shadow
Diocese de Dili > NOTÍCIAS > Notícias > HISTÓRIA ESTAÇÃO MISSIONRIA NOSSA SENHORA DO ROSÁRIO DE FÁTIMA, TUTULURO HAHU HOUSI TINAN 1919 TO’O TINAN 2019

HISTÓRIA ESTAÇÃO MISSIONRIA NOSSA SENHORA DO ROSÁRIO DE FÁTIMA, TUTULURO HAHU HOUSI TINAN 1919 TO’O TINAN 2019

               Molok Same hamrik nu’udar Paróquia, Same sei pertence ba área Paróquia Alas nian, ne’ebe abrange área Município Manufahi tomak. Iha tempo nebá existe Estação Missionária rua mak hanesan; Estação Missionária tutuluro no Estação Missionária Hato-Udo. Atu facilita serviços pastorais iha área hirak ne’ebe mak dook housi centro da Paróquia (Alas), liu-liu kona ba oinsa hanourin doutrina ba sarani sira, especialmente iha área Estação Missionária Tutuluro, nune’e iha tinan 1915, Pároco Alas fihir no hili nu’udar primeira catequista iha rai Tutuluro mak Sra. Guimar da Costa ho nia kaben Tomas da Costa.

               Provisoriamente catequista ne’e halao nia kna’ar iha rai Badan, povoação Dalun, Suco Tutuluro, durante tinan ida nia laran (1915-1916). Hare ba katak; fatin ne’e ladun sai centro ba povoação hitu (7) ne’ebe pertence ba Suco Tutuluro, nune’e Pe. Laranjeira, nu’udar pároco Alas, haruka muda fali ba rai Bubulau, povoação Aileu, Suco Tutuluro. Fatin ne’e sai centro pastoral durante tinan tolu (3) nia laran. Ikus mai depois Pe. Laranjeira troca ho pároco foun, ema Indiano ho naran Pe. António Grebaldo da Conceição Fernandes, haruka muda fali mai iha Uma tutun, fatin actual agora. Iha fatin ne’e mak iha tinan, 1919, foin hari primeira capela housi sarani sira, ne’ebe organiza housi catequista Guiomar no liurai Evaresto no capela ne’e hamriik ho nia construção; rin ai, kakuluk du’ut no didilolon uja fafulu, iha tempo ne’ebe hanesan foti mos Nossa Snhora de Fátima sai nu’ur padroeira ba Estação Missionária ida ne’e. Iha momento nebá catequista Guiomer ho nia colaboradores sira atende mos necessidade doutrinal, la’os de’it ba tutuluro oan sira, maibe mos ba área suco vizinho sira hanesan Suco Holarua, suco Mindelo no Suco Fahinehan.

               Iha tempo nebá catequista Guiomar hare ema lubun boot ida maka mai aprende doutrina iha fatin ida ne’e ho distância ne’ebe dook, nune’e iha tinan 1939 ho conhecimento pároco Alas nian, nia hili caquisra auxiliar nain tolu (3) mak hanesan; Inês da Costa hodi ba hanourin doutrina iha Posto Administrativo Hatu-Udo, Maria do Céu ba hanourin iha uco Fahinehan, posto Administrativo Fatuberlihu, Liurai Adriano housi Daisua ne’ebe kaben ho Dona Maria housi Tutuluro simu Catecismo housi catequista Guiomar hodi ba hanourin doutrina iha Suco Daisua, Posto Adminstrativo Same. Nomos iha tempo hanesan Hipólito da Costa Martins[catequista Guiomar nia oan mane], ne’ebe foin remata nia estudo quarta classe iha Colégio Soibada hodi fila mai Tutuluro, no nia hetan nomeação housi Pe. António Grebaldo da Conceição Fernandes, hodi sai hanesan catequista principal hodi ba hanourin iha Suco Mindelo, Posto administrativo Turiskai to’o tinan 1942, hafoin nia fila fali housi suco Mindelo mai Tutuluro hodi troca nia inan catequista Guiomar da Costa.

