shadow
Diocese de Dili > NOTÍCIAS > HOMILIA DO BISPO > CELEBRA 25 ANOS PRECISA SENTIMENTO DE GRATIDÃO NO RENOVAÇÃO

CELEBRA 25 ANOS PRECISA SENTIMENTO DE GRATIDÃO NO RENOVAÇÃO

Frase ida ne’e mak sarani Letefoho contempla, reflecte, koko atu moris tuir durante tinan tomak ida nia laran. Tinan tomak ida nia laran, Inan doben Liurai Feto Letefoho ninian liu housi Nia kadunan ba visita nia oan sira iha suco 8 Aldeia 67. Ohin loron 16 fulan Julho, loron ne’ebe sarani Letefoho la fácil atu haluha tanba hakerek ona iha sarani ida-idak nia fuan Inan Lalehan nia Naran. Loron 16 fulan Julho tinan 2019, loron ida ne’ebe especial liu tan ba sarani Letefoho tanba tinan ida ne’e completa tinan 25 Paróquia Nossa Senhora do Carmo Letefoho. Ho tinan ida ne’e mos mak primeiro Pároco Letefoho ninian completa nia tinan 41 nu’udar amululik.

Ohin ita halibur hamutuk iha ne’e ho sentimento ida de’it katak Sentimento de Gratidão. Obrigado Na’i ne’ebe fo ona mai ita Inan ida ne’ebe bele bali ita iha tinan naruk ne’e nia laran Nia sai ita nia Intercessora. Tan ne’e, buat ne’ebe ita bele husu ba ita an mak ida ne’e; Dalan saida mak diak liu mai ha’u atu agradece se laos atu hafoun ha’u nia fidelidade ba Na’i Maromak, basá Jesus rasik fo hanoin nafatin mai ita; laos ida ne’ebe bolu Na’i..Na’i mak sei tama ba reino Lalehan, maibe halo tuir Ha’u Aman iha Lalehan nia hakarak. Saida mak Maromak nia hakarak mai ita? Se laos ita nia santidade! Santidade laos deit vocação ema ida nian; Amululik ka Madre ninian, maibe vocação ida sarani ida-idak nian. Ita nia Amo Papa fanun nafatin ita katak; sarani hotu hakasan atu sai Santo. Laiha ema ida ne’ebe exclui housi dalan santidade ninian.

Ne’e duni loron ida ne’e, lato’o de’it ba buat ne’ebe sarani Letefoho halo durante tinan ida ne’e nia laran, pergunta ida ne’ebe paróquiano ida-idak tem que husu duni ba nia an, ha’u nia participação iha atividade hot-hotu ne’ebe Paróquia organiza durante tinan tomak ne’e nia laran lori ha’u besik duni hodi hasoru ho Jesus kalae? Ha’u haksolok tanba bele celebra didiak XXV aniversário Paróquia ida ne’e ninian, ha’u nia ksolok sai bo’ot liu tan wainhira ha’u nia celebração ne’e bele lori ha’u hakat tan passo ida besik liu ba Na’i Maromak.

Wainhira odamatan Cristo liurai nian loke, tuir dalan hakerek liafuan; “Na’okten, Barukten, Futumanu dor, Lanuten, Jogador no seluk tan… Ne’e katak hakat passo ida ita koko atu husik hela ita nia toman a’at sira ne’e. Dalan ne’ebe ita lao tuir samea nia ikun sae to’o ba leten ne’e katak dalan purificação ninian. Ha’u nia moris nu’udar sarani ne’e wainhira sae iha escada ne’e lori ha’u atu hanoin hodi koko atu husik duni toman a’at ruma iha ha’u nia moris. Ita tama ba tinan 25 hafoun ita nia an hodi bele lori buat diak ruma ba ita, atu tulun ita hadia liu tan ita nia dalan santidade nian.

