shadow
Diocese de Dili > NOTÍCIAS > REFLEXÃO > AFINAL JESUS LORI INSTABILIDADE MAI MUNDO?

AFINAL JESUS LORI INSTABILIDADE MAI MUNDO?

Leitura no Reflexão ba Domingo Comum XX, ano C

 

Primeira Leitura         Jer.  38,  4-6.  8-10

Lia housi Livru Profeta Jeremias:

Iha loron hirak nebá, ema boot sira iha rai judá, dehan ba liurai: “ita sei oho mate tiha Jeremias, basá, ho nia lia fuan, nia hata’uk povo, halo neon nakraik soldado sira nebé sei hela iha cidade ne’e. Jeremias la buka povo, nia di’ak, maibé buka povo nia rahun aat.” Liurai Sedequias hatán ba sira: “Jeremias iha imi nia liman. Liurai la iha buat ida atu hateten hasouru imi”. Nune’e, sira kaer Jeremias; ho tali, sira hatún nia ba we-knuuk liurai oan Melquias nian, besik kadeia oin. We-knuuk ne’e, maran hela, iha de’it tahu. Jeremias tun ba, mout ita tahu laran. Ema ida husi rai Etiopia, naran Ebedmelech, serviҫo iha liurai nia uman, nia ba hasouro liurai, hodi dehan: “ami liurai, ema sira ne’e hahalok aat teb-tebes; haterus profeta hanesan ne’e la di’ak. Sira hatama tiha Jeremias iha we-knuuk. Iha nebá nia sei mate hamlaha,  basá, pão la iha ona cidade laran.  Nune’e, liurai hatán ba nia: “lori ho ema Na’in tolu ne’e ba hasai tiha  profeta Jeremias housi we-knuuk, keta halo nia mate”.

Maromak Futar Lia.

 

Salmo Responsorial                                                                                                                                                 Sal. 39(40), 2-3. 4-18

Refrão : Na’i, mai lalais sadia ha’u!!!  Repete-se

Ha’u tau laran ba Maromak:

Na’i, se tilun, rona ha’u lian.

Hasai ha’u klamar housi mate,

Hametin ha’u ain fukun,

Halo ha’u sama rai metin. Refrão

 

Nia tau knananuk foun mai ha’u ibun,

Hananu hahi ha’u nia Maromak

Ema wa’in sei rona ho haraik-an,

Sei tau neon ba Maromak. Refrão

 

Ha’u ema ki’ak folin la’ek,

Maibé, Maromak bali ha’u nafatin.

Maromak ha’u nia kbiit,

Na’i, mai lalais; Refrão

 

Segunda Leitura                                                                                                                                                                         Heb.  12,  1-4

Lia housi Carta ba sarani Hebreu sira :

Maun alin sira: houri uluk ema kbahen barak teb-tebes fo sasin kona ba fiar. Sira barak, sira hanesan kalohan ida nebé hale’u ita. Tan ne’e, sóe tiha ita naha, soe mos salan nebé hale’u ita, hodi halai hasoru ho aten brani funu nebé mosu ita oin. Foti matan hateke Jesus: nia mak hatudu dalan fiar nian, nia mak sei halo fiar ne’e boot to’o rohan. Jesus la simu ksolok nebé nia bele simu, maibé, nia simu cruz, la ta’uk cruz nia todan. Ne’e duni, oras ne’e, nia tur iha Maromak nia futar sorin kwanan. Imi hanoin Jesus ba, nebé terus hodi ema maksalak sira fatin. Nune’e de’it mak imi sei aten brani nafatin, nune’e de’it mak imi laran sei la taridu, imi neon sei la susar. Imi seidauk funu hasouro sala, to’o fakar ran.

Maromak Futar Lia.

