shadow
Diocese de Dili > NOTÍCIAS > LETURA DIÁRIA > Terça – Feira, XX Semana Tempo Comum (Ano C)

Terça – Feira, XX Semana Tempo Comum (Ano C)

Primeira Leitura                        Jz. 6. 11-24ª

Lia housi Livro Juízes nian:

Iha loron hirak nebá, Na’i nia Anjo mai tur iha okos ai carvalho iha Ofra, be Joás nian, housi família Abiezer nian. Nia oan Gedeão dulas hela trigo iha fatin dulas trigo atu haksumik housi mandianita sira. Na’i nia Anjo mosu ba nia dehan: “Funu Na’in asu wa’in, Na’i hela ho ó!” Gedeão hatan hodi dehan: “Perdua, ha’u Na’i! Na’i hela karik ho ami, tan sá buat áat hirak ne’e mosu mai ami? Iha nebé kmanek sira oi-oin nebé ami nia bei-ala sira haktuir mai ami hodi dehan: ‘La’os Na’i mak hasai ami housi rai Egipto nian?’ Maibé, oras ne’e Na’i husik hela ami hodi saran ami ba Madiã sira liman”.

Nune’e, Na’i fila ba nia, dehan: “Ba, ho kbiit nebé ó iha soi Israel housi Madiã sira liman. La’os Ha’u mak haruka ó ba?” Gedeão hatan: “Perdua, ha’u Na’i! Oinsá ha’u bele soi Israel? Ha’u nia família ki’ik liu iha Manassés. Ha’u, ema ki’ik liu iha ha’u aman nia uma”. Na’i nia Anjo hatan ba Nia: “Ha’u sei hôrik ho ó, ó sei manan Madiã sira hanesan ema ida mesak. Gedeão hatan hodi dehan: “Ha’u hetan di’ak karik iha Itaboot Nia futar matan, haraik sinal ida mai ha’u atu hatudu katak Itaboot mak ko’alia mai ha’u. Na’i, keta hadook-an housi ne’e to’o ha’u fila hikas mai Ita sorin; lori ha’u nia presente atu hasa’e ba Itaboot”. Na’i nia Anjo hatan ba nia: “Ha’u sei hein iha ne’e, to’o ó fila hikas mai”.

Gedeão tama iha nia uma, hadi’a tiha bibi ida, ho trigo u’ut uit-oan tunu tiha pão la ho fermento, nia tau na’an iha luhu ida, mode wen iha tasu ida, lori hotu ba iha ai-carvalho nia okos hodi hasa’e ba Na’i. Na’i nia Anjo dehan ba nia: “Foti na’an ho pão la ho fermento, tau hotu iha fatuk boot nia leten hodi fakar modo wen iha leten”. Gedeão halo duni nune’e. Na’i nia Anjo lolo óe nebé iha nia liman hodi halo kona iha na’an no pão sira la ho fermento. Ahi lakan ida sai kedas housi fatuk boot ne’e hodi sunu mohu tiha na’an ho pão sira. Na’i nia Anjo lakon tiha de’it housi nia oin. Gedeão haré katak ema ne’e Na’i nia Anjo, nia dehan: “Susar tebes mai ha’u, Na’i Maromak!” Maibé, Na’i hatan ba Nia: “Hakmatek ba, Keta ta’uk, Ó sei la mate”. Gedeão hari tiha iha nebá altar ida ba Na’i hodi hanaran nia: “Maromak dame Na’in”.

Maromak Futar Lia.

 

Salmo Responsorial                                                                                                                 Sal. 84 (85). 9, 11-12, 13-14 (R. cf. 9ª)

Refrão :  Na’i haklaken dame ba Nia povo!!! Repete-se

Ha’u rona buat nebé Na’i dehan:

Maromak fó hatene dame,

Dame ba Nia povo no ba Nia belun sira,

Dame ba sira nebé fila ba Nia ho laran tomak. Refrão

 

Laran metin no neon lós sei hetan malu,

Dame no justiça sei hakoak malu.

Neon lós sei tubun housi rai,

Sei hatun justiça housi Lalehan mai. Refrão

 

Na’i sei haraik buat nebé di’ak,

Ita rain sei fó fuan.

Justiça sei la’o iha Nia oin,

Dame sei sama tuir Nia ain fatin. Refrão

 

Aclamação                                                                                                                                                                                          2Cor. 8. 9

Refrão : Aleluia, Aleluia!! Repete-se

Na’i Jesus Cristo be riku, halo An kiak tan imi,

Atu imi bele sai riku hodi Nia kiak. Refrão

 

Evangelho                                                                                                                                                                                    Mt. 19. 23-30

Na’i Jesus Cristo Nia Evangelho nu’udar São Mateus haktuir:

Iha tempo nebá, Jesus hateten nune’e ba escolante sira: “Tebes Ha’u dehan ba imi: ema  riku ida atu tama iha Reino Lalehan susar. Tebes, ha’u dehan ba imi: lalais liu ba kuda kamelu ida tama iha daum nia ku’ak liu fali ema riku ida tama iha Reino lalehan”. Uainhira escolante sira hakfodak  hodi dehan: “Nune’e se los mak bele soi nia an?” Jesus fihir sira hodi dehan: “Ba ema sira ne’e la bele, maibé ba Maromak buat hotu bele de’it”. Tuir mai Pedro hasa’e lia dehan: “Be ami nebé husik tiha buat hotu hodi tuir Ita Boot. Ba ami ne’e saida?” Jesus dehan ba sira: “Tebes, Ha’u dehan ba imi: imi sira nebé tuir Ha’u, iha mundo foun, uainhira Oan Mane tur iha nia trono gloria nian, imi sei tur mos iha trono sanulu resin rua hodi tesi lia ba suku sanulu resin rua Israel nian. Ema hotu nebé husik uma, maun alin, feton, aman, inan, oan sira ka rai, tan Ha’u nia naran, sei simu dala atus id aliu tan hodi simu mos nu’udar liman rohan moris rohan laek. Barak nebé uluk, sei ikus fali; no sira nebé ikus, sei uluk fali.”

Lia Maksoyn.

 

Leave a Reply

Your email address will not be published. Required fields are marked *