shadow
Diocese de Dili > NOTÍCIAS > REFLEXÃO > DOMINGO PENTECOSTES

DOMINGO PENTECOSTES

Maun alin sarani doben sira, ohin ita celebra loron pentecostes,  loron nebé Espírito Santo tun mai iha apostolo sira hamutuk ho Nain Feto no sarani dahuluk sira nia le’et. Espírito Santo ne’e tun mai nu’udar ita Nai Jesus Cristo hateten nanis ona hodi bele harik tulun, hamahan, hakbit no haroman sira hotu. Nune’e sira bele aten barani hahu haklaken Maromak ninia reino no Maromak ninia maksoin ba ema sira hotu nu’udar ita rona iha leitura sira domingo ohin nian.

Haktuir mai ita iha primeira leitura katak “Espírito Santo tuun ba sira leten hanesan ahi lakan” hodi halo sira bele koalia lia oioin deit ba ema hotu hotu nebé tempo neba horik hela iha Jerusalem. Maun alin doben sira, Espírito Santo nia kbiit tulun ita ema sira ultrapassa limite sira ita ema nian iha lian, iha compreensão, iha neon no laran, iha obstaculto sira hotu hodi halo Maromak ninia hakarak mak realiza iha ita nia le’et. Maromak ninia hakarak ida atu ema hotu hatene katak maksoin nebé foin mosu dadaun iha povo israel nia le’et ba sira no ba mundo tomak ne’e mai husi Maromak. Katak Maromak mak soi duni ema no mundo rai klaran tomak liu husi ninia Oan Mane mesak Jesus Cristo be saran an to mate iha cruz no moris hias fila fali liu loron tolu sae ba Lalehan. Maromak ninia maksoin ne’e halo mai ita dala ida no hela hori uluk, ohin loron no sei ba nafatin tinan ba tinan. Nune’e mak ema hotu hotu bele rona no comprende Maromak ninia hakarak no Maromak ninia maksoin ne’e iha sira ninia lian rasik tamba Espírito Santo ninia serviço be realiza liu husi apostolo no sarani sira dahuluk nian.

Espírito Santo loke apostolo sira nia laran no matenek hodi haklaken ho aten barani lolos, no ho fiar metin lolos katak atu ita ema sira labele lakon tan ona Maromak ninia domin be hatudu iha maksoin ka salvação ne’e nu’udar ita rona iha Evangelho, ita tem que uluk nanain hakribit lolos salan sira hotu nebé haketak ita husi Maromak no tuir mai fo perdua no fo dame ba malu nu’udar Cristo fo mai ita hodi ita bele moris hamutuk sai ida los deit nu’udar Maromak ninia oan sira no Cristo mak ita nia ulun. Ita hotu mesak ninia liman ho ain. Ninia liman ho ain nebé liu husi neba Maromak halao nafatin ninia obra salvação to’o mundo nia rohan.

 

Iha compreensão geral ita bele comprende katak kmanek Espírito Santo nian nebé ohin haraik mai ita mak kmanek perdaun, paz ka dame, unidade, aten barani, laran metin no ksolok nia laran. Ema hotu nebé simu Espírito Santo hatudu moris ida nune’e basa Espírito Santo haraik ba nia graça hirak ne’e. Moris ida nune’e nakonu ho graça Espírito Santo nian sira ne’e ba ninia-an rasi no mos ba maun alin sira seluk.

Espírito Santo ninia kmanek sira ne’e haraik mai ita ida-idak tuir ninia hakarak no tuir ninia plano ba ita ninia diak. Nune mak iha realidade halo ita descobre kmanek oioin deit iha ita nia moris maibe mai husi hun ida deit, mak  Espírito Santo. Hateten momos mai ita iha segunda leitura dehan “tebes duni Espírito Santo nia diak oi-oin deit, maibe nia-Espírito Santo ne’e ida deit, Di’ak sira ne’e tamba tulun no kbiit Espírito Santo nian ita halao iha knar oioin deit maibe Na’i nee ida deit, ita hatudu  mos iha hahalok oioin, maibe Maromak ida deit. Nune’e husi buat diak barak be realiza iha ita barak nia leet tamba Espírito Santo nia kbiit nee halo mas que ita barak no iha knar la hanesan ita bele completa malu  ho hakonu ita ida idak ninia moris nu’udar sarani ho Maromak ninia graça maksoyn nian nebé suli mai ita rohan laek tebes.

Ikus mai husi ne’e hotu Espírito Santo lori ita hotu-hotu ba moris hamutuk ho Maromak iha domin, dame no ksolok rohan laek nia laran. Maromak Espírito Santo tulun nafatin ita, consola nafatin ita, halos nafatin ita, haksolok nafatin ita naran katak ita loke nafatin ita nia neon no laran ba Maromak Espírito Santo hodi haboot ita nia fiar no domin ba Nia, ba Aman, ba Oan no ba maun alin sira seluk.

Tamba ne’e maun alin sira mai ita buka atu moris duni concretamente iha kmanek ka buat di’ak sira nebé ohin Espírito Santo haraik mai ita ida-idak hodi hametin no haboot ita nia fiar, ita nia caridade, ita nia esperança no ita nia domin ba malu loron loron iha ita nia moris tomak.

Espírito Santo hafoun ona ita iha ita nia neon, ita nia laran no ita nia hahalok, mai ita buka atu moris nafatin iha moris foun ida ne’e nu’udar Maromak oan be halibur-an iha santa creda ne’e nafatin ba nafatin hodi buka atu rona, halo tuir no hadomi liu tan Espírito Santo hamutuk ho Aman no Oan iha ita nia-an no iha maun alin sira hotu. Amen.

 

Capela São Sebastião Bidau Mota Klaran, 09-06-2019, Pb.

Leave a Reply

Your email address will not be published. Required fields are marked *