 

Aclamação                                                                                                                                                                                          Lc. 12,  49

Refrão : Aleluia, Aleluia!!! Repete-se

Na’i ko’alia : Ha’u mai tau ahi ba rai-klaran,

Ha’u hakarak ahi ne’e han namkari iha rai. Refrão

 

Evangelho                                                                                                                                                                                     Lc. 12, 49-53

Na’i Jesus Cristo nia Evangelho nu’udar Sao Lucas haktuir:

Iha tempo nebá, Jesus lia tun ba escolante sira: “ha’u lori ahi mai mundo rai klaran. Ha’u lakohi buat seluk. Ha’u hakarak de’it atu ahi ne’e han duni. Ha’u sei hein hela atu simu baptismo ida. To’o oras ha’u atu simu baptismo ne’e, ha’u laran susar teb-tebes; imi hanoin katak ha’u mai fo dame ba mundo rai klaran? lae; ha’u dehan kedas ba imi katak lae; basá, hodi ohin ba oin, ema Na’in lima sei haketak malu iha uma laran: Na’in tolu. Aman sei haketak malu ho oan mane, oan mane sei haketak malu ho nia Aman. Inan sei haketak malu ho nia oan feto, oan feto sei haketak malu ho nia inan. Banin sei haketak malu ho feto foun, feto foun sei haketak malu ho banin feto”.

Lia Maksoyn.

 

Reflexão:

AFINAL JESUS LORI INSTABILIDADE MAI MUNDO?

 

               Wainhira Jesus moris iha rai Belém, Evangelho São Lucas haktuir katak; Anjo tatoli Lia Ksolok dehan: ”Glória ba Maromak leten aas ba, dame iha rai-klaran ba ema sira be Nai hadomi (Lc 2,14)”. Maibe, Evangelho São Lucas semana nee relata fali buat contrário ida nebe Jesus rasik mak pronuncia Lia Fuan kroat be hateten: ”Ha’u lori ahi mai mundo rai klaran. Ha’u lakohi buat seluk. Ha’u hakarak de’it atu ahi ne’e han duni…. imi hanoin katak ha’u mai fo dame ba mundo rai klaran?…lae…! lae..! laos dame maibé, conflito…”.

               Jesus nia lia kroat nee mos tatoli too mai ita nobun sarani zaman now……atu ita mos bele alerta (matan moris-neon nain) hodi entende Lia fuan nee atu ita habelun (bergaul) ho Maromak, rona no le Maromak nia futar lia fuan iha Bíblia ou livro leitura litúrgica sira, hakbesik-an ba Maromak ho esperança, no concretisa ita nia fiar liu husi simu Jesus nia futar Isin no Ran iha Eucaristia.

               Nudar ema, Jesus hasee (bolu) ema ho meio humano (dalan ema nian). Nudar educador nebe perfeito, Jesus hatene maneira nebe diak liu hodi revela Nia-An no hatoo Ninia doutrina ba ema sira nebe rona Nia. Dalaruma mos Jesus hatoo Ninia doutrina sira ho maneira no linguagem simbólica, halo ema la compreende até confusão no pior liu tan maluk balun interpreta literal deit saida mal Evangelho relata. Exemplo concreto mak ita lee iha relato Evangelho São Lucas nian iha Domingo semana nee.

               Tuir lolos, saida mak Jesus hakarak hanorin ba ita nobun basea ba Evangelho nee? Jesus hakarak convida ita atu matan moris neon nain. La bele passiva demais iha moris nee, la bele cuek (indeferença) ho moris nee, la bele buka diak deit iha moris nee. Halo netik buat diak ruma ba rai nee atu wainhira ita mate ema konta netik ita nia naran diakTanba nee mak Jesus dehan: “ha’u lori ahi mai mundo rai klaran”. Lia fuan lakan iha nee laos significa maldição ka confronto ruma hanesan acontece dadaun iha ita nia rai doben Timor Leste maibé, ahi lakan nee fo Naroman. Naroman nebe dada ema hotu nia atenção hodi hateke ba we matan naroman nee; Cristo. Ahi lakan iha contexto religioso (Catolicismo) significa presença Espírito Santo hodi haroman ita neon, hamos ita nia kan ten, ambição ba poder hodi endereça ita ba moris santidade tuir roman doutrina Cristinismo nian.

