shadow
Diocese de Dili > NOTÍCIAS > LETURA DIÁRIA > Quarta – Feira, XVI Semana Tempo Comum (ANO C)

Quarta – Feira, XVI Semana Tempo Comum (ANO C)

Primeira Leitura               Ex. 16. 1-5, 9-15

Lia housi Livro Êxodo:

Iha loron hirak nebá, Israel oan sira sai housi Elim hodi ba to’o iha rai fuik maran Sin nian, iha Elim no Sinai nia leet, iha loron sanulu resin lima, fulan ba dala rua, sira sai tiha housi rai Egipto. Israel oan sira hotu hahu hamúu hasouru Moisés no Aarão iha rai fuik maran. Israel oan sira dehan ba sira na’in rua: “Kala di’ak liu ami mate tiha ona karik iha rai Egipto iha Maromak nia liman, wainhira ami tur hein hela naan iha sanan, wainhira ami han pão tuir ami nia hakaran! Imi lori ami mai rai fuik maran ida ne’e atu halo povo ida ne’e mate hotu tan hamlaha”.

Tan ne’e, Maromak lia tun ba Moisés: “Ha’u sei hatun aihan housi lalehan mai ba imi. Povo sei sai ba hili aihan ne’e, naton de’it ba loron ida-idak nian. Nune’e, Ha’u hakarak haré povo ne’e tuir eh la tuir Ha’u nia lei. Iha loron neen, wainhira sira prepara buat nebé sira lori mai, sira hetan dala rua liu fali ida be bai-bain sira hili lor-loron”.

Moisés dehan ba Aarão: “Fó hatene lia ne’e ba Israel oan sira hotu: ‘imi hatudu-an ba Na’i, basá Na’i rona ona imi nia hamúu’”. Wainhira Aarão ko’alia ba Israel oan sira, sira fila oin ba rai fuik maran, Na’i nia glória mosu mai iha kalohan ida. Tuir mai, Na’i lia tun nune’e ba Moisés: Ha’u rona Israel oan sira nia lian hamúu nian. Ó ba fó hatene ba sira: ‘Ohin loro kraik imi sei han na’an, aban dader imi sei han pão to’o bosu. Nune’e, imi sei hatene katak Ha’u mak Na’i, imi nia Maromak’”. Mosu duni kiukae barak teb-tebes to’o taka metin sira nia batane. Iha fali dadersan, mahawen labis ida hadulas tiha sira nia batane. Wainhira mahawen ne’e maran tiha, mosu iha rai leten buat oak ida hanesan wé nia nafurin be taka rai. Hare tiha ne’e, Israel oan sira husu ba malu: “Man-hu?”, katak, sá mak ne’e? Basá, sira la hatene sá mak buat ne’e. Moisés hateten ba sira: “Ne’e aihan, nebé Maromak haraik ba imi atu han”.

Maromak Futar Lia.

 

Salmo Responsorial                                                                                                Ex. 77(78). 18-19, 23-24, 25-26, 27-28 (R. 24b)

Refrão : Na’i haraik ba sira pão Lalehan nian!!! Repete-se

Sira koko Maromak iha sira fuan,

Husu atu haraik aihan furak ba sira.

Sira hamúu hasouru Maromak hodi dehan:

“Maromak sei bele fó aihan mai ita iha rai fuik maran?”. Refrão

 

Nia haruka kalohan sira iha leten áas ba,

No Nia loke odamatan lalehan;

Nia hamonu maná hodi fó han sira.

Nia haraik pão Lalehan nian ba sira. Refrão

 

Ema han anjo sira nia aihan,

Maromak haraik aihan wa’in ba sira.

Halo anin huu housi loro sa’e,

Hodi anin Tasi mane hatudu Nia kbiit. Refrão

 

Na’an monu iha rai hanesan rai rahun;

Manu sira wa’in tebes hanesan rai-henek tasi nian,

Sira monu iha acampamento nia klaran,

Iha sira nia tenda nia sorin-sorin. Refrão

 

Aclamação                                                                                                           

Refrão : Aleluia, Aleluia!! Repete-se

Fini mak Maromak futar-liafuan, Cristo mak kari fini.

Sé mak buka hetan fini ne’e, sei hela tinan-ba-tinan. Refrão

 

Evangelho                                                                                                                                                                                          Mt. 13. 1-9

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus sai housi uma hodi tur iha tasi ibun. Ema barak teb-tebes mai hale’u Nia; tan ne’e Nia tur iha ro ida nia laran, ema lubun boot tur iha tasi ibun. Nia hanourin buat barak tebes ba sira ho aiknanoik dehan: “To’os na’in ida ba kari fini iha to’os laran. Nia kari fini daudaun, balu monu iha dalan ninin, manu sira mai han. Fini seluk monu iha fatuk laran iha nebé rai uitoan de’it; sira ne’e moris kedas basá rai la dun kle’an; maibé loron sa’e. sunu tiha sira tan abut la iha, hafoin sira sai maran. Fini seluk monu iha aitarak laran; aitarak sira moris mai, hanehan sira to’o mate. Fini seluk monu iha rai di’ak hodi fó fuan: balun dala atus ida, seluk neen nulu; seluk fali tolu nulu. Ema nebé iha tilun, rona ba!”

Lia Maksoyn.

Leave a Reply

Your email address will not be published. Required fields are marked *