                Iha tinan 1950, catequista Hipólito da Costa Martins hamutuk ho Liurai Calisto ho hanoin ida atu hari fali Capela ne’e ho nia construção uja fatuk ho rai mean, no halo duni construção ne’e, maibe la consegue tak kakuluk tanba udan ho anin bo’ot no halo naksobu tiha construção ne’e iha tinan 1951. Iha tinan ne’ebe hanesan (1951), processo construção ba Capela ne’e hahu halo fila fali ho airin ai, kakuluk du’ut no didilolon uja fafulu to’o tinan 1963.

                Iha tinan 1963 Amu Bispo Dom. Jaime Garcia Goulart, nu’udar bispo Dili nian fó apoio ba harí Capela iha rai Tutuluro. Nune’e Dom. Jaime haruka lori cemente housi Dili mai to’o iha rai Aileu. Atu material hirak ne’e mai to’o iha rai Tutuluro, catequista Hipólito da Costa Martins ho Liurai Remígio da Costa ne’ebe troca fali Liurai Calisto, sira nain rua hamutuk haruka sarani mane sira lao ain no balun ho kuda ba lori cemento hirak ne’e mai Tutuluro. Serviço ba construção capela ho tipo de construção uma fatuk ne’e, dirige housi Amu Aleixo Dias ne’ebe iha momento neba sai nu’udar Pároco Alas, hamutuk ho catequista no Liurai Tutuluro. Construção ne’e remata iha tinan 1966. Iha tinan ne’ebe hanesan, capela ne’e catequista ne’e hetan Inauguração housi Pároco Alas, Pe. Aleixo Dias. Depois de inauguração capela ne’e funciona to’o tempo invasão militar Indonesia.

               Hafoin Pe. Aleixo Dias muda tiha, iha tinan1967 mai fali Pe. Alberto de Araujo ho Pe. Aureo da Costa Gusmão nomeado housi Diocese hanesan Vigário Cooperador, hela iha Same hodi halao mos kna’ar Pastoral iha Estação Missionária Tutuluro to’o tinan 1973.

               Iha tinan 1973, mai fali Pe. Rafael dos Santos hela iha Same, hanesan Superior Missão hodi troca fali Pe. Alberto de Araujo ho Pe. Aureo da Costa Gusmão, hodi halao nia kna’ar pastoral hamutuk ho Padre sira seluk housi Paróquia Alas, troca malu hodi visita nafatin sarani Estação Missionário Tutuluro to’o 1975. Iha tinan 1975, invasão militar Indonesia, Capela ida ne’e sai subar fatin (abrigo) ba força Resistência sira inclui mos Proclamador Sr. Francisco Xavier do Amaral. Iha 1977, força Indonesia sira halo bombardeamento ho avião ba Capela ne’e hodi harahun tiha muro ka parede housi parte Oeste nian (kotuk) , no to’o ikus mai acontece rai nakdoko ne’ebe makas hodi harahun hotu parede sorin karuk no los, no hela de’it mak torre parte oin Capela nian.

               Iha tinan 1979, população tomak ho forçada housi tropa Indonesia sira, haruka muda housi Tutuluro ba hela provisório iha área Suco Letefoho nian, no altura neba catequista Luis Soares ne’ebe troca fali nia aman Hipólito da Costa Martins ho Chefe de Suco Tutuluro Marçal da Costa, hamutuk ho sarani sira, harí fali Capela kiik ida iha Atual Aeroporto Letefoho nia sorin, hodi halao nafatin oração no celebração Eucaristia housi Pe. Rafael dos Santos ho Pe. Carlos rocha Perreira.

               Iha loron 31 fulan Maio tinan 1985, Same hetan converção hodi sai Paróquia. nune’e Pe. Rafael dos Santos nomeado hanesan primeiro Pároco iha Paróquia Same. Ho ne’e automáticamente Estação Missionária Tutuluro muda housi Paróquia Nossa Senhora de Fátima Alas mai fali Paróquia Same.

