shadow
Diocese de Dili > NOTÍCIAS > REFLEXÃO > KAER TELEMÓVEL VS KAER TERÇO

KAER TELEMÓVEL VS KAER TERÇO

Leitura no Reflexão ba Domingo Comum XVI-Ano C 2019

 

Primeira Leitura                  Gén 18, 1-10ª

 

Lia housi Livro Génesis:

Iha loron hirak nebá, Na’i mosu ba Abraão besik ai carvalho Mambré. Iha oras rai manas liu, Abraão tur hela iha oadamatan.

Abraão foti matan, haré ema Na’in tolu, hamriik hela iha nia oin. Haré tiha sira, Abraão ba hasouru sira. Hafoin, Abraão hakru’uk to’o rai, hodi hasa’e lia ba sira dehan: “Na’i, ha’u hetan karik di’ak iha Ita futar oin , ha’u husu atu Ita keta liu de’it, maibé, tama mai tur witoan iha atan nia uma. Ha’u sei ba hola wé witoan atu fase Ita ain. Tur hola mahan witoan iha ai-hun ne’e. Ha’u

sei buka ai-han ruma; hola tiha mak Ita bele tuir Ita dalan. Tan ne’e, mak Ita liu hous Ita atan oin”. Ema sira ne’e hatán: “Di’ak, halo tuir ó hateten”. Abraão ba kedas buka Sara iha uma laran, hodi dehan ba nia: “Ba lori lalais farinha luhu tolu mai atu halo pão ruma”. Abraão halai ba kaer karau vaka oan ida, sei nurak no bokur liu. Hafoin, Abraão fó karau ne’e ba atan ida atu oho be te’in. Hafoin, Abraão lori mai manteiga foun ho susu-wén no mós na’an karau oan be te’in ona. Nia tau hotu iha sira Na’in tolu oin; Abraão hamriik besik sira iha ai-hun. Sira Na’in tolu hahú han. Hafoin, sira husu ba Abraão: “Ó nia kaben Sara iha nebé?” Abraão hatán. “Iha nebá, iha uma laran”. Sira ne’e ida dehan ba nia: “Liu tinan ida, Ha’u sei fila mai housi ne’e, ó nia kaben Sara sei hetan oan mane ida”.

Maromak Futar Lia.

 

Salmo Responsorial                                                                                                                                                   Sal. 14(15), 2. 3. 4. 5

Refrão : Na’i, sê mak bele hela iha Ita kadunan? Repete-se

 

Ema nebé buka moriss tuir dalan lós,

Buka moris tuir justiça,

Buka hanoin de’it lialós. Refrão

 

Ida nebé la foti lia bosok,

La halo aat ba ema seluk,

La hakribi nia maluk. Refrão

 

Ida nebé la moris aat,

Maibé, halibur ho sira nebé hamta’uk Maromak,

La soe lia nebé hakotu ona. Refrão

 

Ida nebé la hein atu selu nia kolen,

La kohi hatatan ema laran kmaus:

Ema ne’e sei la monu. Refrão

 

Segunda Leitura                                                                                                                                                                         Col. 1, 24-28

Lia housi São Paulo nia surat ba sarani sira iha Colósso:

Maun-alin sira: Iha oras ne’e daudaun, ha’u haksolok, basá, ha’u terus tan imi. Ha’u tau mai ha’u an rasik Cristo nia terus, tan Cristo nia isin lolon mak Kreda. Ha’u sai Cristo nia Na’ilulik, basá, Maromak haraik knaar ne’e mai ha’u: atu haklaken Maromak nia lia-fuan ba imi. Lia-fuan nebé Maromak subar hela ba tempo no otas uluk nian, maibé, ohin loron, Maromak fo hatene ona ba sarani sira. Maromak hakarak fo hatene ba sira oin sá mistério ne’e nia kbiit wa’in teb-tebes ba gentio sira: Cristo iha imi nia leet hodi fo laran metin, atu imi hetan glória. Ami haklaken Cristo, wainhira ami ko’alia ba ema hotu-hotu hodi hanourin sira ho ami nia matenek tomak atu lori sira hotu ba kmanek nebé Cristo haraik mai.

Maromak Futar Lia.

 

Aclamação                                                                                                                                                                                          Lc. 10, 42

Refrão : Aleluia, Aleluia!! Repete-se

Iha buat di’ak ida de’it.

