shadow
Diocese de Dili > NOTÍCIAS > LETURA DIÁRIA > Quinta – Feira, XVII Semana Tempo Comum (ANO C)

Quinta – Feira, XVII Semana Tempo Comum (ANO C)

Primeira Leitura             Ex. 40. 16-21, 34-38

Lia housi Livro Êxodo:

Iha loron hirak nebá, Moisés hahu hala’o serviço, no hala’o lolós buat hotu nebé Na’i haruka nia atu halo. Iha loron ida fulan uluk ba tinan dala rua nian, nia hari Tabernáculo nune’e: nia hahu ho nia hun, taka ai-kabelak mahar, hari ai-riin hodi hodi tula ai travessa iha leten. Tuir mai, nia nahe Tenda iha Tabernáculo nia leten no tau housi leten Tenda nia hena, tuir Na’i haruka. Moisés káer iha ai-kabelak Lei nian hatama iha Arca; nia hatama báculo sira iha Arca, iha Arca nia leten vaso osan mean nian. Tuir fali, nia lori Arca hatama iha Tabernáculo laran atu hamahan Arca Lei nian, nia taka véu ida iha leten, tuir Na’i haruka.

Hafoin, kalohan taka metin Tenda Hasouru Malu nian, no glória Na’i nian hakonu Tabernáculo. Moisés la bele tama iha Tenda Hasouru Malu nian, tan kalohan hela iha nia leten no glória Na’i nian hakonu Tabernáculo.

Wainhira kalohan housi Tabernáculo leten sa’e, Israel oan sira sai housi sira tenda hodi ba iha liur. Maibé, wainhira kalohan la sa’e, sira sei hein to’o kalohan ne’e sa’e, hafoin sira sai. Basá, iha loron, kalohan Na’i nian, taka Tabernáculo nia leten; iha fali kalan, ahi mak lakan iha nia laran, nebé leno uma kain Israel nian tomak, housi fatin nebé sira hakarak la’o.

Maromak Futar Lia.

 

Salmo Responsorial                                                                                                                      Sal. 83(84). 3, 4, 5-6ª, 8ª, 11 (R. 2)

Refrão : Ita, Nia templo kmanek tebes, Na’i, Lalehan no Rai nian!!! Repete-se

Ha’u klamar neon sala,

Hodi hanoin Na’i nia kadunan;

Ha’u an tomak no ha’u isin

Haksolok iha Maromak moris. Refrão

 

Manu sira lalehan nian hetan hela-fatin,

Koá-lelok (Andorinha) halo knu’uk ba nia oan sira;

Besik Ita Altar, Na’i klibur funu-na’in nian,

Ha’u nia Liurai no ha’u nia Maromak. Refrão

 

Ksolok ba sira nebé hôrik iha Ita uma,

Sira bele hahí Ita loron kalan.

Ksolok ba sira be hetan kbiit iha Itaboot,

Sira la’o ba atu haré Maromak iha Sião. Refrão

 

Loron ida iha Ita kadunan

Di’ak liu fali rihun ida dook housi Ita.

Ha’u hakarak hôrik iha Na’i nia uma-labis,

Liu fali hela iha tenda ema sala na’in sira nian. Refrão

 

Aclamação                                                                                                                                                                                 cf. Act. 16. 14b

Refrão : Aleluia, Aleluia!! Repete-se

Loke, Na’i, ami fuan atu simu futar

Liafuan housi Ita Oan Mane.  Refrão

 

Evangelho                                                                                                                                                                                     Mt. 13. 47-53

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus dehan ba ema lubun boot: “Reino lalehan nian hanesan dai ida nebé ema soe ba tasi hodi dada ikan sira, kiik no boot. Nia nakonu ona, hakail na’in sira dada ba tasi ibun; tur tiha, sira hili ikan di’ak sira hodi tau hamutuk iha lafatik; ikan nebé áat, sira soe tiha. Sei sai mós nune’e wainhira mundo to’o ona nia rohan: Anjo sira sei mosu hodi haketak ema áat sira housi ema di’ak sira. Hafoin sira sei soe ema áat sira ba ahi lakan manas: iha nebá sira sei tanis no ruun nehan”.

“Imi rona lolos buat hira ne’e hotu?” Sira hatan: “Ami rona”. Nia dehan tan ba sira: “Tan ne’e, escriba sira nebé matenek kona ba reino lalehan nian hanesan uma na’in ida nebé hasai buat foun no tuan housi nia rikusoin”.

Hanourin hotu tiha ho aiknanoik sira ne’e, Jesus husik rai nebá.

Lia Maksoyn.

Leave a Reply

Your email address will not be published. Required fields are marked *