shadow
Diocese de Dili > NOTÍCIAS > LETURA DIÁRIA > Segunda – Feira, IV Semana da Páscoa (ANO C)

Segunda – Feira, IV Semana da Páscoa (ANO C)

Primeira Leitura                         Act. 11. 1-8

Lia housi livro Apóstolo sira nia hahalok:

Iha loron hirak nebá, Na’i nia escolante no maun-alin sira housi Judeia rona dehan katak ema gentio sira mós simu Na’i Maromak Nia futar lia. Wainhira Pedro sa’e ba Jerusalém, maun-alin sira nebé simu ona circuncisão, haksesuk malu ho nia dehan: “Ó ba ema sira nebé seida’uk simu circuncisão ne’e nia uma hodi han ho sira”. Pedro hahu dehan lolós ba sira atu sira bele hatene di’ak liu tan buat hotu: “Wainhira ha’u halo hela oração iha rai Jope, housi mehi ida, ha’u haré buat ida hanesan hena-mesa tun housi Lalehan mai; metin hela housi lidun háat, mai to’o iha ha’u nia oin. Fihir didiak tiha nia, ha’u haré balada sira ain háat, balada siak-ten sira, samea no manu sira nebé semo iha áas. Tuir mai, ha’u rona lian ida be dehan mai ha’u: ‘hamriik ba, Pedro; oho no han bá’! maibé ha’u hatan : ‘La’e, Na’i ha’u sei la han buat nebé foer’! Hafoin, ha’u rona tan, ba dala rua, lian ida housi Lalehan mai: ‘Sasan nebé Na’i Maromak hamós ona, ó keta hanaran nia fo’er. Buat ne’e mosu dala tolu, tui-tuir malu; hafoin fila hikas ba Lalehan.

Iha oras ne’e dunim ema na’in tolu housi Cesaréia mosu mai ha’u iha uma nebé ami hela bá. Nune’e Espírito Santo leno ha’u laran, atu ha’u ba kedas ho sira. Maun-alin na’in nen mós ba hamutuk ho ha’u. Ami tama iha ema ne’e nia uma. Nia haktuir mai ami. Oinsá Anjo mosu iha nia uma hodi dehan: ‘Haruka ema ba bolu Simão nebé hanaran Pedro. Nia sei dehan ba ó, oinsá ó atu simu maksoyn; nune’e mós ó nia familia tomak’.

Wainhira ha’u hahu ko’alia, Espírito Santo tun ba sira leten, hanesan houri uluk tun mai ita leten. Nune’e, ha’u hanoin hikas Na’i nia liafuan nebé dehan: “João sarani ho wé, maibé imi sei simu baptismo ho Espírito Santo”. Na’i haraik karik kmanek ba sira hanesan ba ita, tan sira fiar iha Na’i Jesus Cristo, ha’u ne’e sé lós atu atu hasouru Maromak Nia hakaran?’ Rona liu tiha lia hirak ne’e, sira haksolok  hodi fó glória ba Maromak dehan: “Oras ne’e, Na’i Maromak haraik mós ema gentio sira atu hakribi sira salan hodi bele tama iha moris foun”.

Maromak Futar Lia.

 

Salmo Responsorial                                                                                                      Sal. 41(42). 2-3; 42(43). 3-4 (R. Sal. 51. 3ª)

Refrão : Ha’u klamar hamrook ba Maromak moris!!! Repete-se

Ou           Aleluia, Aleluia!!

Hanesan rusa buka wé lolon,

Nune’e mós ha’u klamar buka Ita, Na’i.

Ha’u hamrook ba Maromak moris;

Wainhira ha’u bele ba Nia futar oin. Refrão

 

Na’i, haruka Ita naroman no lialós

Atu sira bele sai ha’u nia mata-dalan,

Hodi lori ha’u ba Ita futar oin;

Ba fatin Santo Ita hôrik ba. Refrão

 

Ha’u sei la’o ba Maromak Nia altar;

Maromak ha’u haksolok.

Iha ne’e ha’u sei hananu ba Na’i,

Ha’u sei agradece ha’u Maromak. Refrão

 

Aclamação                                                                                                                                                                                           Jo. 10. 14

Refrão : Aleluia, Aleluia!! Repete-se

Na’i lia tun: “Ha’u mak Bibi-Atan lolós; Ha’u hatene bibi sira nebé

Ha’u nian! Bibi sira nebé Ha’u nian hatene Ha’u. Refrão

 

Evangelho                                                                                                                                                                                        Jo. 10. 1-10

Na’i Jesus Cristo nia Evangelho nu’udar São João haktuir:

Iha tempo nebá, Jesus hateten nune’e: “Tebes, Ha’u dehan ba imi: Ida nebé la tama housi lutu-matan maibé tama housi fatin seluk, ema ne’e, na’ukteen ida. Maibé ida nebé tama housi lutu-matan, nia mak bibi-na’in. Nia bolu bibi sira hodi sira naran, hodi lori sira ba liur. Hafoin, hasai hotu tiha nia bibi sira, nia sei ba uluk, loke dalan; bibi sira sei tuir nia, tan hatene nia lian. Maibé, bibi sira sei la tuir ema leet ida; sei halai housi nia, tan sira la hatene ema leet nia lian”. Ne’e, lia nebé Jesus tanesan ba sira nebé rona; maibé sira la hatene Jesus ko’alia kona ba sá. Jesus dehan tan ba sira: “Tebes, Ha’u dehan tebes ba imi: Ha’u ne’e bibi sira nia lutu-matan. Ema hotu nebé mai uluk liu Ha’u, sira ne’e mesak na’ukteen no ahu-na’in; maibé bibi sira la rona sira lian. Ha’u lutu-matan. Ida nebé liu housi Ha’u, sei hetan maksoyn; nia sei tama, sei sai hodi hetan du’ut matak. Ema na’ukteen mai atu na’uk, atu harahun de’it. Ha’u mai atu ema hetan moris, hodi di’ak liu tan”.

