shadow
Diocese de Dili > NOTÍCIAS > REFLEXÃO > HADOMI PARTIDO LIU MAROMAK?

HADOMI PARTIDO LIU MAROMAK?

Reflexão V Domingo Tempo Páscoa, Ano C 2019

 

               Jesus dehan:“amai-vos uns aos outros, como Eu vos amei”. Temos consciência de que por detrás do nosso trabalho e do nosso testemunho está Deus. Evangelho Domingo semana nee, Jesus husik hela mensagem (LiaMenon) kmanek ida hanesan warisan (herança) eh riku soin boot ba escolante sira (ita nobun) nebe fiar no tuir Jesus Cristo Ha’u fo ba imi ukun foun ida; “imi sei hadomi malu. Tebes, nu’udar Ha’u hadomi imi, nunee mos imi sei hadomi malu. ImI hadomi malu karik, ne’e sinal ida atu ema hotu-hotu hatene katak imi Ha’u nia Escolante duni”.

               Iha Quinta feira Santa (Última ceia) mak primeiro momento instituição Eucaristia nian. São João evangelista relata Jesus nia afirmação nebe tenik; entre ida husi escolante sira sei saran Jesus ba ema aat sira liman (cf Jo. 13,21-30). Relação diak entre Jesus ho escolante sira nebe durante altura neba lao diak, teki-tekil muda derepente tan deit hetan perturbação husi força nakukun nian (traição de Judas).

               Jesus nia escolante sira nudar grupo ida nebe la sees husi fraquesa ema nian (fraquesa humana). Escolante sira confusão ho Jesus nia liafuan kona ba ema nebe sei sai traidor. Sira hateke ba malu hodi husu se los mak ema nebe atu saran Jesus nee. Pedro husu João nudar escolante nebe besik liu ba Jesus hodi hatene kona ba ema nebe atu saran Jesus. Jesus hatan sira nia dúvida hodi confirma katak ema nebe habokon pão ho tua hamutuk ho Jesus mak sei saran Jesus. Ema nee mak Judas Iscariotes nebe simu pão husi Jesus hodi hoban ba calis.

               Haktuir mos iha Evangelho katak; iha kalan nee duni, demónio tama Judas nia laran hodi atrai Jesus (Jo. 13,27). Evangelista São João liu tan relata katak Jesus consciente ona ho Judas nia lalaok. Tanba nee mak Jesus haruka Judas atu sai ona hodi realiza saida mak nia plano ona. Maske nunee, escolante sira la consciente ho Jesus nia gesto nee. Escolante sira hanoin katak Jesus mak hakarak haruka duni apóstolo tesoreiro nee hodi ba sosa buat ruma.

               Nota ruma kona ba Judas mak; nia hetan tentação husi demónio iha momento Jesus fo pão moris ba nia. Nee significa katak acontecemento nee mosu iha momento uma nain fo ai han ba nia convidado sira. Too altura neba, Jesus sei considera Judas nudar membro família hanesan mos escolante sira seluk. Maibé, iha momento han kalan ikus nee mak Judas simu demónio nia convite hodi atrai Jesus.

               Ita nobun mos dala barak atrai Maromak iha momento santo sira hanesan atende telefone iha missa laran, gasta tempo ba telefone barak liu do que gasta tempo ba Reza. Até que la iha tempo ba Maromak iha moris lorloron tan deit razão serviço. Ita brani sosa pulsa 10 dolar too 100 dolar hodi activa pacote Internet maibé, fo esmola 0.50 to 1.00 dollar deit ita murmura los.

               Iha toos oliveira Jesus bolu atenção ba apostolo sira katak espírito forte maibé ita nia isin fraco tebes hodi enfrenta tentação sira. Demónio sente haksolok wainhira ita nia vontade atu besik ba Maromak mihis. Exemplo kiik mak; se ita atu reza deit Ami Aman ita sente kleur demais, momento sira hanesan fo ksolok ba demóniao tan ema bele halo tuir ninia vontade. Wainhira ita la kaer ukun ita hanoin no hakarak tebes atu halo diak ba nação, contribui ba estado, defende bem comum maibé, wainhira hetan tiha cargo, ita haluha rai, kan ten mak mosu uluk hodi buka uluk interece privadu ou partidário alias ASAL BAPAK SENANG, interece bem comum depois mak haré.

