shadow
Diocese de Dili > NOTÍCIAS > LETURA DIÁRIA > Sábado, X Semana Tempo Comum (ANO C)

Sábado, X Semana Tempo Comum (ANO C)

Primeira Leitura                   2Cor. 5. 14-21

Lia housi São Paulo nia segunda Surat ba sarani sira iha Corinto:

Maun alin sira: Basá Cristo nia domin book ami maka’as basá ami hatene lolós katak ida mate tiha tan ema hotu nia di’ak, no tan ne’e ema hotu mate. Cristo mate duni tan ema hotu-hotu, atu sira nebé moris, la moris tan ba sira an rasik, maibé moris ba Ida nebé mate no moris hi’as tanba sira.

Ne’e duni, houri ohin ba oin, ita haré ema, la’os tuir isin ona; maski uluk ita haré Cristo tuir isin, ohin ne’e, ita la haré tan nia hanesan ne’e. Ne’e duni, ema hela iha Cristo karik, nia sai ona criatura foun ida; criatura tuan nian liu tiha ona; haré ba, buat hotu foun fali ona. No buat sira ne’e hotu mai housi Maromak, nebé badame ita ho Nia An housi Cristo no haraik tiha mai ami knaar badame malu nian, katak, Maromak badame mundo ho Nia An housi Cristo, hodi la sura ema sira nia sala hasouru sira, maibé saran tiha mai ami lia menon badame malu nian. Ami Cristo nia manu ain; Maromak hato’o nia liafuan housi ami. Ami husu imi hodi kbiit iha Cristo nia naran: badame malu ho Maromak ba. Tan ita; Maromak halo Nia nebé la hatene sala atu sai sala, atu ita bele sai Maromak nia laran lós iha Nia.

Maromak Futar Lia.

 

Salmo Responsorial                                                                                                                    Sal. 102(103). 1-4, 8-9, 11-12 (R. 8ª)

Refrão : Na’i laran di’ak no laran-luak tebes!!! Repete-se

Ha’u klamar, hahí ba Na’i,

Ha’u-an tomak haklaken Nia naran santo.

Ha’u klamar, hahí ba Na’i,

La haluha Nia tulun. Refrão

 

Nia perdua ó salan tomak,

Nia halo di’ak ó nia moras hotu,

Nia soi ó nia moris housi mate laran,

no hafutar ó ho graça laran luak. Refrão

 

Na’i laran-luak no laran di’ak,

kleur atu hirus, laran di’ak tebes;

la si’ak ita bei-beik,

la rai hirus ba nafatin. Refrão

 

Lalehan dook tebes housi rai,

nune’e nia laran luak ba ema sira be hadomi nia.

Nu’udar loro-sa’e dook housi loro-monu,

nune’e nia haketak ita housi ita salan. Refrão

 

Aclamação                                                                                                                                                                  Sal. 118(119). 36ª, 29b

Refrão : Aleluia, Aleluia!! Repete-se

Halo ha’u moris tuir ita ukun fuan no haraik mai

ha’u graça tuir ita lei. Refrão

 

Evagelho                                                                                                                                                                                         Mt. 5. 33-37

Na’i Jesus Cristo nia Evangelho nu’udar são Mateus haktuir:

Iha tempo nebá, Jesus lia tun ba Escolante sira, dehan: “Imi mós rona uluk ema dehan ba bei ala sira: ‘Keta jura falso, maibé halo tuir juramentu nebé ó jura iha Na’i.’ Maibé ha’u dehan ba imi: ‘Imi labele jura kona ba buat naran ida. Keta jura hodi lalehan basá ne’e Maromak nia kadunan; keta jura hodi rai, basá ne’e na’i nia sama fatin; keta jura mós hodi Jerusalém, basá nia Liurai boot nia cidade. Keta jura hodi ó nia ulun, basá o labele halo o nia fuuk lahan ida sai mutin ka metan. Maibé imi sei koalia hanesan ne’e: Nune’e, nune’e, la nune’e, la nune’e. Liu fali ne’e, mai housi ida nebé áat.

Lia Maksoyn.

Leave a Reply

Your email address will not be published. Required fields are marked *