shadow
Diocese de Dili > NOTÍCIAS > REFLEXÃO > DOMINGO XXI TEMPO COMUM

DOMINGO XXI TEMPO COMUM

Maun alin sarani  doben sira, oras nee ita iha ona domingo XXI tempu comum nian tuir tinan liturgia nian. Nai Maromak ninia futar liafuan domingo ohin nian fo hanoin mai ita kona ba Maromak ninia reino be folin boot no wain tebes mai ita sira hotu nebe fiar iha Na’i Maromak. Nune’e ita percisa kaer metin Maromak ninia Reino ne’e liu husi halao moris ida be tuir duni reino ne’e ninia hanorin sira.

Maromak ninia reino ne’e katak klibur ema sira nebe fiar iha Maromak hodi moris hamutuk ho Maromak ne’e. Na’i Maromak rasik mak ukun klibur ida ne’e. Iha reino ida ne’e moris ita halao no ita hetan tuir Maromak ninia hakarak no iha Maromak ninia mahan. Moris ida nebe tidin-an iha domin, iha paz no iha justiça.

Primeira leitura fo hatene mai ita katak Maromak ninia reino ne’e Na’i Maromak rasik mak hari, nia rasik mak hamoris ho moris ida rohan laek tebes. Ida ne’e katak Na’i Maromak mak hari ka estabelece iha ita leet, domin, paz no justiça ida dura to’o rohan laek, laos ita. Ita percisa deit halao moris ida iha duni domin, iha paz no iha justiça nia laran. Nune’e mak ita rona profeta Isaias haklaken mai ita Maromak ninia futar liafuan nebe hateten “Hau mai atu halibur hamutuk povo hotu hotu, ema tomak ho lisan oioin. Sira hotu sei hare Hau kbiit. Hau sei halo buat foun ida, husi sira leet hau sei hili sira balun hodi haruka sira ba haklaken ba ema sira nebe ladauk hatene hau naran no ladauk hatene hau nia kbiit”. Iha pratica moris concreta tuir roman ninia futra liafuan ne’e claro katak domin, paz no justiça sai sasukat no criteria mai ita atu bele moris iha Maromak ninia reino, basa Maromak ukun ema sira iha ninia reino ho duni domin, ho paz no ho justiça. Wainhira ita la pratica moris ida nune’e nee katak ita la moris iha Maromak ninia reino, ita moris lolos duni iha Maromak ninia reino wainhira ita pratica moris ida hanesan nee nebe tuir Maromak ninia hakarak duni, nebe Maromak rasik hanorin nanis mai ita hotu hotu. Nai Maromak ninia ukun ida hanesan nee ba ema no rai hotu hotu laos ba deit ema ou grupo balun, tamba nee mak Maromak hakarak nanin atu hili hodi halao ka lori ninia ukun nee ba hotu hotu liu husi ita sira nebe fiar ona iha Nia nundar ita ninia Maromak hodi moris tuir no moris hamutuk ho Maromak. Moris ida oinseluk husi nee katak la fiar no la hamutuk ho Maromak baibain ita hanaran moris aat ka lisan at hanesan haktuir mai ita iha segunda leitura. Lisan at lori ba terus, lori ba mate, hasai ita husi Maromak ninia reino. Lisan diak be hatudu iha domin, paz no justiça lori ita ba unidade ho Maromak no ho maun alin sira, lori ita ba moris ida rohan laek iha ita nia klibur hamutuk nundar Maromak ninia povo be Nia rasik mak hamoris no ukun. Segunda leitura convida ita atu ita tem que husik lisan at hodi haburas mak lisan diak ita ema sarani sira nian be heta ninia abut iha domin, iha paz, iha justiça, iha laran maun no laran mamar, iha hatene perdua no hakarak diak deit.

Wainhira hare mai realidade moris ita sarani sira nian iha rai klaran no iha Timor Leste ne’e ita bele dehan mas que jeralmente ita hotu sai ona Maromak ninia povo ka Maromak ninia oan maibe dala balun ita ninia hahalok moris la hatudu moris ida Maromak ninia reino nian, ita hatudu fali mak lisan at sira nebe hadok ema husi Maromak ninia reino no harahun ita ema ninia an rasik fali. Ita ninia lisan at sira hanesan: Violência, rai hirus no ódio, laran moras, la hatene halo caridade, halaok ema kbiit laek sira ninia moris, haburas lia bosok no lia falço no seluk seluk tan nebe ita labele temi hotu iha nee hanesan ladainha ida be lori ema ba susar laran.

Evangelho fo hanoin mai ita katak los duni obstáculo moris nundar ema sarani nee boot tebes, obstaculo sira nee comcerteza mak ita nia lisan at sira nebe la tuir Maromak ninia hakarak no ninia hanorin sira. Mas que nune’ebe nundar sarani ita percisa luta hasoru obstaculo sira nee ho fiar metin no ho laran metin hodi rona nafatin Maromak ninia hanorin sira no moris tuir nafatin ninia hakarak sira. Hodi fiar no laran no hodi halao moris ida nune mak ita sei garante nafatin Maromak ninia reino horik duni iha ita leet, iha ita ida idak ninia-an, familia, bairo, sociedade no iha ita rain.  Nain Jesus encoraja ita atu Ita labele husik Maromak ninia reino be haraik tiha ona mai ita iha Ita Nai Jesus Cristo nee lakon leet deit husi ita leet maibe luta nafatin atu moris iha Maromak ninia reino nee loron kalan iha ita ninia moris hodi nunee mak ita sei la lakon Maromak ninia reino ne’e maibe ita sei hola parte nafatin iha moris ida be hetan iha Maromak ninia reino nee oras nee no ba nafatin.

Mai ho Maromak Espirito Santo ninia tulun liu husi ninia futar liafuan ohin nian ninia roman ita buka atu husik ita nia toman at sira hodi haburas mak toman diak sarani sira nian iha ita leet hodi hametin no haburas moris Maromak nian iha ita leet. Amen.

 

Bidau, 25 de Agosto de 2019, Pb.

Leave a Reply

Your email address will not be published. Required fields are marked *