Tebes, Maria hili ona kmanek ne’e. Refrão

 

Evangelho                                                                                                                                                                                     Lc. 10, 38-42

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus tama tiha iha knua ida. Feto ida, naran Marta, simu Jesus iha nia uman. Marta iha alin feto ida, naran Maria. Maria tur besik Jesus nia ain, hodi rona hela Jesus ko’alia. Marta fali serviço maka’as iha uma laran. Tan ne’e Marta hateten, hodi hasa’e lia ba Jesus: “Na’i, Ita la haré katak ha’u alin ne’e husik ha’u kaer mesak serviço? Dehan ba nia, mai tulun ha’u!” Jesus lia tun ba Marta: “Marta! Marta! Ó hanoin buat barak, ó la’o kole ba buat oi-oin. Maibé, buat ida de’it mak lós liu. Maria hili ona buat di’ak ne’e. Di’ak ne’e, ema ida sei la hasai housi nia”.

Lia Maksoyn.

 

 

Reflexão :

KAER TELEMÓVEL VS KAER TERÇO

Aman sadia ami basá, ami:

  • Enche pulsa ba telemóvel barak liu fali tau osan ba caixa esmola.
  • Kaer telemóvel barak liu do que kaer Terço”.
  • Le chat iha facebook barak liu do que le Bíblia”.
  • Koalia Telefone mak barak liu do que visita família”.
  • Loke ibun koalia bobar do que “hakneak” koalia ho Maromak.
  • Selfie foto barak liu do que haré Jesus nia imagem iha Sacrário.

Oh Aman perdua ami. Basá,….

  • Ami sosa pulsa 1 dollar sente la too maibé ami tau esmola 1 dollar boot demais.
  • Tulun ami atu ba oin, ami bele limite kaer telemóvel hodi fo biban ba kaer terço.
  • Halo ami aprende hamate-an hodi simu ami nia Cruz…hodi tuir Jesus.

Amen.

Na’i sê mak bele hela iha ita kadunan? Ida nebé la foti lia bosok, Ia halo aat ba ema seluk, Ia hakribit nia maluk. Esudante matebian João Bosco Colo Batan nebé ema oho iha Jogjakarta-Indonésia halo Timor oan barak inclui ninia maluk estudante indonésio sira sente triste. Pior liu mak, liu husi media social, ita bele desconfia katak motivo husi Bosco nia mate nee tanba arte marciais. Motivo seluk nebé halo ita hanoin la too mak; desconfia katak matebian Bosco nee maluk Timor oan seluk mak oho fali. Tuir boatus nebe espalha no seidauk confirmado katak; motivo seluk husi assassínio (pembunuhan) nee, além de arte marciais, mak problema osan.

Será que wainhira matebian hanesan Bosco mate tiha, problema remata ona? Lae? Ida nee sei hamosu tan ódio no vingança ba tempo naruk. Prémio saida mak ita hetan wainhira ita oho ema ida tan deit nia la pertence ba ita nia grupo? Valor saida mak ita hetan wainhira ita defama ema husi partido seluk tan deit nia la pertence ba ita nia partido?

Amu Papa Francisco tinan 2 rua liu ba wainhira visita America Latina, iha Homília hateten; “Ohin loron ema hadau malu halibur riku soin too haluha tiha Jesus Cristo”. Iha contexto Timor Leste nian, político sira hadau malu ukun, arte marcial sira hadau malu recruta ema hodi hatudu massa (quantidade membro), povo inocente sira hadau malu caixão.

Evangelho São Lucas semana nee convida ita nobun hodi halo balanço entre isin lolon nia precisa no klamar nia precisa (ORA et LABORA). Evangelho haktuir kona ba Marta ho nia alin Maria iha Betânia besik Jerusalém. Enquanto iha primeira Leitura Abrrão ho haraik-an acolhe (simu) bainaca nain tolu nebé lao liu husi nia barraca. Leitura rua nee nia lalaok principal hakarak justifica kona ba obrigação ita ema precisa rona bebeik Maromak nia Lia fuan no aplica iha moris liu hosi acolhemento ba ema hirak nebé ita haré precisa duni ita nia acolhimento. 

