shadow
Diocese de Dili > NOTÍCIAS > LETURA DIÁRIA > Sexta – Feira, XIV Semana Tempo Comum (ANO C)

Sexta – Feira, XIV Semana Tempo Comum (ANO C)

Primeira Leitura             Gen. 46. 1-7, 28-30

Lia housi livro Génesis:

Iha loron hira nebá, Israel hahu la’o ho nia riku-soi tomak, no wainhira to’o iha Bersabé, nia hasa’e sacrifício ba nia aman Isaac nia Maromak. Iha kalan, Maromak ko’alia ho nia housi mehi: “Jacob, Jacob!” Nia hatan: “Ha’u mak ne’e”. Maromak hateten teni: “Ha’u mak Na’i, Maromak ó nia aman nian. Ó keta ta’uk tun ba Egipto, basá, iha nebá mak Ha’u sei halo  housi ó sai povo boot ida. Ha’u rasik sei hamutuk ho ó ba Egipto, Ha’u rasik mós mak sei halo ó fila hi’as fali housi Egipto. José nia liman mak sei taka ó nia matan”. Jacob sai housi Bersabé. Israel nia oan sira fó tulun ba Jacob, nia aman, mós ba nia oan sira no nia féen sira, hodi sa’e ba kareta sira nebé faraó haruka mai atu tula sira ba.

Sira lori mós nia bibi luhan ba luhan, no riku-soin selu-seluk tan nebé sira hetan iha rai Canaã. Jacob ho nia parenti tomak tun ba Egipto; nia oan mane sira ho sira nia oan, nia oan feto sira ho sira nia oan. Nia lori nia oan no bei-oan sira hotu ba Egipto.

Jacob haruka Judá ba uluk fó hatene ba José atu mai hasouru nia iha Géssen. Wainhira sira to’o iha fatin nebá, José haruka hadi’a nia kareta atu mai hasouru nia aman iha Géssen. Haré hetan tiha nia aman, nia halai ba hako’ak nia aman, hahu tanis kleur teb-tebes. Jacob dehan ba José: “Oras ne’e ha’u bele mate, tan ha’u haré ona ó nia oin no ó sei moris hela”.

Maromak Futar Lia.

 

Salmo Responsorial                                                                                                   Sal. 36(37). 3-4, 18-19, 27-28, 39-40 (R. 39ª)

Refrão : Maksoyn ema lós nian mai housi Na’i!!! Repete-se

Ó laran metin iha Na’i ba hodi halo di’ak,

Ó sei hôrik iha rai no moris hakmatek.

Ó nia ksolok tomak ó tau iha Na’i ba,

Nia sei haraik ba ó, ó fuan nia hakaran tomak. Refrão

 

Na’i hatene ema laran lós nia loron sira,

Nini liman-rohan sei hela ba nafatin.

Sira sei la moe iha tempo susar,

Iha tempo hamlaha, sira hetan aihan wa’in. Refrão

 

Hadook-an housi áat hodi halo buat di’ak,

Ó sei moris ba nafatin,

Basá, Na’i hadomi justiça;

La husik sira be laran metin iha Nia. Refrão

 

Maksoyn ema lós nian mai housi Na’i,

Nia mak ninia subar fatin iha tempo susar;

Tahan nia housi ema áat sira liman,

No soi nia, basá, nia hamahan-an iha Na’i. Refrão

 

Aclamação                                                                                                                                                                         Jo. 16. 13ª, 14. 26d

Refrão : Aleluia, Aleluia!! Repete-se

Wainhira Espírito lialós nian mai, Nia sei hanourin lialós hotu ba imi.

Nia sei halo imi hanoin hetan fali buat hotu nebé

Ha’u hanourin ona ba imi. Refrão

 

Evangelho                                                                                                                                                                                     Mt. 10. 16-23

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus hateten ba nia Apóstolo sira: “Ha’u haruka imi ba hanesan bibi sira iha asu fuik sira leet. Ne’e duni, matan moris neon na’in ba hanesan samea sira, no mós laran mós hanesan manu falur sira.

Matan moris ho ema sira. Sira sei lori imi ba sinédrio hodi baku imi iha  sira nia sinagoga laran. Sira sei lori hodi kesar imi ba emboot no liurai sira tanba Ha’u, atu imi fó sasin ba sira no ba gentio sira. Maibé wainhira sira saran imi, keta hanoin resin kona ba sá mak imi sei hatan, eh ko’alia oin sá; iha oras nebá sei haraik ba imi atu dehan sáida. Basá la’os imi mak ko’alia, maibé imi Aman nia Espírito mak sei ko’alia liu housi imi.

Maun sei saran nia alin ba mate, aman sei saran nia oan; oan sira sei foti liman hasouru aman sira hodi oho sira.

Ema hotu sei odi imi tan Ha’u nia naran; maibé ema nebé hela metin to’o rohan sei hetan maksoyn. Wainhira ema hanehan imi iha cidade ida, imi ba cidade seluk. Ha’u dehan ba imi katak molok imi liu housi cidade hotu Israel nian, Oan Mane sei mai ona.

Lia Maksoyn.

Leave a Reply

Your email address will not be published. Required fields are marked *