shadow
Diocese de Dili > NOTÍCIAS > Notícias > SEMINÁRIO MENOR CELEBRA FESTA PARDOEIRA NOSSA SENHORA DE FÁTIMA

SEMINÁRIO MENOR CELEBRA FESTA PARDOEIRA NOSSA SENHORA DE FÁTIMA

DCDD – Loron 13 fulan Maio tinan-tinan Santa Creda celebra Na’in Feto mosu iha rai Fátima ba labarik ki’ik oan na’in 3 (Jacinta, Francisco ho Lúcia). Iha mundo Igreja no Instituição barak mak foti Nossa Senhora de Fátima sai hanesan protetora inclui mos Uma Creda Timor nian Instituição, Paróquias, Quase Paróquias, Estação barak mak foti Nossa Senhora de Fátima nudar mahein. Tan nee Seminário Menor Balide nebe hili Nossa Senhora de Fátima nudar protectora celebra mos Festa boot nee ho presença Dom Basílio do Nascimento bispo de Baucau ninian iha Eucaristia Santa iha Capela Seminário Menor, Balide ih homilia Dom Basílio do Nascimento haktuir katak, “Dom Jaime Garcia Goulart quando hahu uma ida ne’e ou instituição ida ne’e iha 1952, Dom Jaime hasoru problema lubuk ida hanesan iha segundo guerra mundial nian nia foin sai bispo Timor nian liu tinan 2, amululik laiha, quadros atu hato’o fiar nian laiha, ema nebe hakarak atu bele haklaken Maromak nia liafuan laiha, então iha momento ida neba mamuk liu e D. Jaime ho liman mamuk oinsa mak ha’u bele tahan creda hodi hetan ema nebe tulun ha’u bispo haklaken Maromak nia lian. Los duni wainhira comunismo mosu husi 1917, Nossa Senhora mos mosu iha Fátima iha 1917. Ne’e duni, D. Jaime nia ideia nebe ho desafios oi-oin nebe ohin mosu ne’e hau hakarak hari uma ida nebe bele forma ema sarani nebe bele haklaken Maromak nia liafuan, habelar Maromak nia liafuan, fo sasin ba Maromak nia liafuan iha grau oi-oin; hirak nebe hakarak sai amlulik sai amululik no hirak nebe lasai amululik sai netik mestre pelo menos hetan formação diak atu sira bele colabora iha uma creda nia serviço.

Dom Basílio do Nascimento haklaken liu tan katak. “ohin maluk sira liu tinan 67 ita hodi celebra tinan ida ne’e nian, ita haré ba kotuk D. Jaime nia mehi ida ne’e oin buras ka nia mehi ida ne’e namlaektiha ona! E Jesus Cristo ohin iha Evangelho dehan ita  hatene ai-hun liu husi nia fuan e ha’u hanoin sei ita haré Uma Creda Timor ba buat hotu nebe acontece iha Timor nee, ita bele dehan instituição ida naran Seminário Menor de Nossa Senhora de Fátima (SENOFA) nebe hahu kedas iha Lecidere, ba iha Soibada, fila mai Dare, mai fali iha Lahane no agora iha Balide nee, Seminário Menor nee fo nia contribuição barak ba sociadade no ba Uma Creda. Nee duni ita hare katak uma ida ne’e fo nia colaboração no contribuição ba Uma Creda”. Ba imi nebe oras nee moris iha fatin ida nee, hau comvida imi biar sei kiik los duni, maibe halo tok iha imi nia condição ohin loron problema saida-saida mak sociadade Timor foti ba Uma Creda.

Dom Basílio do Nascimento hateten, uma ida ne’e iha atu forma ema e forma ne’e dehan katak hanorin ema hala’o nia moris tuir bala ida, tuir regra ida, tuir forma ida nebe uma creda hanoin katak ema sira nebe aban bain rua hakarak sai amo lulik ne’e dalan atu sira tuir sira nia fomação mak ne’e; disciplina, oração, vida comunitária, buka matenek, creatividade no buat hot-hotu nebe ita boot sira aprende iha uma ida ne’e se ita boot sira la sai amo lulik ba, maibe sai ema sarani nebe diak. Tanba keta haluha problema lubuk ida iha Uma Creda laran antigo Seminarista sira mak foti, problema lubuk ida iha Uma Creda laran laos sarani beikten sira mak foti maibe sarani matenek sira mak foti problemas sira iha uma Creda nia laran. Nee duni ba hirak nebe oras nee hamahan an hela daudaun iha Seminário ida nee hakasan buka identifica tok iha ita nia encontro geral sira nee, desafios saida-saida mak ohin loron iha ita nia Timor Independente ida nee ita nia Uma Creda hetan, tanba ita boot sira mak aban bainrua sai quadros Uma Creda nian; hirak nebe sai padre sai padre nebe diak, matenek, santo no hanourin ema seluk, laos sai padre atu sai kepala desa iha paróquia.

Dom Basílio do Nascimento recomenda ba Seminarista sira katak, ha’u nia lia menon ida mak ne’e; iha tempo no fatin oan ida ne’e ita boot sira buka atu hatan ba Maromak nia bolu tuir dalan nebe ita boot sira hili. Los duni seminário Menor, Seminário Propedêutico no Seminário Maior nia objetivu final ne’e forma ema atu sai amululik. Nee duni buat nebe ba hau importante ba imi iha uma ida nee mak oinsa imi hetan dalan Jesus nia escolante. Ne’e duni joven oan sira seminárista Nossa Senhora de Fátima Balide nian buka forma melhor possível, buka haklean ita boot sira nia conhecimento tanba critério ita sarani nian ne’e dehan bainhira ita lakon buat hot-hotu maka ita manan buat hot-hotu. Troca Jesus Cristo nebe ita laharé ba buat nebe ita kaer hela iha liman, ba buat nebe ita moris lor-loron ne’e la’os fácil, maibe Jesus Cristo nia folin boot iha ita nia vida bainhira ita descobre Jesus Cristo folin saida iha ita nia vida. Então buat ida vocação nee mos hau hakarak hasae an ba Jesus Cristo hanesan amululik tanba hau sente katak Jesus bolu hau atu servi Nia no ba hau nia maun-alin sira. Ha’u remata ho Nossa Senhora nia liafuan ba pastorinho sira katak wainhira Nossa Senhora mosu ba labarik na’in 3 ne’e la hatete buat barak maibe hatete de’it katak imi reza. Reza terço lor-loron, reza rosário lor-loron e terço ou rosário ne’e maka sei salva mundo. (Marta)

Leave a Reply

Your email address will not be published. Required fields are marked *