São Lucas nia lia menon (Mensagem) indica ka endereça ba ema hot-hotu la fihir ba ema balu deit maibé, lia menon nee hatoo ba se deit, iha nebé deit no wainhira deit.  Iha história nee mos afirma katak; laos perfeição iha prática hahalok diak mak importante liu maibé, capacidade hodi distingue saida mak essencial/importante/necessário/ ba ita, ida nee mak importante liu nebé Maria hili tan Maria hatene Rona Maromak nia Lia Fuan.

 Iha Evangelho mos ita rona rasik Jesus dehan:”«Marta, Marta, andas inquieta e perturbada com muitas coisas; mas uma só é necessária. Maria escolheu a melhor parte, que não lhe será tirada// Marta, Marta, engkau kuatir dan menyusahkan diri dengan banyak perkara, tetapi hanya satu saja yang perlu. Maria telah memilih bagian yang terbaik, yang tidak akan diambil dari padanya” (Luk 10:41-42)”.

Maria nudar Jesus nia escolante escolha/hili buat nebé importante liu hodi simu nia bainaca (tamu). Maria fo laran tomak. Nia la reserva buat balu iha nia fuan tomak. Maria presente totalmente iha encontro ho Jesus nee.

Presença bainaca (Jesus Cristo) nee mak sai Maria nia centro atenção. Figura Marta ho Maria nian sai hanesan figura modelo rua, formato rua, maneira rua nebé dala barak ita enfrenta nudar posição no lalaok iha moris lorloron.

Jesus bolu atenção ba Marta hodi dehan:”Maria hili buat nebé kmanek liu iha nia moris”. Ita nia mundo tecnológica ohin loron halo ita sai mayat bergerak (cadáver móvel-pocong) tanba ema ida-idak tau telemóvel nudar centro atenção do que halo interacção ho ema ruma nebé koalia dadaun iha ita nia oin. Ema lao iha estrada hakruuk liu ba ecrã telemóvel do que haré sinais transito sira. Iha missa laran mos ema sei cek status Facebook do que rona explicação ou leitura sira.

Iha experiência moris loro-loron, existe actividade oi-oin nebé ema precisa ou tem que halo hodi bele supera problema oi-oin nebé ema hasoru no bele atinge mehi ba moris diak. Maibé, iha sorin seluk, precisa mos tempo balu nebé ita precisa duni fo biban oitoan ba Maromak iha oração, buka fatin hakmatek no hanoin (contempla) Maromak nia diak sira atu nuné, ita nudar ema fraco bele supera dificuldade oi-oin nebé mosu la nahas. Atitude Maria nian perante Jesus, ita bele haré oinsa ita atende ita nia bainaca sira iha convivência loro-loron. Oinsa ita servi bainaca sira nebé mai liu husi ita nia fatin. Abraão hatudu exemplo ba ita iha Primeira Leitura.

Tanba nee mak Evangelho Domingo hatudu mai ita oinsa, ita bele distingui ka coloca lalaok nebé monu liu ba Maromak nia laran do que lalaok nebé sai hanesan sensasi deit atu ema haré ita. Político ba sai conhecido tanba defende mate-an sira nia partido, balu defende figura central iha partido, objecto husi sira nia política mak povo nia diak. Maibé se ita haré didiak, ita bele nota katak; político hirak nee iha motivo rua deit; ida defende tanba nee pertence ba sira nia vocação nudar política. Motivo seluk mak tauk lakon cadeira, então tem que defende mate bandeira hun hodi atrai atenção público (povo) no atenção lider partido (Alias Asal Bapak Senang).

 Precisa ita recorda fila fali buat nebé Jesus hatete ba Marta nudar menon ida mos ba ita nobun; Jesus lia tun ba Marta: “ Marta! Marta! Ó hanoin buat barak, ó la’o kole ba buat oin-oin. Maibe , buat ida de’it mak los liu. Maria hili ona buat di’ak ne’e. Di’ak ne’e, ema ida sei la hasai housi nia”. Lalaok hanesan mos Abraão hatudu wainhira nia atende ema nain tolu nebé viagem liu husi nia hela fatin. Iha neba, ita bele contempla oinsa Abraão hatudu ninia maneira keramahtmahan (hospitalidade) ba ema nain tolu nebé nia la conhece maibé nia respeita nafartin sira.