               Naroman nee tuir los sai hanesan murak mean ida nebe ema la bele cuek/indiferença nunee deit. Precisa haree ba ahi lakan nebe horas nee sunu dadaun ita nia fuan iha fatin hothotu. Sentido espiritual husi ahi nebe Jesus temi mak; Jesus nia presença iha mundo ho Ninia doutrina sira nudar murak mean ida nebe precisa ema simu ho reação positiva. Ita nobun nudar ema nebe simu ona Baptismo sai ona Cristão, la bele cuek ba Nai Jesus nia presença iha mundo nee, iha sociedade, iha comunidade, iha família hanesan ahi nebe lakan la nahas.

               Ema santo sira nebe ita hatene iha Igreja nia história no mos santo hirak nebe la consegue ema barak hatene, sira consegue moris nudar Cristão nebe durante sira nia moris tomak sempre halo sira nia moris lakan hanesan ahi Inan Jesus Cristo. Sira nia fuan hanesan Jesus nia fuan nebe lakan halo sira sai nia moris fo roman ba ema seluk be buka Maromak.

               Iha contexto Timor Leste nian, valor moris Cristão hahu mihis ba bebeik. Ema nia naran sarani iha certidão deit maibé, iha prática valor gentio mak dominante liu. Caso político sira ataca malu iha media social sai consumo diária sociedade, caso ema soe bebe quinto-canto hodi fo sala feto nebe comete caso nee enquanto mane nebe o isin rua quase livre no ignorado, caso grupo arte marciais hana malu tan razão rai nain no rai liur, grupo apoiantes partido tolok malu iha media social (Facebook) hodid efende sira nia lider partido, caso ema comete adultério (selingkuh sana-sini) tan deit iha poder no osan barak.

              Realidade hirak nee  mak contempla loloos ba mentalidade ema nian nebe desvia moris husi roman Evangelho Jesus Cristo nian. Ema Timor sente orgulho liu wainhira defende identidade arte marciais do que defende identidade hanesan Timor oan ou seja Sarani Católico. Político ida sente hetan vitória até orgulho wainhira nia hamonu ninia adversário político liu husi Media Social (Medsos), ex-veterano ida hare nia maluk veterano seluk matan la mos tanba kor partido la hanesan ou la hetan projeto husi estado. Too ponto ida nee, se mak sai vencedor hodi goza oportunidade independência ida nee?

               Afinal, iha oportunista lobuk ida mak helik-an iha partido histórico nia laran hodi aproveita no soran, iha mos oportunista balu nebe aproveita carisma lider histórico nian hodi aproveita sura osan ba bolsu enquanto husi sikun seluk, ema nebe merece goza ukun-an ida nee, tur sura (konta) istória iha media social deit. Pior liu no halo ita moe mak, Timor oan ida-rua nebe facilita prostituta sira tama mai hotel sira iha Dili, Timor oan participa iha transação droga iha Timor, balu facilita documento ilegal ba ema estrangeiro sira nebe tama mai hafuhu osan Dollar iha Timor, iha mos geração otonomista balu nebe infiltra ona iha partido político hodi soran lider histórico sira iha Timor. Medsos (Facebook) sai meio diak liu atu Timor oan tolok malu, defama malu até defama ita nia lider nacional sira tan deit partido la hanesan.

               Iha passagem tuir mai, Jesus dehan tenik katak: Ha’u sei hein hela atu simu baptismo ida. To’o oras ha’u atu simu baptismo ne’e, ha’u laran susar teb-tebes…imi hanoin katak ha’u mai fo dame ba mundo rai klaran? lae; ha’u dehan kedas ba imi katak lae; basá, hodi ohin ba oin, ema Na’in lima sei haketak malu iha uma laran….ho lia nee, Jesus hakarak hatete saida mai ita nobun….?? passagem ida nee, se ita interpreta por letra deit, nee significa Jesus laos lori dame ho domin maibé Jesus lori funu maibé,