               Hafoin população sira fila fali mai Tutuluro iha tinan 1989, população Aldeia fatin hitu (7) hela hamutuk iha Akadiru-tetuk hodi hari fali capela kiik ida ho rin besi, didilolon/parede fatuk ho orçamento geral do Indonesio no obra ne’e kaer direitamente housi PNS no militar Indonesia ne’ebe serviço hamutuk ho população Tutuluro oan sira, hodi halo hotu obra ne’e iha 1992 iha fatin refere. Iha momento neba Pároco maka Pe. Agustinho da Costa. Iha tinan ne’ebe hanesan, Aldeia fatin hat (4); Bubulau, Ailau, Hastetuk no Batas muda ba ida-idak nia knuan, hodi hari fali capela provisório ida iha Bubulau (1995), ho kakuluk kalen no didilolon fafulu to’o tinan 1998.

               No iha tinan 1994, Rev. Amu Bispo Dom. Carlos Filipe Ximenes Belo, mai visita Capela Antiga ne’e hodi celebra liturgia no fó nafatin motivação ba sarani sira atu labele lakon fiar no iha momento ne’e mos, Amu Bispo hateten; “Fatin ida ne’e bele usa hanesan fatin retiro ba Nailulik sira, se enquanto ita hotu iha kbiit atu bele harí fali capela ida ne’e iha aban bainrua”.

Iha tinan 1998, Pároco foun Pe. Gelasio Joaquim da Silva haruka muda fali capela Bubulau mai capela antiga Umatutun nia sorin, ho mudança sira ne’e hotu mak maka mosu hanoin balu housi catequista no sarani hodi halo cobransa ba sarani Tutuluro oan sira durante tinan ida nia laran ho montante osan mínimo tebe-tebes no hetan de’it $ 200,00(dolares atus rua). Hare ba orçamento ne’ebe iha la suficiente atu hodi hari fali capela ida ne’e, nune’e iha tempo ukun an ne’e, ami sarani hotu ho catequista sira hodi halo proposta ba governo liu housi Tutuluro oan ida ho naran Sr. Adérito Hugo da Costa. Ikus mai proposta ne’e dirige duni ba gabinete Primeiro Ministro Assunto Sociedade Civil iha Setembro 2010. Tuir mai iha fulan Outubro de 2010, proposta ne’e hetan nia resposta positivo hototal orçamento 20.000.00(dolar rihun ruanulu). Ho osan ne’ebe iha, catequista, Autoridade Local ho sarani sira Suco Tutuluro nian halo encontro no forma comissão ida atu hodi executa osan ne’e hodi sosa materiais no selu técnico no badaen sira. kona ba serviço harí capela ne’e, sarani sira housi povoação fatin hitu (7) mak voluntariamente halao. Maibe hare ba katak processo de construção tomak lao neneik liu quase tinan 4 nia laran ona, maibe ladauk hotu de’it, nune’e iha início de 2015, diácono Francisco Fernandes ho orientação housi Amu Pároco Pe. Sabino Pinto de Souza Gama, mai motiva fali sarani sira atu acelera seviço ne’e to’o remata. Nune’e iha ikus mai, iha tinan ne’ebe hanesan (2015) halao duni to’o remata no iha dia 30 de Outubro de 2015, capela ne’e hetan inauguração housi Pároco Same Pe. Sabino Pinto de Souza Gama.

 

