shadow
Diocese de Dili > NOTÍCIAS > OPINIÃO > HISTÓRIA RELÍQUIA ST. ANTÓNIO IHA FATUBERLU-TIMOR-LESTE

HISTÓRIA RELÍQUIA ST. ANTÓNIO IHA FATUBERLU-TIMOR-LESTE

               Bainhira ita koalia kona ba relÍquia St. António, perguntas barak mak mosu. Saida mak relíquia? Tamba saida mak relíquia St. António bele tama iha rai Timor-Leste, liu-liu bele rai iha rai doben Fatuberliu?

               Primeiro, saida mak relíquia? Relíquia significa katak parte housi isin lolon ou restos mortais housi Santo-santa sira no housi nia roupa ou sasan sira no sasan nebé iha relação ho Santo-santa sira. Iha Igreja Católica halo ona classificação tolu kona-ba relíquia sira ne’e. Classificação ida; ‘relíquia housi Santo santa sira nia isin lolon ou restos mortais hanesan, ruin, nehan, fuk, liman no seluk-seluk tan’. Classificação rua; ‘relíquia housi sasan nebé Santo-santa sira uza hanesan roupa, livro no seluk-seluk tan’. Classificação tolu; ‘relíquia housi sasan nebé contacto ho Santo-Santo sira hanesan uma, roupa misa no seluk-seluk tan’. Iha mundo tomak, relíquia barak mak husi classificação rua no tolu, nebé ema sarani sira respeito los tamba sira sei sente Santo-santa sira nia presença.

               Tuir mai mosu pergunta ida; Relíquia St. António iha Fatuberliu-Timor-Leste, tama iha classificação hira? Relíquia St. António iha Fatuberliu tama iha classificação ida; tamba mai husi St. António nia liman fuan karuk. Iha mundo tomak, relíquia autêntica nebé tama iha clissificação ida hanesan relíquia St. António, hetan iha fatin tolu de’it.

Primeiro, iha Pádua. Iha ne’eba restos mortais St. António isin tomak.

              Segundo iha Lisboa, Portugal. Iha ne’eba restos mortais ruin liman kwanan St. António nian. Terseiro, iha Timor-leste. Iha ne’e fahe husi Lisboa, St. António nia ruin liman fuan ikun. (hatene klaro buat ne’e bele haree iha documentos no declaração nebé ami mos tau iha livro ne’e)

               Segundo, halo nu’usa maka relíquia St. António bele tama iha Timor-Leste no hela iha rai Fatuberliu? Hatan ba pergunta ne’e, ami bele hateten katak, presença relíquia St. António iha Timor-Leste, tamba iha relação metin ho presença Frei Franciscano (OFM) iha Timor-Leste.

               Ordem Frades Minores ka ida be conhecido ho naran OFM, mak Ordem ida husi Padre no Bruder ne’ebé harii husi São Francisco de Assis quase século XII. Padre no bruder sira ne’ebé iha OFM nia laran conhece ho naran bolu Irmãos Minores ka Franciscano sira. Franciscano sira nia servisu tuir modum particular servi ema ki’ik no sira ne’ebé ema la/nunca tau atensaun. Obra sira Franciscano nian maioria iha area ka fatin sira ne’ebé rural ka area sira ne’ebé antes ema la tau atensaun. Além de obra ba sarani sira no area rural, OFM mós hetan fiar husi Igreja Roma hodi responsabiliza ka tau matan no hadia ka kuidadu Igreja iha Rai Santa iha Israel.

               Ordem Frades Minores tama mai Timor-Leste liu husi Indonezia. Iha tinan 1987 tempo ne’ebé Timor-Leste sei tama ba iha Indonezia, Dom Carlos Filipe Ximenes Belo, SDB. Husu ba OFM atu hala’o nia missão iha Timor-Leste. Lia husuk ne’e simu ho entusiasmo tebes husi OFM ho nune’e mak iha tinan ne’eba kedas delega Frades nain tolu hodi mai hahu sira-nia obra iha Timor-Leste. Bispo fó fatin ba servisu missão Franciscano nian. Franciscano nain rua mak mai primeiro iha Timor-Leste naran Padre Andreas Hamma, OFM, no Bruder Willy Kotten, OFM. Sira na’in rua (2), primeiro mai hela iha Same atu bele estuda lian tetum. Depois mai fali ida naran Bruder Stanis, OFM. Depois iha Same, Amo Rafael dos Santos (falc), Padre Pároco da Paróquia Same maka, lori sira mai hela iha rai Dotik, atraves ba pedido housi Sr. Tito Lopes.

               Iha tempo ne’ebá Sr. Tito Lopes, nu’udar Chefe do Posto Administrativo Fatuberliu mos husu ba frei sira nebé hela iha Dotik atu bele ajuda hare no tau matan ba escola iha Fatuberliu, tamba ne’e Sr. Tito mos oferece ninia uma fatin Ue-Quiar atu sira bele hela. Tuir fali mai, Padre Andre, OFM mos simu knaar ida atu sai Pároco Alas. Tinan 1992, Padre Bonaventura Satuan, OFM mós mai no Bruder Willy Kotten,OFM, kaer knaar ba projecto halo Convento foun ho naran “Tiga Sahabat” (Komunitas Fransiskanu Fatuberliu).

