shadow
Diocese de Dili > NOTÍCIAS > HOMILIA DO BISPO > MISSA ABERTURA RETIRO ESPIRITUAL BA FOINSAE SIRA IHA BALIDE

MISSA ABERTURA RETIRO ESPIRITUAL BA FOINSAE SIRA IHA BALIDE

Uluk nanain, hau nia bemvindo ba imi hotu nebe hatan ba iha convite ida nebe hasai housi Departamento Juventude comvida jovem sira Universidade housi Departamento oi-oin, organização oi-oin nebe mai tuir Retiro Espiritual. Iha retiro Espiritual ida nee nia carater especial uituan laos hanesan retiro bai-bain; retiro ida nebe imi rasik mak sei ba descobre durante loron hira nee buat diak no furak sira. Tan nee, hanesan ohin ita rona iha Evangelho Jesus harohan. Hau harohan ba ita Na’i atu sira nee ida sai santo, ema ida deit, ema los no hatene kona ba lialos. Harohan ida nee mos mak ita ohin primeiro ita loke ita nia sessão ho Eucaristia. Ita precisa mos iha ohin lorokraik ida nee ita reza duni ba Espírito Santo atu Espírito Santo bele loke ita nia fuan, loke imi nia laran atu aproveita loron tolu nee nia laran buka no hare Maromak iha ó nia laran. Buka hanesan santo Agustinho dehan “Hau nia fuan sei la hakmatek wainhira hau sidauk hasouru Na’i Maromak”. Ita hotu iha ita nia laran nee bai-bain ita lori desejo boot ida nee; “buka sé, hau nee sé no atu ba nebe”. Então ita precisa iha orientação ida atu ita bele descobre. Tan nee, Jesus iha nee Nia dehan; harohan ida nee atu Escolante sira atu hela nafatin iha união. Tan nee uluk nanain ita mai iha encontro ida nee ita mai ho finalidade ida deit atu bele koko no sente buat diak ruma.

Ohin ita rona mos iha Leitura sira Jesus dehan, Ha’u harohan atu housi sira ne’e ida la lakon. Nee atu dehan katak Jesus nia vocação ou nia missão nee ida deit. Ninia missão nee mak buat hotu nebe Nia halo ba nia escolante sira, Nia hanourin nia escolante sira durante tinan tolu nia laran, depois Nia mate no moris hias 40 dias too iha loron Assenção ninian, Nia prepara Nia escolante sira nee, agora Nia haruka fila fali Espírito Santo ida nee ba escolante sira hakarak buat ida deit; atu liu housi escolante sira nee, wainhira sira haklaken Maromak nia Liafuan ema bele fiar Na’i Maromak, ema bele fiar Jesus Cristo liu housi escolante sira. Nia harohan laos atu hasai lalais escolante sira housi mundo, maibe liu housi sira haklaken Maromak nia Liafuan atu ema bele fiar iha Maromak. Escolante sira Na’i Maromak uja hanesan instrumento deit. Hau hanoin imi foinsae sira nebe ohin mai iha nee ho hanoin ida nee; bolu ema barak maibe iha ituan nebe hatan hakarak atu koko experiência ida nee, Maromak ida nebe besik liu ba imi durante loron tolu (3) nee nia laran, sai instrumento Maromak ninian iha imi nia associação, iha imi nia grupo, iha imi nia kampus.

Ita bele dehan então buat hirak nee hotu laos teoria deit, maibe ita Paulo fo testemunho ida nebe concreto nebe ita rona iha Primeira Leitura. São Paulo nia descreve buat balun nebe dehan katak; Paulo iha nia missão tomak nia buka deit atu halo buat diak, atu haklaken Maromak nia Liafuan. Nia objetivo mak ida nee; oinsa mak atu lori ema bele fiar iha Maromak no fiar iha ita Nain Jesus Cristo. E Paulo haklaken Maromak nia liafuan nee nia dehan; wainhira imi haklaken Maromak nia Liafuan nia lori no hakiak hahalok tolu (3) deit; 1). Wainhira haklaken Maromak nia Liafuan nia haklaken ho nia humildade tomak. 2). Nia haklaken Maromak nia Liafuan nia haklaken ho corágem tanba wainhira começa koalia sei hetan susar maibe nia nafatin ánimo la desanima. 3). Nia haklaken Maromak nia Liafuan laos tanba nia iha interesse, maibe interesse ida deit katak ba Maromak nia glória atu ema bele hatene kona ba Maromak. Tan nee Paulo dehan tan iha Leitura nee katak, buat hotu nebe hau halo hau resumo sai hanesan sumário ka síntese ba hau nia moris nee nia dehan, hau hetan ksolok liu iha fo duque simu. Ida nee mak ohin hau atu sadik ituan jovem sira ba imi 100 ida resin nebe ohin hahu imi nia retiro. Tan nee fila fali encontro ida nebe hanesan iha convite imi simu imi mai ho finalidade ida nee; Retiro Espiritual. Retiro katak husik buat hotu, hamamuk ita nia an, preucupação sira ita husik ituan atu nunee ita mai ho finalidade ida, ho hanoin ida fo tempo ituan mos atu descança ho Na’i Maromak.