Evangelho ne’ebe ohin ita rona Ita Nain Feto ho São João convida ita sarani ho liafuan: Ida ne’e mak ó nia Inan-ida ne’e mak ó nia oan. Nai Feto lahatan buat ida ba nia Oan wainhira Nia Oan husu Nia, maibe Nia simu Nia Oan nia testamento ikus ho silêncio. Ida ne’e mak ita bele dehan katak encontro ikus Inan ho Oan. Iha cruz hun Nain Feto hetan fali oan ida no Jesus nia Inan sai Inan foun ba família foun ida ne’e, Inan ba Creda tomak no Inan ba sarani Paróquia Letefoho.

Ohin Paróquia Letefoho celebra XXV aniversário então ita simu tiha oan convite ida ne’e. Ita tem que sente orgulho tanba sarani Letefoho predilecto, preferido, eligido. Ne’e katak sarani ida ne’e simu duni Inan ida ne’e iha sira nia moris durante tinan 25 nia laran. Tan ne’e ohin ita tem que sente duni katak Jesus comfia ita, hadomi ita.

Iha cruz hun Jesus la halo diálogo ho sira, maibe Nia fo ordem; Ida ne’e Ó nia oan – ida ne’e ó nia Inan. Ordem atu executa, ordem laos atu nego, ordem laos atu dehan ha’u hakarak ou lae! Housi ordem ne’e hakiak hela relação foun ida. Ida ne’e mak família foun ida, família Jesus nia Inan no Escolante simu Jesus nia Inan laos tanba nia hakarak, maibe ordem ida housi nia mestre, orden atu hahu missão foun dalan atu haburas no hametin confiança mak hatene rona no halo tuir. Maluk doben sira, dificuldade ne’ebe bain-bain halo ita nia relação ba malu no iha ita nia família iha crise mak wainhira ita la fo tan ona espaço atu rona Na’i Maromak. fatlta de capacidade atu rona mak causa desobidiência “Ulun fatuk tos”.

Atu contempla Jesus ha’u nia maksoyn ne’ebe hakarak ko’alia mai ha’u, hau precisa fo tempo atu rona. Dalabarak ita preucupa ho buat barak, buat ne’ebe mos la importante ba moris. Ita tama ba tinan 25 Paróquia ida ne’e nian Nain Feto hakarak husu de’it buat ida ba sarani Letefoho; to’o ona tempo atu hatene hili buat ne’ebe inportante ba moris. Laos buat hotu ne’ebe monu ba matan, laos buat hotu ne’ebe monu ba iha fuan ne’e diak no inportante hotu, maibe Nain Feto husu atu sarani sira durante ne’e halo preparação naruk pelo menus to’o iha tempo ida ne’e hatene husu ba Nain Feto atu bele mos tulun liu-liu ba foinsae sira, Estudante sira hatene hili buat ne’ebe saida mak inportante ba ha’u nia moris.

Maluk doben sira sarani Letefoho ninian XXV aniversário ne’e tem que sai duni Momento ida Renovação. Laos atu obrigado de’it, maibe tem que sai mos momento ida renovação nian. Liafuan renovação exige atitude rua; humildade no corâgem. Precisa humildade tanba wainhira ita haraikan mak ita bele reconhece ita nia falta, ita nia miséria, ita nia falhanço, ita nia defeitos no ita nia erros, maibe lato’o atu reconhece de’it, maibe precisa iha corâgem atu renova, precisa iha corâgem atu hamrik fali basá Jesus rasik dehan ksolok boot liu iha Lalehan wainhira sala nain ida ne’ebe bele hatene hamriik no fila fali ba Na’i Maromak. ita hotu mesak ema sala nain. Tan ne’e opurtunidade ida ne’e apelo ida ba renovação ne’e sai ita hotu nia preucupação se ita hakarak duni atu hadia ita nia an, ita nia amizade ho Na’i Maromak.