Lia Maksoyn.

Ou

Evangelho                                                                                                                                                                                      Jo. 10. 11-18

Na’i Jesus Cristo nia Evangelho nu’udar São João haktuir:

Iha tempo neba, Jesus lia tun nune’e: “Ha’u mak Bibi-Atan lolós! Bibi-Atan di’ak mate ba nia bibi sira. Ema nebé la’os bibi-atan, la’os bibi-na’in; haré asu-fuik mai, halai, so’e hela bibi sira nebé asu-fuik lori halo namkari; tan nia ema contrato, la tau matan ba bibi sira. Ha’u mak Bibi-Atan lolós; Ha’u hatene bibi sira nebé Ha’u nian! Bibi sira nebé Ha’u nian hatene Ha’u! Nu’udar Aman Maromak hatene Ha’u, nune’e mós Ha’u hatene Aman Maromak. Ha’u fó Ha’u An ba mate tan Ha’u Nia bibi sira. Ha’u sei iha tan bibi seluk; sira lada’uk tama iha bibi-luhan ida ne’e. Ha’u sei dada mós sira mai. Sira sei rona Ha’u lian! Nune’e, sei sai bibi-luhan ida de’it; Bibi-Atan ida de’it.

Aman Maromak hadomi Ha’u tan ida ne’e: Ha’u fó Ha’u Nia moris, atu simu fali Ha’u Nia moris; Ha’u rasik mak bele saran Ha’u Nia moris ba mate. Ha’u de’it mak bele saran, hafoin simu hi’as fali Ha’u Nia moris. Ida ne’e mak lia Ha’u simu housi Aman Maromak!”

Lia Maksoyn.

 

Leitura 13 de Maio

Primeira Leitura                                                                                                                                                                             Ap. 1. 1-5a

Lia housi livro Apocalipse:

Ha’u, João, hare lalehan foun ida, rai foun ida, tan lalehan uluk nian no rai uluk nian lakon tiha ona. Tasi mós lakon tiha ona. Hafoin, ha’u hare cidade santa, katak Jerusalé foun, tun daudaun mai housi lalehan. Tun mai housi Maromak futar oin, furak no kmanek, nu’udar fetora ida hafutar-an hodi simu nia la’en. Housi Maromak Nia trono, ha’u rona lia maka’as ida, dehan: “Ne’e, Maromak Nia uma fatin atu hela iha ema sira leet. Maromak sei tur iha ema sira leet; ema sira sei moris nu’udar Maromak Nia povo; Maromak rasik sei hela nu’udar sira nia Maromak. Na’i Maromak sei hamaran sira nia mata-wen; mate sei lakon, ema sei la hatais tan lutu; ema sei la halerik tan, sei la terus tan. Sasan uluk nian sei lakon hotu tiha ona”. Ida be tur hela iha trono, lia tun dehan: “Ha’u sei halo foun sasan hot-hotu”.

Maromak Futar Lia.

 

Salmo Responsorial                                                                                                            Judite. 13. 18bc, 19-20ª, 20c (R. 15. 10d)

Refrão : Ita mak ami povo nia di’ak!!! Repete-se

Ou            Aleluia, Aleluia!!

Oan feto, ó simu bensa housi Maromak leten áas,

Liu fali feto hot-hotu rai-klaran nian;

No rahun-di’ak ba Na’i Maromak,

Be halo lalehan no rai. Refrão

 

Ema tomak rai-klaran

Sei la haluha Ita laran metin;

Sira sei hanoin nafatin Maromak Nia kbiit;

Nune’e, Maromak sei foti ó nafatin ba nafatin. Refrão

 

Ita la karak Ita moris hodi haraik-an iha ami oin,

Maibé, Ita hamós ami salan ho Ita lialós

Iha ami Maromak Nia futar oin. Refrão

 

Aclamação                                                                                                                                                                                             Lc. 1. 45

Refrão : Aleluia, Aleluia!! Repete-se

Rahun di’ak ba Ita, oh! Virgem Maria, tanba Ita fiar katak

Lia nebé Na’i hateten sei sai tuir lós duni. Refrão

 

Evangelho                                                                                                                                                                                     Jo. 19. 25-27

Na’i Jesus Cristo nia Evangelho nu’udar São João haktuir:

Iha tempo nebá, Jesus Nia Inan, nia Inan nia alin Maria, Cléofas nia féen, ho tan Maria Madalena hamriik besik Jesus Nia Cruz. Haré tiha nia Inan ho escolante nebé Nia hadomi iha Nia sorin, Jesus lia tun ba Nia Inan: “Na’in feto, ó nia oan mak ida ne’e!” Hafoin Nia lia tun ba escolante: “Ó nia inan mak ida ne’e!” No oras neba kedas, escolante ne’e simu Maria iha nia uma.

Lia Maksoyn.

Leave a Reply

Your email address will not be published. Required fields are marked *