shadow
Diocese de Dili > NOTÍCIAS > LETURA DIÁRIA > Sexta – Feira, XVI Semana Tempo Comum (ANO C)

Sexta – Feira, XVI Semana Tempo Comum (ANO C)

Primeira Leitura                      Ex. 20, 1-17

Lia housi Livro Êxodo:

Iha loron hirak nebá, Maromak dehan liafuan hirak ne’e hotu: “Ha’u mak Na’i, ó nia Maromak; Ha’u mak hasai ó housi rai Egipto, housi moris atan nian; ó la iha tan maromak seluk; mak Ha’u de’it.

Ó la bele badaen naran ilas housi buat iha lalehan tutun, eh housi rai nian, eh housi wé okos nian. Ó keta tuku tur ba rai hana’i ba sira. Ha’u mak Na’i, ó nia Maromak, Maromak nebé hakarak hana’i de’it Nia. Ema sira be heuwai Ha’u, Ha’u sei castigo nia oan ho bei-oan ba bei-oan sira tan amn inan sira nia salan; maibé, sira nebé hadomi Ha’u, halo tuir Ha’u nia ukunfuan, Ha’u sei hatudu laran-luak ba sira nia derasaan rihun ba rihun.

Ó keta temi Na’i, ó nia Maromak naran atu tahan lia nebé hun abut la iha, basá, Na’i fó castigo ba ema nebé temi Nia naran hanesan ne’e.

Ó sei hanoin nafatin loron sábado atu ó hala’o nia nu’udar loron santo. Iha loron neen nia laran mak ó sei káer serbisu hodi halo buat hotu nebé ó atu halo. Maibé, ba bain hitu mak loron sábado, loron hamahan-an (descansa) nian, loron ó Maromak nian. Ó, ó nia oan mane eh oan feto, ó atan mane eh atan feto, ó nia balada dian sira, eh ema rai seluk nian be hôrik ho ó la bele halo naran serbisu ida; basá, Maromak halo lalehan, rai, tasi no buat hotu nebé sira iha, iha loron neen nia laran; maibé to’o bain hitu nia hamahan-an. Tan ne’e, mak Na’i haraik bensa hodi halo santo loron sábado.

Ó sei hamta’uk ó aman no inan; halo nune’e, ó nia moris sei naruk iha rai nebé Na’i, ó Maromak haraik ba ó.

Keta oho; keta halo adultério; keta na’uk; keta foti lia bosok hodi kesar ema. Keta kaan ema nia uma; keta kaan ema nia kabén no ema atan mane eh atan feto, karau eh kuda, naran buat ida nebé ema soi.

Maromak Futar Lia.

 

Salmo Responsorial                                                                                                                  Sal. 18(19). 8, 9, 10, 11 (R. Jo. 6. 68c)

Refrão : Na’i, Ita iha liafuan moris rohan laek nian!!! Repete-se

Na’i Nia lei ós tebes, hamoris ema nia laran.

Na’i Nia haruka metin tebes,

Fó matenek ba ema haraik-an sira. Refrão

 

Na’i Nia ukunfuan lós tebes,

Sira haksolok fuan.

Na’i Nia lei sira mós tebes,

Leno ita nia matan. Refrão

 

Hamta’uk Na’i, mós tebes,

Hela metin tinan-ba-tinan,

Na’i tesi lia ho lialós tebes;

Nia hanoin sira hotu mesak lós duni. Refrão

 

Nia liafuan folin boot liu osan mean,

Osan mean nebé kmook liu.

Sira midar liu wani wén,

Wani wén nebé midar tebes. Refrão

 

Aclamação                                                                                                                                                                                             Lc. 8. 15

Refrão : Aleluia, Aleluia!! Repete-se

Ksolok ba sira nebé rona Maromak Nia liafuan ho neon

no laran hodi fó fuan, tan sira laran metin. Refrão

 

Evangelho                                                                                                                                                                                     Mt. 13. 18-23

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus lia tun ba escolante sira, dehan: “Ne’e duni imi rona didiak aiknanoik kona ba ema nebé kari fini iha to’os. Fini nebé monu iha dalan ninin hanesan ema nebé rona liafuan reino nian maibé la hatene lolós. Ida nebé áat mai, no hasai buat nebé kuda tiha iha ema nia laran. Fini nebé monu iha fatuk laran mak ida nebé rona liafuan hodi simu kedas ho ksolok. Maibé tan abut laiha, nia mate lalais; hetan tiha susar eh terus tanba liafuan, nia monu kedas. Fini nebé monu iha aitarak laran mak ida nebé rona liafuan maibé knaar sira no riku soin mundo ne’e nian hanehan liafuan ne’e; halo nia la fó fuan. Fini nebé monu iha rai di’ak mak ida nebé rona liafuan hodi hanoin didi’ak: ida ne’e fó fuan dala atus ida, ka neen nulu, ka tolu nulu”.

Lia Maksoyn.

Leave a Reply

Your email address will not be published. Required fields are marked *