shadow
Diocese de Dili > NOTÍCIAS > LETURA DIÁRIA > Sábado, XXI Semana do Tempo Comum (Ano C)

Sábado, XXI Semana do Tempo Comum (Ano C)

Primeira Leitura                       1Tes. 4. 9-11

Lia housi livro São Paulo nia primeira Surat ba sarani sira iha Tessalónica:

Maun alin sira: Kona ba domin ba imi nia maluk sarani sira, la precisa tan atu ha’u hakerek ba imi, basá Maromak rasik hanourin tiha imi oin sá imi sei hadomi malu. No lolós, imi hadomi tiha hanesan ne’e imi nia maun alin sira iha Macedónia tomak. Ne’e duni, ami husu imi, maun alin sira, atu halo liu tan. Haka’as an atu moris nonok, hodi haré kona ba imi nia moris, nu’udar ami dehan nanis ona ba imi.

Maromak Futar Lia.

 

Salmo Responsorial                                                                                                                                       Sal. 97(98). 1, 7-8, 9 (R. 9)

Refrão : Na’i tesi lia ba povo ho justiça!!! Repete-se

Hananu ba Na’i knananuk foun ida,

Basá Nia halo buat mesak kmanek.

Nia futar liman lós manan funu;

Manan ho Nia futar liman santo. Refrão

 

Tasi halian no buat tomak iha tasi;

Mundo tomak no buat hotu be hôrik iha nia.

Mota sira basá liman ba,

No foho sira hotu hamutuk hananu ho ksolok. Refrão

 

Iha Na’i futar oin,

Be mai atu tesi lia ba mundo.

Nia sei ukun rai ho justiça

No ukun povo hotu ho lialós. Refrão

 

Aclamação                                                                                                                                                                                           Jo. 13. 34

Refrão : Aleluia, Aleluia!! Repete-se

Na’i hateten, Ha’u fo ba imi mandamento foun:

Imi sei hadomi malu nu’udar Ha’u hadomi imi. Refrão

 

Evangelho                                                                                                                                                                                    Mt. 25. 14-30

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus dehan ba Nia escolante sira aiknanoik ida ne’e:  “Ema ida, molok atu ba la’o rai, bolu nia atan sira hodi husik nia rikusoi ba sira. Ba ida, nia fo osan talenta lima, ba ida seluk nia fo rua, ba ida seluk tan nia fo ida; tuir ida-idak nia biit. Hafoin nia la’o tiha. Ida nebé simu talenta lima ne’e, fila liman kedas ho sira hodi manan tan lima. Nune’e mos, ida nebé simu rua, manan tan rua. Maibé, ida nebé simu de’it ida, ba ke’e rai kuak hodi hakoi subar nia na’i nia osan.

Kleur tiha, atan sira ne’e nia na’in fila mai hodi husu sira kona ba nia osan. Ida nebé simu talenta lima hakbesik hodi fo fali lima tan ba nia dehan:  ‘Na’i, ita fo talenta lima mai ha’u, talenta lima tan nebé ha’u manan mak ne’e’.  Na’i dehan ba nia:  ‘Di’ak los, atan di’ak no laran los: tan ó hatudu laran los iha buat nebé uitoan, ha’u sei fo buat barak ba ó atu tau matan. Tama ba ó na’i nia ksolok’.  Tuir mai ida nebé simu talenta rua hakbesik dehan:  ‘Na’i, ita fo mai ha’u talenta rua; rua seluk nebé ha’u manan mak ne’e’.  Na’i hatan ba nia:  ‘Di’ak los, atan di’ak no laran los; tan ó hatudu laran los iha buat nebé kiik, ha’u sei fo ba ó buat barak atu tau matan.  Tama ba ó na’i nia ksolok’.

Ikus liu ida nebé simu talenta ida, mosu mai dehan:  ‘Ha’u hatene Itaboot ema maka’as nebé ku’u iha nebé ita la kuda, halibur iha nebé ita la lekar. Tan ne’e ho ta’uk ha’u ba subar tiha nia osan iha rai; buat nebé ita nian mak ne’e’.  Na’i hatan ba nia:  ‘Atan aat no barukten!  Ó hatene katak ha’u ku’u iha nebé ha’u la kuda, ha’u halibur iha nebé ha’u la lekar. Ne’e duni, tuir lolos ó sei lori ha’u nia osan ba banco; nune’e, fila tiha mai, ha’u bele foti ha’u nia osan ho funan. Ne’e duni, imi hasai tiha talenta housi nia hodi fo ba ida nebé iha sanulu. Basa ba ida nebé iha ona sei fo tan hodi hetan barak liu; maibé ba ida nebé la iha, uitoan nebé nia iha sei hasai tan housi nia. Kona ba atan folin laek ne’e, imi soe tiha nia ba nakukun iha liur, iha nebé iha tanis no ruun nehan”.

Lia Maksoyn.

Leave a Reply

Your email address will not be published. Required fields are marked *