shadow
Diocese de Dili > NOTÍCIAS > LETURA DIÁRIA > Sabado, XIX Semana Tempo Comum (ANO C)

Sabado, XIX Semana Tempo Comum (ANO C)

Primeira Leitura                   Jos. 24. 14-29

Lia housi Livro Josué:

Iha loron hirak nebá, Josué hateten nune’e ba povo: “Imi hamta’uk Na’i ba, hodi serbi Nia ho laran tomak. Imi hadook maromak falsu sira nebé imi bei-ala sira adora, iha mota Eufrates sorin ba no iha Egipto. Imi la haksolok karik serbi Na’i, imi bele hili ida nebé imi hakarak serbi: serbi ba maromak nebé imi nia bei-ala sira serbi iha mota Eufrates sorin ba ka serbi ba amorreu sira nia maromak nebé oras ne’e imi tur iha sira rain; maibé, ha’u ho ha’u nia família, ami serbi de’it Na’i”.

Povo hotu hatan, dehan: “Ami la hanoin atu husik Na’i hodi serbi fali maromak sira seluk. Na’i, ami nia Maromak mak hasai ami ho ami aman sira housi rai Egipto housi uma atan nian. Nia mak halo milagre oi-oin iha kedas ami nia oin hodi tulun ami tuir dalan iha fatin sira nebé ami liu. Na’i mak duni sai housi ami oin, povo sira nebé hasouru ami no amorreu sira nebé houri uluk tur iha rai ne’e. Ami mós hakarak serbi de’it Na’i, basá, Nia de’it mak ami nia Maromak”.

Nune’e, Josué dehan ba povo: “Maibé, imi la bele serbi ba Na’i ho laran makerek, basá, Nia Maromak Santo, Maromak nebé sei la fó perdua ba imi nia laran makerek no ba imi nia salan sira. Imi fila kotuk karik ba Na’i hodi serbi fali maromak seluk-seluk, Nia sei fila oin hasouru imi atu fó castigo maka’as ba imi hodi harahun imi tanba Nia hatudu tiha ona Nia laran di’ak ba”. “Lae! Ami hakarak de’it serbi Na’i!” Josué hateten fali ba povo: “Imi rasik sai sasin hasouru imi an hodi fihir Na’i atu serbi Nia!” Sira hotu hatan: “Ami sasin hasouru ami an rasik”. Josué hateten tan fali ba sira: “Ne’e sá, houri ohin ba oin, imi hadook ona maromak falso sira nebé iha imi leet hodi fila imi fuan ba Na’i, Israel nia Maromak”. Povo hotu hatan ba Josué: “Ba Na’i, ami nia Maromak mak ami serbi, Na’i liafuan sira mak ami sei rona”.

Iha loron nebá, iha Siquém, Josué halo moruk ida ho povo hodi halo lei no hanourin atu sira tuir. Tuir mai, nia hakerek liafuan hirak ne’e iha livro lei Na’i Nian. Nia hari iha fatin nebá fatuk boot ida iha áas nu’udar sasin, iha ai carvalho nia okos, besik Na’i Nia Santuário. Josué dehan ba povo: “Imi haré ba fatuk ne’e sei sai sasin ba imi tan nia rona liafuan sira hotu nebé Na’i hato’o ba imi. Nia sei sai sasin hasouru imi, ikus mai, imi fila kotuk karik ba Maromak”. Hateten tiha lia hirak ne’e, Josué fahe malu ho sira; ida-idak fila ba nia fatin. Hafoin Josué, Nun nia oan, Na’i nia Atan, mate ho tinan atus ida sanulu.

Maromak Futar Lia.

 

Salmo Responsorial                                                                                                                                   Sal. 16, 1-2ª. 5. 7. 8. 9. 10. 11

Refrão : Na’i, Ita mak ha’u nia liman rohan!!! Repete-se

Tahan ha’u, Na’i, tan Ita ha’u nia heli-an-fatin,

Ha’u dehan ba Na’i, “Ita, ha’u nia Maromak”.

Na’i, Ita ha’u nia liman-rohan

Ha’u nia moris iha Ita futar liman. Refrão

 

Ha’u sei hahí Na’i tan Nia mak ha’u mahein;

Iha kalan Nia fó lia meno mai ha’u neon.

Na’i iha nafatin ha’u matan nia oin,

Nia iha ha’u sorin kuana, ha’u sei la monu. Refrão

 

Tan ne’e, ha’u fuan haksolok,

Ha’u klamar hananu ho ksolok boot,

No ha’u isin toba hakmatek.

Tan Ita sei la saran ha’u ba hôrik fatin mate nian,

Sei la husik Nia atan nia isin dodok. Refrão

 

Na’i, hatudu dalan moris nian mai ha’u,

Haraik ksolok boot iha Ita futar oin,

Iha Ita sorin kuana,

Haksolok ba nafatin. Refrão

 

Aclamação                                                                                                                                                                                           Mt. 11. 25

Refrão : Aleluia, Aleluia!! Repete-se

Rahun di’ak ba Ita, Aman, Na’i lalehan no rai nian, tan

Ita hatudu mistério reino lalehan nian ba kiik sira. Refrão

 

Evangelho                                                                                                                                                                                     Mt. 19, 13-15

  Na’i Jesus Cristo Nia Evangelho nu’udar São Mateus haktuir:

Iha tempo nebá, ema sira lori labarik sira atu Jesus tau liman hodi harohan ba sira. Escolante sira haksi’ak sira. Maibé Jesus dehan: “Husik labarik oan sira hakbesik Ha’u, keta teri netik sira, basá reino lalehan sira nian”. Hafoin, tau tiha liman ba sira, Nia la’o tuir nia dalan.

Lia Maksoyn.

Leave a Reply

Your email address will not be published. Required fields are marked *