shadow
Diocese de Dili > NOTÍCIAS > LETURA DIÁRIA > Segunda-Feira, X Semana Tempo Comum (ANO C)

Segunda-Feira, X Semana Tempo Comum (ANO C)

Primeira Leitura                          2Cor. 1. 1-7

Lia housi São Paulo nia segunda Surat ba sarani sira iha Corinto:

Paulo, Cristo Jesus nia apóstolo ida tan Maromak hakarak, no Timoteo, ami nia alin, ba Maromak nia kreda iha Corinto, hamutuk ho santo sira hotu iha Akaia tomak, graça ba imi no dame housi Maromak ita Aman no housi ita Na’i Jesus Cristo.

Rahun di’ak ba Maromak no ita Na’i Jesus Cristo nia Aman, Aman laran di’ak no Maromak ksolok hotu nian, nebé fó ksolok mai ita hotu iha ita nia susar tomak atu ita bele consola sira nebé iha susar laran ho ksolok nebé ita rasik simu housi Maromak. Basá nu’udar ita halo parte maka’as iha Cristo nia terus, nune’e mós, housi Cristo mak ksolok wa’in suli mai. Ami hetan terus karik, ne’e atu imi hetan ksolok no maksoyn; no ami simu ksolok karik, ne’e atu imi hetan ksolok, nebé imi koko wainhira imi tahan ho paciência susar sira hanesan ami hetan. Ami nia esperança ba imi la namlele, basá ami hatene katak nu’udar imi halo parte iha ami nia terus, imi mós sei halo parte iha ami nia ksolok.

Maromak Futar Lia.

 

Salmo Responsorial                                                                                                                   Sal. 33(34). 2-3, 4-5, 6-7, 8-9 (R. 9ª)

Refrão : Imi koko ba hodi haré oinsá Na’i nia di’ak!!! Repete-se

Ha’u sei hahi Na’i loron kalan,

Nia rahun di’ak iha nafatin ha’u ibun.

Ha’u klamar fó glória ba Na’i;

Sira be haraik-an rona no ksolok. Refrão

 

Ha’u sei haksolok ho Na’i,

Ita sei hahi hamutuk Nia naran.

Ha’u buka Na’i, Nia rona ha’u;

Nia hasa’i ha’u housi buat áat hotu. Refrão

 

Imi fila ba Na’i, imi sei hetan ksolok,

Imi sei la moe lerek.

Ema kiak harohan, Na’i rona nia,

Soi nia housi buat áat hotu. Refrão

 

Na’i nia Anjo tau matan ba sira nebé hamta’uk Nia,

No tahan sira housi buat áat.

Koko ba hodi hare oinsá Na’i Nia di’ak;

Rahun di’ak ba ema nebé hôrik iha Nia. Refrão

 

Aclamação                                                                                                                                                                                           Mt. 5. 12a

Refrão : Aleluia, Aleluia!! Repete-se

Imi haksolok ba, basá,

Imi nia kolen iha Lalehan wa’in liu. Refrão

 

Evangelho                                                                                                                                                                                        Mt. 5. 1-12a

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus haré ema lubun boot, Nia sa’e ba foho. Hafoin, Nia tur tiha, escolante sira besik ba Nia.

Nia hahu hanourin sira hodi dehan nune’e: “Ksolok ba ema kiak sira nebé kiak iha laran, basá, reino Lalehan sira nian. Ksolok ba sira nebé tanis, basá, sira sei hetan kmaan. Ksolok ba sira nebé haraik-an, basá sira sei simu rai hanesan liman-rohan. Ksolok ba sira nebé hamlaha no hamrook ba justice, basá, sira sei bosu. Ksolok ba sira nebé laran-luak, basá, sira sei hetan di’ak. Ksolok ba sira nebé laran mós, basá, sira sei haré Maromak. Ksolok ba sira nebé buka dame, basá, ema sei bolu sira Maromak oan. Ksolok ba sira nebé ema duni, fó terus tan justiça, basá, reino Lalehan sira nian. Ksolok ba imi, wainhira, tan Ha’u, ema hateten áat imi, duni imi, hodi foti lia bosok oi-oin hasouru imi. Imi haksolok ba, hahi ba, basá, imi nia kolen iha Lalehan wa’in liu”.

Maromak Futar Lia.

Leave a Reply

Your email address will not be published. Required fields are marked *