shadow
Diocese de Dili > NOTÍCIAS > LETURA DIÁRIA > Terça-Feira, IV Semana da Páscoa (ANO C)

Terça-Feira, IV Semana da Páscoa (ANO C)

São Matias, Apóstolo Festa

 

Primeira Leitura                           Act. 1. 15-17, 20-26

Lia  housi livro Apóstolo sira nia hahalok:

Iha loron hirak neba, halibur hamutuk ema atus ida ruanulu. Pedro hamriik iha maun-alin sira klaran dehan dehan: “Maun-alin sira, ita hatene katak hotu nebé hakerek iha Escritura sei halo tuir lolós. Iha Escritura, Espírito Santo ko’alia nanis ona housi David nia ibun, kona ba Judas nebé ikus mai sai nu’udar mata dalan ba sira nebé káer Jesus. Nia uluk hela ho ita, no hola parte mós ministério ne’e. Hakerek nanis ona iha livro salmo sira: “Nia hôrik fatin sei mamuk, ema ida sei la hela iha nebá”. Tuir teni: “ida seluk simu knaar”. Iha ema be la’o ho ita iha tempo hotu nebé Na’i Jesus sei iha ita leet, housi loron nebé, Nia simu baptismo housi João ba to’o loron be ema foti Nia ba áas. Ne’e duni, sira ida sei sai hamutuk ho ita nu’udar sasin kona ba Nia moris hi’as”. Nune’e, sira lori ema na’in rua mai: José be hanaran Barsabás, nebé simu nanis naran Justo, no Matias. Hafoin, sira harohan nune’e; “Na’i, Itaboot be hatene ema hotu nia fuan, hatudu mai ami, housi sira rua ne’e ida nebé mak Ita hili, atu bele hola parte iha Apóstolo sira nia ministério, fatin nebé Judas husik hela, be hela nanis ona ba nia. Hafoin, sira dada sorte atu monu ba sé. Sorte monu tiha ba Matias. Nune’e Matias halibur-an hamutuk ba Apóstolo sira na’in sanulu resin ida.

Maromak Futar Lia.

 

Salmo Responsorial                                                                                                             Sal. 112(113). 1-2, 3-4, 5-6, 7-8 (R. cf. 8)

Refrão : Na’i halo nia tur hamutuk ho Nia povo nia ulun sira!!! Repete-se

Ou           Aleluia!

Na’i nia atan sira hahi

Hahi Na’i nia naran.

Rahun di’ak ba Na’i nia naran,

Ohin no ba oin nafatin. Refrão

 

Housi dader to’o kalan,

Hahi Na’i nia naran.

Na’i ukun povo hot-hotu;

Nia glória iha lalehan leten áas ba. Refrão

 

Sé mak bele tanesan ho Na’i, ita Maromak,

Nebé Nia kadunan iha leten áas ba,

Nebé hali’is An housi leten be áas,

Ho ulun sira nia povo nian. Refrão

 

Aclamação                                                                                                                                                                                           Jo. 15. 16

Refrão : Aleluia, Aleluia!!! Repete-se

La’os imi mak hili Ha’u, Ha’u mak hili imi hodi haruka imi ba

Atu bele fó fuan no imi nia fuan bele hela ba nafatin. Na’i dehan. Refrão

 

Evangelho                                                                                                                                                                                        Jo. 15. 9-17

Na’i Jesus Cristo nia Evangelho nu’udar São João haktuir:

Iha tempo neba, Jesus lia tun ba escolante sira dehan: “Nu’udar Aman hadomi Ha’u, nune’e mós Ha’u hadomi imi; hela iha Ha’u nia domin ba. Imi halo tuir karik Ha’u nia ukunfuan sira, imi sei hela iha Ha’u nia domin nu’udar Ha’u mós halo tuir Ha’u Aman nia ukunfuan sira no hela iha Nia domin. Ha’u dehan sai lia hirak ne’e ba imi atu Ha’u nia ksolok hela iha imi no imi nia ksolok sai lolós. Ha’u nia ukunfuan mak ida ne’e: imi hadomi malu nu’udar Ha’u hadomi imi. Ema ida la bele hadomi liu fali ema nebé saran nia moris tan nia belun sira. Imi Ha’u nia belun wainhira imi halo tuir buat nebé Ha’u haruka ba imi. Ha’u la bolu ona imi atan, basá atan la hatene nia na’in halo sá; maibé Ha’u bolu imi belun, tan Ha’u fó hatene ona ba imi lia hotu nebé Ha’u rona housi Aman. La’os imi mak hili Ha’u, maibé Ha’u mak hili imi, hodi haruka imi na ba atu bele fó fuan, no imi nia fuan hela ba nafatin. Nune’e, buat hotu nebé imi husu ba Aman hodi Ha’u naran, Nia sei haraik ba imi. Ha’u haruka imi: hadomo malu.

