatan ba salvação. Hasoru nakukun sira halo ita hetan ksolok ba moris nee. Nai Jesus nia moris hias nudar vocação ida ba ema hotu nebe sai Cristão hodi moris hanesan bibi atan diak ba ema seluk, banati tuir ita nia bibi atan lolos Jesus Cristo. Assim seja e Bem Haja (Ignas). 

Leave a Reply

Your email address will not be published. Required fields are marked *