               Exemplo concreto ba analogia ida nee, ita bele aprende iha hahalok Judas Isacariotes nudar Evangelho Domingo semana nee haktuir. Ohin loron, lalaok ida nee buras tebes iha Timor oan sira nebe Católico maibé, hahalok hanesan ema gentio. Interece política halo sarani hanoin la hanesan, lider político sira lakon ona espírito diálogo hodi tuur hamutuk hanoin Timor Leste sei sai oinsa iha futuro. Militante partido sira hadomi liu partido do que hadomi malu nudar Timor Oan. Media social (Facebook) meio diak liu atu ita lekar ita nia emoção sira hodi haluha katak ita nia qualidade laos sukat husi saida mak ita publica iha media social maibé saida mak ita halo mak bele prova ita nia caracter loloos.

               Político balu defende partido mate-an los hodi halo contente liderança partido atu sira assegura cargo alias ASAL BAPAK SENANG, então, hau tenke defende partido nee mate-an maske hau nia consicência revolta. Ema husi partido seluk mos mesak Timor Oan (mesak Católico) nebe hanoin mos oinsa lori Timor Leste sai nabilan. Buat nebe sai problema mak wainhira ema assume cargo político ruma, aproveita oinsa hetan lucro ba grupo, partidário, família do que ba bem comum. Goza regalias husi estado ba orgulho pessoal, wainhira detecta comete crime corrupção, buka dalan oi-oin hodi sees husi justiça, tanat indulto ba Prsidente da República, hakbesik derepente ba Igreja hodi buka simpatia.

               Ema trata malu husi Media Social (Facebook) tan deit denfende partido, ema haluha atu defende malu nudar Timor oan. Infelizmente lider político ida rua mos mosu iha media social hodi publica sira nia posição política nebe barak ka oitoan contribui mos ba degradação moral iha sociedade. Ninia militante defende ninia posição política, militante husi grupo seluk tolok hotar too lakon respeito ba lider nacional sira nebe merece respeito ema hotu nian. Pergunta mak nee, media social fo solução ba problema nacional eh keta media social oho ita nia sentido estado, sentido diálogo (nahe biti-boot)?.

               O Senhor Jesus afirma que dá um novo mandamento a seus discípulos, isto é, que se amem mutuamente: Eu vos dou um novo mandamento: amai-vos uns aos outros (Jo 13,34). Jesus wainhira hameno atu escolante sira hadomi malu, sira tuur hamutuk iha fatin ida. Jesus la hatoo mensagem husi media social hanesan Facebook, whatsapp nem Email maibé, face to face. Ambiente amigável mak bele loke ema nia neon atu hatoo hanoin positivo ba malu.  Ema tuur hamutuk hodi tau hanoin ba bem comum, nee parte ida husi expressão hadomi malu hanesan Maromak hadomi ita.

               Tecnologia tuir nia natureza atu facilita ita, vibiliza processo comunicação, facilita processo diálogo maibé infelizmente tecnologia comunicação lori desastre boot ida mai iha sociedade Timorense tanba ita utiliza la tuir nia dalan. Em vez de liu husi meios comunicação halo ema fácil halo diálogo maibé, hetok ema concorre buka popularidade, duun malu naok ten, defama malu, halo promoção política hodi hetok lakon tiha sentido respeito. Ho expressão seluk ita dehan; tecnologia halo; YANG JAUH SEMAKIN DEKAT….YANG DEKAT SEMAKIN JAUH. Tanba nee, nudar Cristão Católico, ita precisa matan moris-neon nain hodi hatene lee no aprende husi situação hirak nebe mai ataca ita nia fiar.

                Lalaok hirak nee, indirectamente hakarak halakon ita nia princípio fundamental nebe Jesus rasik hatete iha momento han kalan ikus dehan: Hau fo ba imi mandamento foun, imi sei hadomi malu nudar Hau hadomi imi. Jesus nia ordem nee sai hanesan princípio fundamental atu oinsa fo perdão ba ema sira nebe halo aat ita. Princípio ida nee mos contempla ona iha oração popular Ami Aman nebe Nai Jesus rasik hanorin; “(…) haraik perdua mai ami sala, nudar ami fo perdua ba ema nebe halo aat mai ami”.

