shadow
Diocese de Dili > NOTÍCIAS > REFLEXÃO > DOMINGO COMUM XIX, ANO C

DOMINGO COMUM XIX, ANO C

Maun alin sarani doben sira, Na’i Maromak ninia futar liafuan iha domingo ida nee fo hanoin no hanorin ita atu moris iha mundo ne’e laos hanesan ema neon laek no fiar laek maibe moris hanesan ema nebe matan moris, neon nain, fiar nain no laran metin hun nafatin iha buat hotu nebe mak ita hanoin, ita halo no ita hasoru. Ida ne’e katak halao moris ida concientemente, hatene didiak buat saida mak ita hakarak, ita hanoin no ita halo mai ita ida idak ninia-an rasik, ba ita nia familia no ba ema sira seluk hanesan Maromak nia oan ka hanesan sarani ida.

Buat nebe sai airin no sasukat mai ita atu halao moris ida nune’e mak ita nia fiar no buat nebe sai roman mai ita atu bele halo moris ida nune’e mak Maromak ninia futar liafuan rasik. Basa hodi fiar no hodi Maromak ninia futar liafuan ne’e mak ita bele conciente no hatene didiak duni moris be ita halao hela nee, halao nundar ema sarani ida. Hodi hatene halao moris ida oinsa no atu lori ba nebe? Seim dúvida halao moris iha mundo no lori ba to’o lalehan. Nune’e mos hodi fiar no Maromak ninia futar liafuan nee mak ita bele hare mos buat lalehan nian sira nebe ita labele hare, ita bele laran metin halao moris ne’e, laran metin iha Maromak nundar ita nia Nai no nundar tulun nain nebe bele halo buat hotu mai ita tamba domin. Iha segunda leitura ita rona haktuir mai ita, ita aman fiar nian Abraão ninia moris be sai exemplo kmanek liu hotu mai ita kona ba moris ida nebe halo Maromak ninia futar liafuan no fiar mak sai nundar fundamento iha moris ne’e. Abraão iha ninia relaçionamento ho Maromak nia rona nafatin Maromak nebe koalia ba nia no tau fiar ho laran metin lolos iha deit Maromak no moris tuir Maromak ninia hakarak sira. Maromak nebe bolu nia husi rai Ur, no promete ba nia atu haraik rai ida ba nia hodi halo nia derasan sira sai wain iha mundo rai klaran. Tamba ne’e mak Abraão husik ninia rai hodi lao tuir no halo tuir Maromak ninia hakarak sira tomak. To’o wainhira Maromak husu nia atu hasae ninia oan mane Isaac nundar buat karan ida mos, nia halo tuir hotu. Abraão reflete ninia moris ho base rona nafatin Maromak be koalia ba nia no nia halao ninia moris tau fiar no laran metin lolos deit ba Maromak. Ho ne’e  nia hari relação fiar ho laran metin nian ida ho Maromak laos iha tempo balun deit maibe dura iha ninia moris tomak.

Nundar sarani ita mos iha ita nia moris tomak masque experiência moris hari relação ho Maromak ne’e la hanesan maibe fiar no laran metin nebe ita iha ba Maromak tem que hanesan deit ho Abraão nian, katak iha buat hotu nebe ita hanoin, ita hakarak no ita halo ita buka uluk nanain rona ba Maromak nebe koalia nafatin mai ita hodi hatudu dalan moris nian no hodi hakbiit ita ninia moris, tuir mai ho fiar no laran metin lolos halo tuir nafatin Maromak ninia hakarak. Maromak mak sai fundamento, sai we matan no centro ba ita nia moris laos ita ninia esforço no luta moris nian , neim sasan sira mak sai fundamento, we matan no centro ba ita ninia moris.

Evangelho ohin nian  fo roman mai ita hodi halo ita hatene katak iha ita nia moris fiar no laran metin be ita hari ho Maromak ne’e la sempre lao los deit maibe iha mos obstáculo barabark nebe ita hasoru. Obstáculo sira ne’e dala barak liu buka atu hafraku, harahun no halakon ita ninia fiar no ita ninia laran metin ba Maromak. Nune’e Evangelho convida ita atu iha prátuca ita nia fiar no laran metin ne’e ita tem que moris iha matan moris no neon nain ninia laran basa iha mundo ne’e iha mos diabo ho ninia oan ema at sira nebe hakarak hamate ita ninia fiar no laran metin ne’e. Ida ne’e katak ita percisa cuidado, hametin no haburas nafatin ita nia fiar ba Maromak. Wainhira ita nia fiar no laran metin laiha ona mak ita nia moris sei tama iha nakukun ninia laran be hatudu iha moris ida nakonu ho desordem, nakonu ona ho inquietação ka la hakmatek, ita lakon paz, lakon mos domin. Tan ne’e nundar sarani lolos loro-loron no iha momento hotu hotu ita percisa buka cuidado hodi hametin no haburas nafatin ita nia fiar ba Maromak ne’e iha prática moris ema sarani sira nian nebe tidin-an iha Maromak ninia futar liafuan no hatudu-an iha hahalok sira caridade, tulun nain, laran luak, compaixao, comprende nain, domin nain no paz nain ninia laran iha buat hotu nebe ita hanoin, ita hakarak, ita koalia no ita halo.

