shadow
Diocese de Dili > NOTÍCIAS > Notícias > DOM VIRGÍLIO HUSU ATU FOINSAE SIRA MORIS IHA ATITUDE HUMILDADE

DOM VIRGÍLIO HUSU ATU FOINSAE SIRA MORIS IHA ATITUDE HUMILDADE

DCDD- (5-6-2019) Dom Virgílio do Carmo da Silva, bispo de Dili convida foinsae sira hotu atu moris iha humildade no corágem nia laran. Dom Virgílio do Carmo da Silva dehan lia hirak nee iha ninia homilia ba foinsae sira nebe liburan hamutuk iha Salão UNICA Balide Dili hodi tuir Retiro Espiritual durante loron tolu nia laran. Iha Dom Virgílio do Carmo da Silva nia homilia hateten, “Hau nia bemvindo ba imi hotu nebe hatan ba iha convite ida nebe hasai housi Departamento Juventude comvida jovem sira Universidade housi Departamento oi-oin, organização oi-oin nebe mai tuir Retiro Espiritual. Retiro katak husik buat hotu, hamamuk ita nia an, preucupação sira ita husik ituan atu nunee ita mai ho finalidade ida, ho hanoin ida fo tempo ituan mos atu descança ho Na’i Maromak. Iha retiro Espiritual ida nee nia carater especial uituan laos hanesan retiro bai-bain; retiro ida nebe imi rasik mak sei ba descobre durante loron hira nee buat diak no furak sira. Tan nee, hanesan ohin ita rona iha Evangelho Jesus harohan. Hau harohan ba ita Na’i atu sira nee ida sai santo, ema ida deit, ema los no hatene kona ba lialos. Tan nee uluk nanain ita mai iha encontro ida nee ho finalidade ida deit atu bele koko no sente buat diak ruma”.

Liu tan nee Dom Virgílio do Carmo hateten, “hau mos convida imi “Juventude” sira precisa iha atitude ida nee humildade. Humilde katak ita koko atu husik buat hotu atu rona tanba dala barak ita susar atu rona. Husik buat hotu nebe sai hanesan obstáculo ba ita atu ita rona. Então haraikan Uma Creda sublinha deit ponto oan ida nee; wainhira ita husik atu rona Na’i Maromak liu housi ema nebe Na’i Maromak tau iha besik ita; ita nia orador sira, organizador sira atu koko rona tok. Hanesan Jesus harohan ba nia escolante sira atu liu housi sira, bele hare no haklaken Maromak nia Liafuan. Nee duni liu housi orador sira nee mak ita nia humildade nee ita koko atu reconhece diak ruma nebe Nai Maromak koalia mai ita liu housi ema nebe Maromak haruka mai atu tatoli, koalia, ajuda ita atu descobre buat ruma iha ita nia moris nu’udar juventude.

Atitude daruak nian nee mak corágem. Corágem tanba ida nee hanesan obstáculo boot liu tan tanba condições físico nee dalaruma ladun máximo ba imi atu bele hakmatek; manas, orário, tur kleur, buat hirak nee hotu sai hanesan obstáculo físico ida nebe desafia ita atu bele tur kleur, atu persevera hodi rona didiak. Tan nee hau dehan precisa hanesan Paulo mos dehan precisa iha corágem. Hau fiar katak jovem sira sempre iha Espírito ida nee corágem, optimismo, laos katak jovem ida nebe hakarak rende lalais. Ida nebe rende lalais nee dehan katak nee laos jovem ida. Jovem sira mos laos jovem ida nebe pessimista nebe hanoin negativo deit. Maibe ser jovem nee sempre iha mehi ida maske atu atinge mehi iha dalan nebe susar, maibe nia tem que iha corágem atu lao ba oin”.

Atu remata Dom Virgílio mos hateten tan katak, “Ho missa ida nee ita hanaran missa abertura nian husu Espírito Santo atu bele presente duni ho imi durante loron hirak nai laran atu imi bele iha força ida nee hodi descobre no buka Maromak nia hakarak. Então ida nee mak encontro ida nebe ohin lori imi mai hamutuk iha nee hau deseja ba imi hanoin diak ida nee, hau acompanha imi e reza ba imi atu durante loron tolu ka ha’at nia laran imi nia experiência ida nee bele ajuda imi, atu ikus mai imi sai housi nee hanesan São Paulo brani atu halo síntese ida kona ba hau nia moris. Paulo hafoin experiência nee hotu nia dehan, Felicidade laos de’it hetan hodi simu maibe fo. Dalabarak ita iha tendência gosta deit simu, ita nia cultura simu nian, maibe, quando atu fo nee susar teb-tebes. Maibe ohin imi mai iha nee hatudu katak imi fo imi nia tempo ba Na’i Maromak, imi fo tempo ba imi nia an. Ida nee valor ida nebe ita bele dehan buat nebe as liu ona ita bele halo”.

Leave a Reply

Your email address will not be published. Required fields are marked *