Iha Evangelho, Jesus hakarak sublinha liu lalaok nebé hanaran Hospitalidade. Iha experiência lorloron, so rona deit mak termos Hospital nudar fatin ema ba trata saúde ou ba baixa hodi hetan tratamento saúde nebé efectivo. Hospitalidade nebé Jesus pretende hanorin liu husi visita ba Betânia mak lalaok nebé ema Indonésia hanaran keramahtamahan (hospitalitas/hospitalidade) wainhira ita atende bainaca ruma nebé mai visita ita nia hela fatin.

Afinal, chave ba hospitalidade (acolhemento) ou keramah tamahan Cristão nian mak laos consiste iha dilema entre actividade (Activo) ho contemplação (Passivo) maibé, consiste iha merecimento; oinsa atende ema bainaca ho digno hafoin presta atenção hodi rona sa mensagem mak bainaca nee tatoli mai ita. Laos bainaca koalia mesmesak, uma nain preocupa ho buti telefone, cek status facebook nebé desvia bainaca nia objectivo visita ou pior liu tan uma nain preocupa mesmesak ho nia atende telemóvel ou buat seluk ruma.

            Ita ema consciente ou lae, sempre iha desafio eh barreira balu iha ita nia–an rasik. Iha possibilidade boot enfrenta rasik ita nia problema sira. Nuné, ita tau atenção barak liu ba ita nia problema rasik. Ita indiferença eh cuek ho ema seluk nia condição. Ema seluk nee, estranho ba ita. Habadak lia, ita dalaruma atende ema la diak, dalaruma ita halo atendimento nebé hatudu demais atu ema seluk haré. Fo ajuda ema ruma, bolu media halo cobertura, hasai foto posting iha Facebook ou instagram. Halo cerimónia boot ruma nebé atrai ema seluk nia atenção maibé, haluha tiha fo atenção ba ema nee nia objectivo visita humanamente.

Iha relato Evangelho, Marta bele aprende no sente moris lição moris be klean. Tuir lolos, prepara deit cafe simples ruma ba Jesus, sei vale liu no monu ba Jesus nia laran do que preocupa demais até ho nia alin protesta malu tan iha Jesus nian oin. Político sira gosta trata malu iha media social hodi atrai povo nia simpatia maibé, sira haluha katak; ninia qualidade serviço, ninia credibilidade nudar político laos sukat husi status faceook maibé, hatudu ba povo liu husi cumpri promessa no garante qualidade serviço.

Se lae jovem sira ohin loron dehan garganta paralon, koalia kaben boot.  Maria atenção liu hodi rona Jesus nia hanorin basá, nia hatene katak maneira nee mak merece liu. Nudar político precisa defende duni ho fuan laran saida mak povo precisa. Laos tanaat povo nia voto liu husi satatus facebook. Tanba nee mak Jesus fo hanoin ba Marta hodi dehan;” “ Marta! Marta! Ó hanoin buat barak, ó la’o kole ba buat oin-oin. Maibe , buat ida de’it mak los liu. Maria hili ona buat di’ak ne’e. Di’ak ne’e, ema ida sei la hasai housi nia”. Hakbesikbebeik ba Maromak iha oração tuir fiar sarani nian, halo ita hatene haraik-an hodi servi ema seluk no fo glória ba Maromak.

Lalaok Maria nian nee tulun Marta hodi compreende lalaok digno oinsa sai Jesus nia escolante (ema nebé fiar Jesus). Escolante lolos mak hirak nebé hakmatek hodi rona no halo tuir saida mak mestre (Jesus) hanorin. Laos preocupa liu ho telemóvel, laos preocupa liu ho SDSB, laos siik mehi tun sae. Pior liu tan tau esmola 25 centavos maibé, protesta atu Uma Kreda halo tuir deit nia hakarak tanba ninia 25 centavos oan nee.

 Maromak tau ita iha mundo, Maromak fo ona hanoin atu ita Moris tuir saida mak Maromak hakarak. Rona no atende didiak ema seluk mos sai hanesan condição eh syarat ida atu ita contempla Maromak nia diak sira. Maria hili ona buat nebé diak liu ba nia. Oinsa ho ita sira seluk nebé, seidauk hili buat diak nebé Maromak prepara mai ita? Keta ita hili telemóvel no trata malu iha media social mak diak liu? Seja Louvado Nosso Senhor Jesus Cristo…..para sempre seja Louvado a Sua Mãe Maria Santíssima. (Ignaslopes) 

Leave a Reply

Your email address will not be published. Required fields are marked *