Maun alin sira, wainhira ita hateke itoan fila ba kotuk hodi hare ita nia pratica moris iha fiar, laran metin no ninia obstáculo sira dala ruma ita bele descobre katak los duni iha sorin ida ita moris klean duni iha ita ninia fiar no laran metin duni iha Maromak maibe iha sorin seluk ita bele hetan mos katak ita la moris klean no la moris los ita ninia fiar no ita la tau laran metin lolos ida iha ita nia Maromak. Ita bele descobre mos katak obstaculo no tentação atu la moris metin iha fiar no laran metin ba Maromak ne’e iha tempo ida ohin loron nian sai boot liu tan. Tentação no obstáculo atu husik ita nia fiar no la moris laran metin tamba deit ita la rona Maromak be koalia mai ita, ita rona fali mak ema sira seluk nebe mai hanorin doutrina seluk contrário husi ita ninia fiar. Hanorin sira nebe la considera Maromak hanesan Maromak, la considera  Jesus Cristo hanesan Maromak ninia oan mane mesak be ita nia Maksoin, la considera inan Virgem Maria hanesan Maromak ninia inan, ao contrário considera fali Maromak ho Maromak ninia oan mane be Maksoin-salvador ne’e hanesan ema baibain ida deit nebe bele halo buat boot sira, la comprende papel Virgem Maria be ema baibain ida duni maibe tamba ninia disponibilidade simu Maromak ninia Oan mane Maksoin mundo nian iha ninia kanotak halo nia sai Maromak ninia inan mas que nia laos Maromak. Nia Maromak inan duni basa Maromak halo-an ba ema liu husi ninia knotak no nia mak kous Maromak ninia Oan mane mesak.

Maun alin doben sarani sira, doutrina falço no contrário sira nee iha ita nia leet atu koko hafraku no sobu ita ninia fiar, sobu no halakon ita nia laran metin ba Maromak. Sira sei hanorin duni nune’e hodi dehan katak: ita nia prática moris sarani sira nian iha ita nia realção ho Maromak no ho maun alin santo sira seluk be horik hamutuk ona ho Maromak ne’e sala hotu, dehan ita ninia prática cultural sira be hatudu ita ninia identidade sira nee mos salah hotu hodi hanorin fali buat seluk nebe mai hanesan ideologia deit, nebe la reconhece Maromak hanesan Maromak maibe minimiza Maromak hanesan deit ema baibain ida. Hanorin sala sira ne’e dehan tan katak fiar nee la percisa pática, iha deit fiar to’o ona, nebe la percisa tuir sacramento sira, la precisa reza, la precisa oferece ka tuir sacrifício misa, la percisa halo caridade, la percisa fo sasin moris sarani sira nian be identifica ita nundar sarani ida.

 

Maun alin sira, hanorin ida hanesan ne’e halo fiar nee sai hanesan mos ideologia ida deit. Oinsa mak ita bele comprende se fiar nee seim pática? Oinsa mak fiar ne’e ita la halao fali iha moris loro loron nian? Se la pática fiar nee sei sai hanesan ideologia ida deit nune ikus mai moris ksolok, paz, domin, laran luak no laran metin concreto nee ita la hetan to’o halo ita lakon tan moris rohan laek basa wainhira la prática ita nia fiar ita nunca bele hare hetan buat lalehan nian sira nebe invisivel mai ita, ita sei labele hateke ba Lalehan hanesan ita ninia destino último, ita nunca bele experimenta Maromak ninia maksoin be sai fonte moris rohan laek nian mai ita.

Maun alin doben consciente ba ita ida idak ninia moris iha fiar no iha laran metin nee to’o oras ne’e dadaun oinsa, obstáculo no tentação ba ita nia fiar no ita nia laran metin iha Maromak boot oinsa ne’e mai ita nundar sarani continua hakasan rona nafatin ba ita ninia Maromak be koalia mai ita loro-loron hodi moris klean no metin liu tan iha ita nia fiar liu husi prática concretamente dalan moris sarani nian nundar Na’i Maromak haraik mai ita hodi nune ita bele moris kedas ona iha mundo ne’e realidade invisivel lalehan nian, bele hetan kedas ona maksoin ba ita ninia moris no ikus mai moris ida nune’e bele sai completa ka nakonu lolos hamutuk ho Maromak iha lalehan. Mai ita cuidado diak liu tan ita nia fiar, pratica klean liu tan ita nia fiar, hamtein no haburas liu tan ita nia fiar ba Maromak Aman, Oan no Espirito Santo hodi fiar no laran metin ba malu ho maun alin sira seluk iha ita nia moris hamutuk nundar familia Maromak mesak ida deit ninia familia. Amen.

 

Becora, 11.08.2019, Pb.

Leave a Reply

Your email address will not be published. Required fields are marked *