shadow
Diocese de Dili > NOTÍCIAS > LETURA DIÁRIA > Sexta-Feira, XXI Semana do Tempo Comum (Ano C)

Sexta-Feira, XXI Semana do Tempo Comum (Ano C)

Primeira Leitura                          1Tes. 4. 1-8

Lia housi livro São Paulo nia primeira Surat ba sarani sira iha Tessalónica:

Maun alin sira, imi hatene ona housi ami, oin sá imi sei moris atu imi nia moris monu lós ba Maromak nia laran. Los duni, imi moris ona hanesan ne’e. Ohin, iha Na’i Jesus Cristo Nia naran, ami husu imi atu moris di’ak liu tan. Basá imi hatene doutrina nebé ami fó ba imi hodi Na’i Jesus Cristo nia kbiit.

Maromak hakarak katak imi sei sai santo no mós teb-tebes housi sala fo’er. Imi, mane sira, sei hatene oin sá imi sei moris ho imi nia kaben nu’udar ema santo no di’ak, la’os ho laran fo’er hanesan gentio sira nebé la hatene Maromak. Ne’e duni, iha buat ida ne’e, ema ida la bele halo áat nia maluk sarani ida eh manan buat ruma housi nia. Ami dehan nanis ona buat ida ne’e no ami fó hatene ho lia maka’as katak Na’i sei fó todan boot iha buat hirak ne’e. Maromak la bolu ita atu moris iha sala fo’er laran, maibé iha santidade laran. Ne’e duni, ema nebé hewai doutrina ne’e, la hewai ema de’it; nia hewai Maromak nebé haraik Espírito Santo ba imi.

Maromak Futar Lia.

 

Salmo Responsorial                                                                                                                    Sal. 96(97). 1, 2b, 5-6, 10-12 (R. 12ª)

Refrão : Imi hotu be laran mós, haksolok iha Na’i!!! Repete-se

Na’i mak liurai, rai tomak haksolok ba;

Nusa lub-lubun haksolok ba.

Nia hatais kalohan no nakukun,

Justiça no direito mak Nia trono nia hun. Refrão

 

Foho sira sei naben hanesan lilin,

Iha Na’i, rai tomak nia Na’in Nia oin;

Lalehan haklaken Nia justiça,

Povo tomak hanoin Nia glória. Refrão

 

Na’i hadomi sira be hakribi hahalok áat,

Hatau fiar na’in sira nia klamar;

Na’i souri Nia atan sira

Hodi soi sira housi ema áat sira liman. Refrão

 

Roman nabilan ba ema neon lós sira,

Ksolok ba ema fuan mós sira.

Imi sira be laran mós, haksolok ina Na’i ba,

Hahí Nia naran Santo. Refrão

 

Aclamação                                                                                                                                                                                           Lc. 21. 36

Refrão : Aleluia, Aleluia!! Repete-se

Imi neon moris hodi hamulak nafatin atu imi bele

hamriik ho laran metin iha Mane Maksoi Nia futar oin. Refrão

 

Evangelho                                                                                                                                                                                       Mt. 25. 1-13

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus dehan ba escolante sira aiknanoik ida ne’e: “Reino Lalehan hanesan virgem na’in sanulu nebé kaer áhi-oan ida-idak hodi ba hasouru Noivo. Sira na’in sanulu ne’e, na’in lima beik, lima seluk matenek. Sira be beik, lori ahi-oan maibé la lori mina. Sira na’in lima be matenek lori mina iha vaso hamutuk ho ahi-oan. Tan Noivo lada’uk mai, sira matan dukur hodi toba tiha. Kalan fahe rua, sira rona lian ida nune’e: ‘Noivo mai ona ne’e, imi ba hasouru nia’! Virgem sira hotu hader hodi hadi’a sira nia ahi-oan. Sira nebé beik dehan ba matenek sira: ‘Fo imi nia mina mai ami, tan ami nia ahi-oan mate’. Maibé, sira nebé matenek dehan: ‘Keta la to’o karik ba ami no ba imi; di’ak liu imi ba buka ema nebé fa’an hodi sosa ba imi rasik’. Uainhira sira ba sosa, Noivo to’o mai. Sira nebé hein hela, tama ho nia atu han iha casamento, odamatan taka tiha. Ikus mai, virgem sira seluk to’o mai, hodi dehan: ‘Na’i, Na’i, loke odamatan mai ami’. Maibé, Nia hatan ba sira: ‘Ha’u dehan los ba imi, Ha’u la hatene imi’. Ne’e duni, matan moris neon na’in ba, tan imi la hatene oras ka loron”.

Lia Maksoyn.

Leave a Reply

Your email address will not be published. Required fields are marked *