Lia Maksoyn.

 

Ou

 

Primeira Leitura                                                                                                                                                                       Act. 11. 19-26

Lia  housi livro Apóstolo sira nia hahalok:

Iha loron hirak neba, maun-alin sira nebé halai namkari tan hahalok nebé ema áat sira halo ba Estêvão, sira ba to’o iha Fenícia, Chipre no Antioquia. Sira la haklaken Na’i Maromak Nia liafuan ba ema seluk, se la’e, ba judeu sira de’it. Maibé, iha ema balu nebé housi Chipre no Cirene, wainhira sira to’o iha Antioquia, sira haklaken mós Na’i Jesus Cristo Nia doutrina ba grego sira. Maromak Nia kbiit no Nia tulun la’o hamutuk nafatin ho sira, nune’e ema wa’in liu mós mak simu fiar, hodi tuir Na’i nia dalan.

Buat di’ak hirak ne’e hotu, la kle’ur de’it, to’o iha Kreda nia tilun iha Jerusalém. Nune’e housi Jerusalém haruka Barnabé ba Antioquia. Wainhira nia to’o, nia haré Na’i Maromak nia kmanek nebé halo iha neba. Ho ksolok wa’in, nia hanourin sira hotu fiar iha Na’i ho fuan no laran tomak. Tan Bernabé ema ida nebé di’ak teb-tebes no Espírito Santo hakonu iha nia, nia iha fiar maka’as. Ema wa’in lós mak tuir Na’i nia doutrina.

Barnabé ba iha Tarso, buka Saulo, hetan tiha no lori nia ba Antioquia. Sira hela hamutuk iha Kreda ne’e iha tinan ida nia laran; Sira hanourin ema wa’in tebes. Iha Antioquia mak fó ba dala uluk, naran “Sarani”, ba escolante sira.

Maromak Futar Lia.

 

Salmo Responsorial                                                                                                            Sal. 86(87). 1-3, 4-5, 6-7 (R. Sal. 116. 1ª)

Refrão : Ema hotu hahi Na’i ba!!! Repete-se

Ou           Aleluia!

Na’i hadomi cidade be hari iha foho santo;

Nia hakarak tebes Sião nia odamatan

Liu fali Jacob nia uma sira.

Ne’e mak hahalok kmanek ida ba ó,

Maromak Nia cidade. Refrão

 

Ha’u sei conta Egypto no Babilónia

Iha sira leet be hatene Ha’u;

Filistea, Tiro no Etiópia mesak ó nia oan hotu.

Sira sei hanaran Sião, inan basá sira hotu moris iha neba;

Na’i be Áas liu mak hari tiha. Refrão

 

Na’i sei hakerek iha povo nia livro;

“Ne’e mak Ha’u oan sira, sira moris iha neba”.

Iha ksolok nia laran, sira hotu sei halo iha ó

Sira hôrik fatin. Refrão

 

Aclamação                                                                                                                                                                                           Jo. 10. 27

Refrão : Aleluia, Aleluia!!! Repete-se

Na’i lia tun: “Ha’u Nia bibi sira rona ha’u lian;

Ha’u hatene sira, sira mai tuir Ha’u”. Refrão

 

Evangelho                                                                                                                                                                                     Jo. 10. 22-30

Na’i Jesus Cristo nia Evangelho nu’udar São João haktuir

Iha tempo neba, iha Jerusalém hala’o festa Dedicação nian. Iha tempo udan, Jesus la’o hela iha templo nia laran no iha odamatan boot Salomão nian. Nune’e, judeu sira hale’u tiha Jesus hodi husu ba Nia: “Ó sei halo ami moris ho neon namlele to’o wainhira lós? Ó mak Messias karik, ne’e sá, dehan lós ona mai ami”!

Jesus hatan ba sira: “Ha’u dehan ona ba imi, maibé imi la fiar! Buat hotu nebé Ha’u halo hodi Ha’u Aman Nia naran mak fó sasin ba Ha’u. imi la fiar iha Ha’u tanba imi la mai housi Ha’u bibi sira. Ha’u Nia bibi sira rona ha’u lian; Ha’u hatene sira, sira mai tuir Ha’u. Ha’u fó ba sira moris rohan laek. Sira sei la mate; ema ida sei la bele hasai sira housi Ha’u liman. Ha’u Nia Aman, Ida be haraik sira mai Ha’u, Nia mak boot liu hot-hotu. La iha ema id abele hasai sira housi Ha’u Aman Nia liman. Ha’u ho Ha’u Aman, Ami ida de’it.

Lia Maksoyn.

Leave a Reply

Your email address will not be published. Required fields are marked *