Ko’alia kona ba renova katak renova ita nia domin. Ita nia amizade, ita nia relação, renova ita nia promessa sira nebe ita halo. Então hau hanoin kona ba promessa ida ne’e lori mai ha’u nia hanoin buat ida ne’e karik ha’u la ofende ema ida maibe buat ida ne’e hanesan partilha de’it; iha tempo ruma liu ba, ha’u rona dehan katak wainhira Dom. Alberto Ricardo sei moris sarani Ermera convida nia mai iha ne’e hamutuk ho Presidente José Ramos Horta atu assiste tara bandu ida ne’ebe sarani tomak Ermera nian halo ho objetivo atu reduz gastos, oho animal sira wainhira Lia Mate no Lia Moris nian. E ida ne’e uluk husi kotuk ne’e Pe. Lorenço matebian no sira seluk. Maibe buat ne’e fofoun ne’e dehan animado los, ema hotu fiel los ba buat ne’e. depois hahu lao lakleur de’it sira ne’ebe vocal, energético los, ida ne’ebe promotor los promessa ida ne’e mak fial fali neneik-neneik harahun tiha fila fali, sobu tiha fila fali promessa sira ne’ebe ita halo. Viola tiha fila fali tara bandu sira, viola tiha fali promessa sira iha presença Uma Creda ninian, Presença Na’i Maromak nian, ita halo finge ida tanba interesse karik ikus mai ita la fiel to’o rohan. Então ida ne’e mos lori ita atu hanoin kona ba promessa oi-oin ne’ebe ita halo. Halo nu’udar ema pessoal, nu’udar família, nu’udar comunidade ka nu’udar Uma Creda. Dala barak ita halo promessa barak. importante mak ita husu ba ita nia an tanba sa mak ita labele persevera, ita la Querente ho ita nia liafuan ho ita nia hahalok ne’ebe ita halo. Saida mak bele kesi metin ita! Tan ne’e mak hanesan ohin ha’u dehan katak loron ida ne’ebe ita agradece ba Maromak hare ba kotuk buat barak ne’ebe liu tiha ona, maibe ita mos sempre iha corâgem hakarak hakat ba oin. Ita celebra tinan 25 ne’e ita hakarak atu hakak ba oin tan ne’e mak ita celebra hodi hahu história foun. Ne’e duni ita hakat ba tinan 26 nian ne’e sarani Letefoho tem que hahu mehi foun, hanoin foun atu nune’e ita bele hafoun nafatin ita nia Uma Creda. Papa Paulo VI wainhira ko’alia kona ba devoção ba Nain Feto nia dehan; ita nia devoção ba Nain Feto Inan doben Virgem Maria ne’e tem que marca ho característica 4; Buka atu hatene Nain Feto, hadomi Nain Feto, Halo tuir Nain Feto, habelar Nain Feto.

Ne’e duni, ita nia devoção, ita nia domin ba ita nia Inan Lalehan nian ne’e la to’o deit hodi hatene no hadomi de’it, maibe halo tuir nia virtude sira, Nini moris, Ninia hahalok, imita Ninia virtude sira iha ita nia moris. Ksolok boot no novidade mai ita buat ne’ebe ita descobre tiha ona durante preparação inportância Inan ida ne’e iha ita nia moris, mai ita ida-idak lori iha ita nia fuan, iha ita nia família, ba ita nia sociedade ksolok ida ne’e. Liu husi Nain Feto atu ita hasoru malu ho Nia Oan iha Eucaristia. Ida ne’e mak ksolok boot liu ita sarani tem que lori. Tanne’e mai ita harohan ita husu ba Nain Feto Carmelo atu hanourin ita apreende lao iha escada perfeição nian. Tanba ne’e atu to’o iha escada santidade nian ita precisa hamate an. Mai ita husu ba Nain Feto hanourin ita hotu liafuan ida de’it “Hau Mak Ne’e Atu Halo Tuir Ita nia Hakarak”

 

Leave a Reply

Your email address will not be published. Required fields are marked *