shadow
Diocese de Dili > NOTÍCIAS > LETURA DIÁRIA > Segunda – Feira, XX Semana Tempo Comum (ANO C)

Segunda – Feira, XX Semana Tempo Comum (ANO C)

Primeira Leitura                         Jz. 2. 11-19

Lia housi Livro Juízes nian:

Iha loron hirak nebá, Israel oan sira halo sala iha Na’i Nia futar oin, hodi adora fali maromak Baal. Sira hadook-an tiha housi Na’i, sira aman nia Maromak, nebé hasai sira housi rai Egipto. Sira tuir fali povo seluk-seluk sira nia maromak, povo sira nebé hela besik sira; sira tuku-tur iha maromak sira ne’e nia oin, hodi halo sadik Na’i Nia hirus. Nune’e, sira husik tiha Na’i hodi adora fali Baal no  Astarté. Na’i Nia hirus maka’as tebes monu iha Israel oan sira leten. Na’i husik sira iha na’ukteen sira liman hodi na’uk sira, hodi saran sira ba funu baluk sira nebé hale’u sira, no sira la bele tahan hasouru funu baluk sira. Sira hakarak book-an hasouru funu baluk sira, Na’i nia liman todan hanehan hasoru sira nu’udar castigo ida, hanesan Na’i dehan nanis ona ba sira, hanesan Na’i jura tiha ona ba sira. Sira hetan terus wa’in tebes.

Nune’e, Na’i halo mosu Juízes, atu bele soi Israel oan sira housi na’ukteen sira liman. Maibé, sira laran tós, hodi la rona Juízes sira ne’e; sira halo sala fó’er, sira buka adora maromak seluk sira hodi tuku iha sira oin. Sira, lalais sees-an housi dalan nebé sira nia bei-ala sira tuir, hodi moris tuir Na’i Nia ukunfuan sira; maibé, sira lakohi moris tuir. Wainhira Na’i halo mosu Juíz ida, Nia iha hela ho Juíz. Na’i soi sira housi sira nia funu baluk sira liman iha tempo nebé Juíz moris hela, basá, Na’i sadi’a sira wainhira sira terus tanis tanba ema áat sira hanehan sira. Maibé, wainhira Juíz mate tiha, sira fila ba áat liu fali sira nia bei-ala sira; sira tuir maromak sira seluk hodi hahí no hana’i. Sira la husik sira nia hahalok áat hodi la’o tuir nafatin sira nia dalan áat

Maromak Futar Lia.

 

Salmo Responsorial                                                                                            Sal 105(106), 34-35, 36-37, 39-40. 43-44 (R. 4ª)

Refrão :  Keta haluha ami, Na’i, tan domin ba Ita povo!!! Repete-se

La halakon povo sira,

Nu’udar Na’i haruka;

Maibé, halo sira moris iha gentio sira leet,

Hodi halo tuir gentio sira nia hahalok. Refrão

 

Sira adora gentio sira nia lulik

Hodi monu tuir sira nia hahaok áat

Hasa’e sira nia oan mane eh feto

Nu’udar sacrifício ba lulik. Refrão

 

Monu tuir gentio sira nia hahalok áat,

Monu tuir gentio sira nia laran áat;

Na’i hirus hasouru Nia povo,

Hodi hakribi Nia liman-rohan. Refrão

 

Na’i soi sira dala wa’in,

Maibé, sira tuir nafatin sira nia hakaran!

Na’i haré sira nia terus,

Rona ho laran, sira nia halerik. Refrão

 

Aclamação                                                                                                                                                                                              Mt. 5. 3

Refrão : Aleluia, Aleluia!!! Repete-se

Ksolok ba sira be kiak iha espírito basa reino

Lalehan sira nian. Refrão

 

Evangelho                                                                                                                                                                                     Mt. 19. 16-22

Na’i Jesus Cristo Nia Evangelho nu’udar São Mateus haktuir:

Iha tempo nebá, mane klosan ida hakbesik ba Jesus hodi husu ba Nia: “Mestre, ha’u sei halo sá diak atu bele hetan moris rohan láek?” Jesus husu ba nia: “Tansá  ó husu Ha’u kona ba buat nebé di’ak? Ida de’it mak diak.  Maibé, ó hakarak tama ba moris karik, halo tuir ukunfuan sira ba.”  Nia husu fali: “Ukunfuan nebé?” Jesus hatan: “Keta oho, keta sala ho ema nia kaben, keta na’uk, keta foti lia falso; hamta’uk ó nia aman ho inan, hadomi ó nia maluk hanesan ó an rasik.”  Klosan ne’e dehan ba Nia: “Ha’u halo tuir ona buat ne’e hotu:  ha’u sei halo tan saida?” Jesus dehan ba nia: “Ó hakarak sai ema di’ak lolos karik, ba fa’an tiha ó nia sasan hotu hodi fahe ba ema kiak sira, nune’e ó sei hetan rikusoi iha lalehan; hafoin mai tuir Ha’u”.

Rona tiha lia hirak ne’e, mane klosan fila ho neon nakraik, basa nia iha rikusoi barak.

Lia Maksoyn.

Leave a Reply

Your email address will not be published. Required fields are marked *