shadow
Diocese de Dili > NOTÍCIAS > Notícias > TINAN 20 ITA APRENDE LAO NU’UDAR POVO IDA NE’EBE LIVRE

TINAN 20 ITA APRENDE LAO NU’UDAR POVO IDA NE’EBE LIVRE

 DCDD – Iha Quinta-Feira loron 29 fulan Agosto 2019 Dom. Virgílio do Carmo da Silva,SDB preside Missa Ação de Graça 20 Anos Consulta Popular nian iha SE Catedral Dili. Iha bispo de Dili Dom. Virgílio do carmo da Silva nia Reflexão ba comemoração Visécima Aniversário ne’e fo hanoin fila fali katak; “Iha loron ida ne’e, ita comemora Visécimo Aniversário Consulta Popular nian, ita concidera hanesan loron graça nian tanba povo hetan hikas nia dignidade nu’udar Maromak oan, exerce ninia direito atu determina nia futuro rasik hanesan povo no nação. Povo ida ne’e conciente katak; buat ne’e hotu tanba Maromak ninia presença ne’ebe moris ho povo ida ne’e iha circunstância oi-oin, povo la lao mesak, Maromak terus ho nia povo, lao ho Nia povo, hanourin Nia povo, lori Nia povo sai housi nakukun ba naroman, sai housi atan ba ema livre, laiha razão ida atu ita husik momento ida nee  liu le’et de’it”.

Liu tan ne’e Dom. Virgílio do carmo da Silva hateten; “Ohin ita agradece tanba iha tinan 20 ne’e ita aprende lao nu’udar povo ida, povo ne’ebe livre masque dala ruma ita monu, maibe ita hamrik fali, dala ruma ita halai lalais, dala ruma mos ita dolar, dala ruma ita hamnasa, maibe mos dala ruma ita nia oin buis ba malu, maibe ita nia fiar, ita nia caridade no ita nia esperança iha Maromak mak paz. Paz  mak sai fundamento iha ita nia moris nu’udar cidadão sarani iha rai Timor Leste. Ida ne’e mak fo nafatin força ba ita atu lao ba oin, ida ne’e mak ita keta haluha atu foti matan ba leten nafatin confia iha Na’i, buka Na’i wainhira iha nakukun”.

Dom. Virgílio do carmo da Silva recomenda tan katak; “Celebração ida ne’e labele de’it hanesan centro ida ne’ebe hateke ba kotuk, basá buat ne’ebe liu ona ita sei labele muda, maibe serve hanesan lição ida ba futuro nu’udar povo ida ne’ebe fiar na’in nakonu ho esperança. Momento ida ne’e mos convida timoroan hotu atu ho haraik an hateke ba kotuk no coragem foti matan la’o ba oin atu haburas nafatin Espírito Referendum ninian ida ne’e mak fiar malu la’o hamutuk, unidade, responsabilidade, sacrifício no keta haluha katak horseik liu tiha ona aban seidauk to’o”.

Ikus liu Dom. Virgílio do carmo da Silva encoraja mos tan katak; “Comemoração ida ne’e sei sai furak liu mai ita timoroan wainhira ita bele hamanas fila fali timoroan hot-hotu nia fuan. Empresta Amu Papa nia liafuan tolu ne’ebe dehan: “Para oituan hodi hateke ba kotuk, ba laran ba oin, hafoin lao fila fali”. Ponteiro ida ne’e precisa ita atu para oituan, lalika preocupa demais tan dala ruma ita halai lalais, maibe lahatene atu ba los ne’ebe? Nune’e mos mai housi ne’ebe? Para atu hare ba kotuk, hare ba ita nia an, hare ba oin, hare buat diak, nune’e mos sasan estado ba progresso no dezenvolvimento, hare situação ita nia rai laran nian, desafio sira ne’ebe ita nia foinsa’e sira hasoru, preocupação família ohin loron ninian mak ita hakat ba oin ho aten brani”. (Alin&Marta)

Leave a Reply

Your email address will not be published. Required fields are marked *