shadow
Diocese de Dili > NOTÍCIAS > LETURA DIÁRIA > Sexta – Feira, XX Semana Tempo Comum (Ano C)

Sexta – Feira, XX Semana Tempo Comum (Ano C)

Primeira Leitura    Rt. 1, 1-2ª, 3-6, 14b-16, 22

Lia housi Livro Rute nian:

Iha loron hirak nebá, wainhira juíz sira ukun iha Israel, mosu hamlaha boot ida iha rai nebá. Tan ne’e, ema ida husik hela iha Belém, Júda nian, ba iha rai Moab hamutuk ho nia féen no nia oan na’in rua. Ema ne’e naran Elimelec; nia féen naran Noémi. Tuir mai, Elimelec mate, nia féen Noémi hela mesak ho nia oan nia oan mane na’in rua. Nia oan mane na’in rua ne’e kaben hotu ho feto Moab nian na’in rua; ida naran Orpa no ida seluk Rute. Sira hôrik iha rai Moab tinan sanulu nia laran. Maibé, nia oan sira mós mate; Noémi hela mesak, la iha oan na’in rua no la iha la’en. Nune’e, nia hahu hadi’a-an atu fila fali ba Belém, Judá nian, ho nia feto foun sira housi rai Moab, basá, nia hatene katak iha rai Moab mak Na’i tau matan ba nia povo hodi haraik aihan ba nia. Orpa despede tiha nia banin feto fila fali ba nia uma; maibé, Rute lakohi husik nia banin feto.

Noémi dehan ba nia feto foun Rute: “Haré ba, ó nia cunhada Orpa fila fali ona ba nia aman-inan no ba nia Maromak. Ó mós fila ona hodi ba ho nia”.

Rute hatan ba nia, dehan: “La’e, ita keta haruka ha’u husik hela ita hodi hadook ha’u-an housi ita; basá, ita ba nebé, ha’u sei ba ho ita; ita hôrik iha nebé, ha’u sei hôrik ho ita. Ita nia povo sei sai ha’u nia povo, ita nia Maromak sei sai ha’u nia Maromak”.

Nune’e mak Naémi fila hi’as ba nia rain Belém, Judá nian, ho nia feto-foun Rute, housi rai Moab, iha tempo ema hahu ko’a trigo.

Maromak Futar Lia. 

 

Salmo Responsorial                                                                                                                    Sal 145(146). 5-6ab, 7, 8, 9, 10 (R. 1)

Refrão : Ha’u klamar hahí Na’i!!! Repete-se

Ou           Aleluia!!

Rahun di’ak ba ema nebé hetan tulun,

Housi Jacob nia Maromak.

Tau laran metin iha Na’i, nia Maromak,

Nebé hakiak Lalehan no Rai,

Tasi no buat hotu nebé moris iha nia. Refrão

 

Na’i tahan ho justiça, ki’ik sira be ema hanehan,

Haraik aihan ba ema nebé hamlaha,

Haraik liberdade ba ema sira be dadur. Refrão

 

Na’i halo matan delek sira haré,

Tahan ema kbiit laek sira ho Nia kbiit,

Hadomi ema sala laek sira. Refrão

 

Na’i ukun tinan-ba-tinan;

Sião, ó nia Maromak mak liurai

Ba derasaan hot-hotu. Refrão

 

Aclamação                                                                                                                                                                          Sal. 24(25). 4b, 5ª

Refrão : Aleluia, Aleluia!! Repete-se

Hatudu Ita dalan mai ha’u;

Halo ha’u tuir Ita lialós. Refrão

 

Evangelho                                                                                                                                                                                   Mt. 22. 34-40

Na’i Jesus Cristo Nia Evangelho nu’udar São Mateus haktuir:

Iha tempo nebá, ema fariseu sira rona katak Jesus halo saduceu sira sai nonok, sira halibur an hamutuk. Sira ida, doutor ukunfuan nian, husu hodi koko Nia: “Mestre, ukunfuan ida nebé mak boot liu?” Jesus hatan ba nia: “Ó sei hadomi Na’i, ó nia Maromak ho neon ho laran, ho ó nia klamar tomak. Ida ne’e mak ukunfuan uluk no boot liu hotu. Ida tuir mai hanesan nia: ‘Ó sei hadomi ema seluk hanesan ó nia an rasik’. Ukunfuan rua ne’e, ukunfuan sira hotu no profeta sira nia hun”.

Lia Maksoyn. 

Leave a Reply

Your email address will not be published. Required fields are marked *