shadow
Diocese de Dili > NOTÍCIAS > LETURA DIÁRIA > Sábado, XX Semana Tempo Comum (Ano C)

Sábado, XX Semana Tempo Comum (Ano C)

São Bartolomeu, Apostolo (Festa)

 

Primeira Leitura                      Ap. 21. 9b-14

Lia housi Livro Apocalipse:

Anjo ida ko’alia ho ha’u dehan: “Mai iha ne’e, ha’u sei hatudu ba ó noiva nebé Bibi Oan hola tiha”. Iha Espírito, nia lori ha’u ba foho áas liu nia tutun; nia hatudu mai ha’u Jerusalém, cidade santa, tun housi Maromak, housi lalehan. Maromak nia glória nabilan tomak hale’u nia. Fatuk murak oi-oin hafutar nia. Nia lutu áas liu ho odamatan boot sanulu resin rua. Iha odamatan boot ida-idak, Anjo ida hamriik no uma-kain sanulu resin rua Israel nia naran hakerek tiha iha odamatan sira nia leten. Iha lorosa’e odamatan tolu, iha tasifeto odamatan tolu, iha tasimane odamatan tolu no iha loromonu odamatan tolu. Cidade nia lutu ne’e hamriik iha fatuk boot sanulu resin rua nia leten. Apóstolo sanulu resin rua Bibi Oan nian ida-idak nia naran hakerek iha fatuk sira ne’e.

Maromak Futar Lia. 

 

Salmo Responsorial                                                                                                                    Sal 144(145). 10-13ab, 17-18 (R. 12ª)

Refrão :  Na’i, Ita santo sira haklaken Ita reino nia glória!!! Repete-se

Na’i, ema hotu sei agradece Itaboot,

Ita emar sira hahí Itaboot.

Sira sei haklaken Ita reino nia glória,

Sira haktuir buat hirak Ita halo. Refrão

 

Atu fó hatene ba ema tomak Ita kbiit,

Glória no kmanek Ita reino nian,

Ita nia reino, reino rohan laek,

Ita nia ukun sei hela metin housi otas ba otas. Refrão

 

Na’i halo buat tomak tuir lialós,

Halo buat hotu ho laran-luak.

Na’i besik ba ema sira be harohan,

Besik ba ema sira be harohan tebes. Refrão

 

Aclamação                                                                                                                                                                                           Jo. 1. 49b

Refrão : Aleluia, Aleluia!! Repete-se

Na’i, Ita mak Maromak nia Oan Mane,

Ita mak Israel nia Liurai. Refrão

 

Evangelho                                                                                                                                                                                        Jo. 1. 45-51

Na’i Jesus Cristo Nia Evangelho nu’udar São João haktuir:

Iha tempo nebá, Filipe haré Natanael hodi dehan ba nia: “Ami foin hetan Ida nebé Moisés iha Ukunfuan no Prefeta sira fó sai nanis, katak Jesus, José nia oan housi Nazaré”. Natanael dehan ba nia: “Housi Nazaré buat di’ak ida bele mosu?” Filipe hatan ba nia: “Ó mai haré”. Haré Natanael hakbesik ba Nia, Jesus dehan kona ba nia: “Ida ne’e mak Israel lolós, iha nia la iha lia bosok!” Natanael husu ba Nia: “Ó hatene ha’u oinsá?” Jesus hatan: “Molok Filipe bolu ó, Ha’u haré ona ó iha ai figueira okos”. Natanael dehan fali: “Rabbi, Ita mak Maromak Nia Oan Mane, Ita mak Israel nia Liurai!” Jesus hatan: “Tan Ha’u hateten ba ó katak Ha’u haré ona ó iha ai figueira okos, mak ó fiar? Ó sei haré buat boot liu fali ida ne’e”. Hafoin Jesus dehan ba nia: “Tebes, Ha’u dehan ba imi: imi sei haré lalehan nakloke, no Maromak nia Anjo sira sa’e no tun iha Oan Mane nia oin”.

Lia Maksoyn. 

Leave a Reply

Your email address will not be published. Required fields are marked *