CATEQUISTA SIRA NE’EBE HALAO KNA’AR IHA ESTAÇÃO

MISSIONÁRIA NOSSA SENHORA DO ROSÁRIO DE FÁTIMA TUTULURO

HOUSI TINAN 1915-2019

  1. Catequista Guiomar da Costa ho nia kaben Tomas da Costa halao sira nia kna’ar nu’udar catequista iha tinan 1915-1942. Ho duração serviço tinan 27 nia laran no ikus mai nia reforma. Catequista Guiomar mos ho orientação Pároco Alas nian, hili mos catequista auxiliar nain tolu iha tinan 1939;
  • Maria do Cêo, ba hanourin Doutrina iha Suco Fahinehan Posto Administrativo Fatuberlihu
  • Inês da Costa, ba hanourin Doutrina iha Posto Administrativo Hato-Udo Município Ainaro
  • Liurai Adriano, ba hanourin Doutrina iha Suco Daisua Posto Administrativo Same
  1. Catequista Hipólito da Costa Martins nomeado housi Pe. António Grebaldo da Conceição Fernandes hanesan catequista principal hodi ba hanourin doutrina iha Suco Mindelo Posto Administrativo Turiscai, housi tinan 1939-1942. Hafoin catequista Guiomar reforma tiha, catequista Hipólito da Costa Martins ne’ebe halao nia kna’ar iha Mindelo mai fali Tutuluro hodi troca nia inan Guiomar da Costa iha 1942-1973, ho duração tinan 31 nia laran to’o ikus reforma.
  2. Catequista Hipólito reforma tiha troca fali ho nia oan mane Luis Soares ho nia kaben Martinha da Costa halao sira nia kna’ar nu’udar catequista hahu housi tinan 1973-1982, no força Indonesia nian kaer nia haruka ba castigo iha Ainaro no ikus mai para serviço depois de hakna’ar an durante tinan 9 nia laran.
  3. Catequista Luis Soares ba castigo tiha, troca fali ho nia alin Antoninho Sarmento ho nia kaben Adelia Pereira halao sira nia kna’ar nu’udar catequista iha tinan 1982-1992 ho duração tinan 10 nia mate.
  4. Catequista Antoninho mate tiha troca fali ho catequista nain rua; Valentinho da Costa Noronha ho Joel Valdomar Martins. Catequista Valentinho Noronha toma conta Aldeia ha’at: Bubulau, Ailau, Hastetuk no Batas, hahu housi tinan 1992 to’o presente data iha capela Umatutun.
  5. Catequista Joel Valdomar Martins ho nia kaben Rosantina Lurdes Amaral hanourin doutrina ba sarani sira iha Aldeia tolu: Roin, Dalun no Socemera iha capela Akadiru-Tetuk hahu housi tinan 1992-1995.
  6. Iha tinan 1997, Joel Valdomar Martins para tiha, troca fali ho jovem ida naran Maria Hornai halao nia kna’ar nu’udar catequista iha tinan 1995-1997 ho duração serviço tinan 2 no ikus mai nia para.
  7. Hafoin catequista Maria Hornai para tiha troca fali ho Joelino da Costa Martins ho nia kaben Maria Eno halao nia kna’ar nu’udar catequista iha tinan 1997-2006, no Amu Pároco Pe. Gelagio Joaquim da Silva bolu fali nia serviço nu’udar escriturario iha cartório Paróquia Same. Ho duração serviço nu’udar catequista iha Tutuluro halo tinan Ualu(8).
  8. Ananias Hornai halao nia kna’ar nu’udar catequista hodi troca fali catequista Joelino hahu housi tinan 2006 to’o presente data.
  9. Iha tinan 2013, Vigário Paróquia Same, pe. António Quenser ho Conselho Pastoral nomos sarani Tutuluro oan sira, hili fali catequista antigo Hipólito da Costa Martins nia ona ida naran Teófilo da Costa ho nia kaben Virgínia da Conceição hodi halao nia kna’ar nu’udar catequista geral ba Estação Missionária Tutuluro hodi tau matan ba capela foun Akadiru-tetuk. Ao mesmo tempo hili mos catequistas auxiliar aldeia hitu(7) mak hanesan:
  • Adelina Prego housi Aldeia roin
  • Genoveva Cardoso housi Aldeia Dalun
  • Benvinda da Costa housi Aldeia Socemere
  • Manuel Martins housi Aldeia Bubulau
  • Antero da Costa housi Aldeia Ailau
  • Florindo da Costa housi Aldeia Hastetuk
  • Esperança da Costa housi Aldeia Batas.

Hodi halao sira nia kna’ar iha Estação Missionária Nossa Senhora do Rosário de Fátima Tutuluro to’o presente data.

 

Same, 13 de Agosto de 2019

Estação Missionária de Tutuluro

Paróquia Nossa Senhora de Assunção Same 

Leave a Reply

Your email address will not be published. Required fields are marked *