               Iha relato São João evangelista kona ba Judas Iscariotes nee, hakarak loke ita nia hanoin ida katak; diabo mos dalaruma bele uza maneira Divina nian hodi hamonu ita tama ba nia diabo laço. Los duni Maromak uza forma Maromak nian hodi realiza salvação iha mundo maibé, ema Cristão Católico ida mos precisa hatene katak diabo mos uza meio humano hodi hamonu Cristão ida ba pecado.

               Relato continuação husi Evanegelho São João hatete katak; depois de Judas husik tiha sira (Jo 13,31), nee significa katak; diabo tama ona iha Judas nia laran. Nunee wainhira Jesus koalia kona ba Glória nebe mane maksoin sei simu. Judas mos la consegue rona Mandamento foun nebe Jesus tatoli katak;”imi sei hadomi malu hanesan Hau hadomi imi”. Ita matan naklosu ba bem material halo ita lakon sentido humano. Matéria importante liu ema. Ema bele buak dalan halakon malu eh hamonu malu tan deit interece material até interece poder. Wainhira ema arisca moris hodi defende bem comum, ida nee mak extra ordinário.

               Iha visão espiritual Evangelista São João nian, fo convicção ida katak; lia fuan hotu nebe Jesus hatete ba sira desde Judas husik hela sira, nee lia fuan nebe la contem tentação ruma. Tanba nee mak sira rona ho hakmatek wainhira Jesus hanorin dehan;”imi sei hadomi malu nudar Hau hadomi imi”. Nudar escolante nebe besik liu ba Jesus, certamente, João hatene diak liu katak; Jesus hadomi tebes nia escolante sira hotu hodi haruka sira hadomi malu nudar Jesus hadomi sira.

               Implicação husi lia fuan nee hakarak hatete deit; horas nee, ema hotu nebe simu ona we baptismo precisa banati tuir Jesus nia lai fuan nebe dehan; “imi sei hadomi malu nudar Hau hadomi imi”. Na realidade, iha Timor, liliu iha cidade Dili, acontece ódio no vingança iha bairri sira. Rama ambon perturba ema barak nia vida segurança. Grupo arte marciasi sira hahu sadik malu no hana malu fali ona iha fatin fatin. Membro arte marciai pamer farda iha faceboo. Se mak ema hirak nee? Sira mak, Timor oan sira nebe simu ona we baptismo nudar Cristão Católico ou Timor oan husi crença/religião seluk.  

               Iha história mundo nian, ita aprende no rona katak; ema matenek sira molok atu mate, sempre herda (mewariskan/fo hela) sira nia matenek no lia menon balu ba escolante sira. Nee mak liman rohan eh força (coragem) atu escolante sira actua serviço foun nee ho aten brani. Kbit eh matenek hanesan mos mak Jesus husik hela ba ita hotu nudar nia escolante; imi sei hadomi malu nudar Hau hadomi imi.

               Iha qualquer situação, lia fun domin mak bele halo ema loke fuan ba hahalok nebe diak.  Kbiit eh lia menon nebe Jesus husik hela ba nia escolante sira mak; hakarak hanorin oinsa bele endereça (mengarahakan) sira nia fuan ba dalan Maromak nian. Conhece Maromak nudar Aman nebe sempre horik hamutuk ho Oan sira. Maromak nudar Aman nebe sempre lao iha oan sira nia sorin (Moris lorloron). Jesus hakarak hanorin katak; Aman nia domin nee concretisa iha oinsa oan sira hadomi malu hanesan, Nia hadomi sira (cf Jo 15, 17). Lider Timor Leste precisa tauhanoin hamutuk hodi desenvlov Timor Leste ida nabilan iha futuro. Husik ideologia política ba kotuk atu ita hatene hadomi no hatene hadomi rai Timor Leste. Temos consciência de que por detrás do nosso trabalho e do nosso testemunho está Deus. Assim seja e Bem Haja (Ignas).

Leave a Reply

Your email address will not be published. Required fields are marked *