Hanesan Paulo ohin dehan atu tama iha encontro ida nee atu haklaken, hau mos convida imi “Juventude” sira precisa iha atitude ida nee humildade. Humilde katak ita koko atu husik buat hotu atu rona tanba dala barak ita susar atu rona. Husik buat hotu nebe sai hanesan obstáculo ba ita atu ita rona. Então haraikan Uma Creda sublinha deit ponto oan ida nee; wainhira ita husik atu rona Na’i Maromak liu housi ema nebe Na’i Maromak tau iha besik ita; ita nia orador sira, organizador sira atu koko rona tok. Hanesan Jesus harohan ba nia escolante sira atu liu housi sira, bele hare no haklaken Maromak nia Liafuan. Nee duni liu housi orador sira nee mak ita nia humildade nee ita koko atu reconhece diak ruma nebe Nai Maromak koalia mai ita liu housi ema nebe Maromak haruka mai atu tatoli, koalia, ajuda ita atu descobre buat ruma iha ita nia moris nudar juventude.

Atitude daruak nian nee mak corágem. Corágem tanba ida nee hanesan obstáculo boot liu tan tanba condições físico nee dalaruma ladun máximo ba imi atu bele hakmatek; manas, orário, tur kleur, buat hirak nee hotu sai hanesan obstáculo físico ida nebe desafia ita atu bele tur kleur, atu persevera hodi rona didiak. Tan nee hau dehan precisa hanesan Paulo mos dehan precisa iha corágem. Hau fiar katak jovem sira sempre iha Espírito ida nee corágem, optimismo, laos katak jovem ida nebe hakarak rende lalais. Ida nebe rende lalais nee dehan katak nee laos jovem ida. Jovem sira mos laos jovem ida nebe pessimista nebe hanopin negativo deit. Maibe ser jovem nee sempre iha mehi ida maske atu atinge mehi iha dalan nebe susar, maibe nia tem que iha corágem atu lao ba oin. Atitude ida tan Paulo nian dehan; buat hotu ita halo tem que ser sai mos hanesan pregunta ida nebe hau husik hela ba imi; tanba sa hau mai iha nee?razão saida?saida mak dudu hau atu hatan ba convite ida nee? Tanba ida nee mak Paulo dehan interesse. Se ita mai duni ho finalidade ou objetivo ida nebe claro sei ajuda ita atu bele persevera iha loron hirak nia laran atu descobre. Ida nee mak Leitura ohin convida ita atu contempla nafatin durante loron hirak nee nia laran. Wainhira atitude hirak nee mak ita tau kedas iha Eucaristia ida nee hodi reza husu Maromak atu fo força ba imi. Tan nee mak Madre ho nia equipa convida hau atu loke imi nia encontro nee ho santa Missa. Ho missa ida nee ita hanaran missa abertura nian husu Espírito Santo atu bele presente duni ho imi durante loron hirak nai laran atu imi bele iha força ida nee hodi descobre no buka Maromak nia hakarak. Então ida nee mak encontro ida nebe ohin lori mi mai hamutuk iha nee hau deseja ba imi hanoin diak ida nee, hau acompanha imi e reza ba imi atu durante loron tolu ka ha’at nia laran imi nia experiência ida nee bele ajuda imi, atu ikus mai imi sai housi nee hanesan Paulo brani atu halo síntese ida kona ba hau nia moris. Paulo hafoin experiência nee hotu nia dehan, Felicidade laos de’it hetan hodi simu maibe fo. Dalabarak ita iha tendencia gosta deit simu, ita nia cultura simu nian, maibe, quando atu fo nee susar teb-tebes. Maibe ohin imi mai iha nee hatudu katak imi fo imi nia tempo ba Na’i Maromak, imi fo tempo ba imi nia an. Ida nee valor ida nebe ita bele dehan buat nebe as liu ona ita bele halo. Fo tempo ba Na’i Maromak, fo tempo ba imi nia an dalabarak ita preucupa ho buat barak, hau hatene katak nudar jovem dader to kalan nee preucupação barak estuda, iha família ida nee iha ida neba, maibe iha tempo ida ohin nee imi fo tempo mos tan hakarak rona hodi fo tempo ba Maromak. Tanba nee hau fo parabens ba imi tanba imi hahu iha semana ida nee nia laran aprende atu fo tempo ba imi nia an tanba ita nia an nee precisa descança ituan. Nee duni ita reza atu aproveita experiência loron hirak nia laran bele ajuda no fo duni sentido ba imi nia moris nudar foinsae, oinsa imi mos bele sai insrumento Maromak nian iha imi nia fatin.

Leave a Reply

Your email address will not be published. Required fields are marked *