               Se ita hakarak tuir Jesus, nee significa katak; ita mos pronto atu hili dalan nebe Jesus lao uluk ona. Além de Jesus hetan baptismo simbólico iha mota Jordão, Jesus mos ikus mai hetan baptismo sagrado iha iha Nia futar Ran rasik. Jesus nia baptismo termina ho Nia mate iha Cruz tutun. Ida nee mak lalaok kmanek, doutrina no Ninia disponibilidade hodi terus no mate iha Cruz tutun. Lalaok matan moris neon nain nee mak Jesus haksumik iha nia lia fuan wainhira tenik dehan:“ha’u lori ahi mai mundo rai klaran”. Ahi nebe Jesus lori nee hodi sunu ita nia fiar metin liu tan, hodi sunu ita nia kan ten ba poder, sunu ita nia ambição ba riku-soin, sunu ita nia vontade humana hodi hatene haraik-an iha moris provisório ida nee.

               Se ita  lee hodi contempla liu tan Evangelho Domingo semana nee, mosu pergunta eh dúvida oioin nebe halo ita confusão…saida mak ita bele compreende husi Jesus nia lia fuan tuir mai nee?; “imi hanoin katak ha’u mai fo dame ba mundo rai klaran? lae; ha’u dehan kedas ba imi katak lae;” nee significa katak; se mak hili Cristo, nee significa nia sei luta hodi enfrenta buat nebe Cristo la hakarak/rejeita. Ema Cristão Católico nebe los, la bele fiar oi-oin, la bele fiar ba mai, la bele fiar ema nia lia bosok sira, la bele fiar matan dook bosok ten sira, la bele fiar ema nia boatus sira, labele fiar promessa falsa sira, la bele fiar mehi SDSB sira. basá, Cristão Católico nebe fuan ru-rua, nia la merece sai Cristo nia emar. Nunee ita nia decisão hodi hili Cristo nudar maksoin, precisa/exige ema nia consistência entre sim ou não.

               Consistência iha âmbito ida nee significa; ema tem que haketak malu ho buat nebe la monu ba Cristo nia hakarak eh la condis ho Cristo nia doutrina sira. Lalaok ida nee bele acontece iha nebe deit, iha qualquer ambiente, situção no qualquer momento. Lalaok ida nee bele provoca inimizade (permusuhan), divergência de idea até confrontação ho ema sira inclui família rasik. Cristo la precisa ema nebe inconsisten ou la iha pendirian; ohin koalia ida, aban koalia seluk hodi buka simpatia enquanto iha nia laran haksumik hela interece balu. Iha qualquer situação precisa mantem nafatin ita nia identidade nudar Cristão Católico.

               Nee mak sentido fundamental husi mensagem Cristo nian iha nian nebe São Lucas relata iha Domingo semana nee. Mensagem nee hakarak sadik ita oinsa hatudu ita nia aten brani hodi moris lolos hanesan Cristão Católico nebe qualidade aas….la bele sai Cristão Fotocopi ou Católico NaPas-(ba missa wainhira Natal-Páscoa deit). Ita precisa haree Jesus hanesan ahi lakan nebe fo naroman no sunu ita nia fuan sarani nian. Ema nebe simu ona we Baptismo maibé, la moris hanesan sarani, nia sai parasita iha Igreja Católica nia laran. Iha âmbito político, lider ida la bele sai paracita (benalo) ou seja maupagador iha partido ida nia laran hodi aproveita cargo político, ou sai traidor nebe serviço iha institução estado maibé, iha intenção aat hodi cria desestabilidade. Ita precisa moris hanesan ahi lakan nebe haroman ema seluk no mos ita-an rasik. Segunda Leitura iha Livro Hebreu nian dehan momos: Foti matan hateke Jesus: nia mak hatudu dalan fiar nian, nia mak sei halo fiar ne’e boot to’o rohan”. Assim Seja e Bem Haja….. (ignaslopes).

Leave a Reply

Your email address will not be published. Required fields are marked *