               Iha tinan 1993, Padre Yoseph Tote, OFM mai atu bele hela hamutuk ho frei sira iha Convento “Tiga Sahabat”, nia mos hetan knaar ida sai Diretor Escola São Francisco de Assisi Fatuberliu. Iha tinan 1994, Padre Kornelis Keyrans, OFM mai iha Timor-Leste atu bele tau matan ba sarani sira iha paróquia Alas. Housi tinan 1995-1996, Estação Missionária sai nu’udar QUASE PARÓQUIA no Padre Andre, OFM mos halo dadaun preparação ba estação ne’e atu sai paróquia.

               Iha loron 4 fulan Outubru tinan 1996, Amo Bispo Diocese Dili, Dom Carlos Filipe Belo, SDB halo inauguração ba Uma-Kreda iha Fatuberliu no legalmente considera nu’udar paróquia foun padroeiro ba São Francisco de Assis. Paróquia ne’e naran Paróquia São Francisco de Assis-Fatuberliu. Nu’udar Pároco no superior dahuluk ba paróquia ne’e Padre Andre Hamma, OFM hodi to’o tinan 1998. Housi tinan 1998, Padre Kornelis Keyrans, OFM mai troka Padre Andre, OFM hodi tau matan ba Paróquia Alas no Fatuberliu to’o tinan 1999. Housi tinan 1999, Padre Andre OFM fila fali mai continua nia knaar nu’udar superior iha Paróquia São Francisco de Assis to’o tinan 2003.

               Iha tinan 1997 OFM começa hanoin ona atu loke ka cria formação básico (Postulante) ba candidato Franciscano sira iha Timor-Leste. Hanoin ida ne’e realiza depois de tinan ida, hodi hahu formação básico rasik antes candidato sira sai religiozo Franciscano. Fatin formação iha Welaluhu no sei uza hela Convento OFM.

               Iha tinan 2007 depois de Timor-Leste ukun-an mak OFM iha Timor-Leste nakfilak-an ba fundação (iha nia superior rasik no iha autonomia rasik em termos de decisão interna) maske nune’e hanoin ba idade ne’ebé sei jovem no recurso humano ne’ebé seidauk naton maka liderança geral OFM nian hakotu katak fundação Timor-Leste sei responsabiliza husi OFM iha Indonezia (Provincia Santo Anjo Miguel Arcanjo) em termos de finanças, forsa no formação ba candidato Franciscano sira. Ho nune’e fundação Timor-Leste ho nia Padroeiro ka mahein rasik ho naran, Fundação St. António de Lisboa. Superior Fundação hanaran Presidente da Fundação. Capítulo geral OFM Provinsia St. Anjo Miguel Arcanjo iha tinan 2013 no ikus hakotu lia atu fó apoio no realiza Fundação St. António de Lisboa (Timor-Leste), ba nia educação ka formação rasik totalmente (hahu husi Postulante to’o Teologia) ba candidato OFM sira housi nação Timor Leste. Decisão nebé refere foti ho sasukat nebé fó sai antes ona no haforsa ho loke formação candidato Padre Franciscano ba diocese hotu iha Timor-Leste.

                Além de servisu iha missão ka paróquia, OFM servisu mós iha area educação ba labarik sira iha Timor-Leste. Obra educação refere localiza iha Welaluhu ho naran escola São Francisco de Assis. Começa husi escola básico to’o escola secundário. OFM mós loke orfanato ka Colégio masculino iha Welaluhu ba estudante sira ne’ebé hela fatin dook husi escola. Estudante finalista balu husi escola ka Colégio referido iha vocação no sai ona na’ilulik/Padre Franciscano.

               Padre no bruder OFM sira ne’ebé servisu iha Timor-Leste hamutuk nain-10, housi quantidade referido Franciscano sira ne’ebé Timor-oan rasik hamutuk Frei na’in-5. (Frei OFM ida sei hala’o nia estudo de especialidade iha Roma tamba prepara hela ona hanesan recurso humano ida atu sai formador iha futuro ba Timor-Leste).

               Iha loron 4 de Outobro de 2008, Amo Bispo Dom Alberto Ricardo da Silva haraik bensa ba Convento foun frei Franciscano sira nian, nebé hela iha suco Fatucahi. Iha tempo ne’eba mos Padre Victor Milicias, OFM, Provincial OFM Portugal tuir cerimónia inauguração ne’e. Padre Victor Milicias OFM mos lori buat ruma hanesan presente ida ba Fundação Padre Franciscano St. António de Lisboa iha Timor-Leste. Nia fo presente Relíquia St. António nian nebé autêntico, foti housi liman ruin St. António nian rasik nebé rai hela iha Basílica St. António de Lisboa. To’o loron ne’e relíquia ne’e hela hamutuk ho sarani sira iha rai doben Timor- Leste, liu-liu iha Fatuberliu.

Leave a Reply

Your email address will not be published. Required fields are marked *