shadow
Diocese de Dili > NOTÍCIAS > REFLEXÃO > DOMINGO XXIII TC.A.C 2019

DOMINGO XXIII TC.A.C 2019

Maun alin sarani doben sira Nai Maromak ukun fuan sanulu hetan ninia centro mak iha Maromak no iha ita ema sira. Iha Maromak ho ema sira ninia moris, moris ida nebe Hahu mai husi Maromak, ema halao no sei hetan rohan laek iha fila fali Maromak. Moris nee halao iha no ho ukun ida nebe hanarn domin. Ukun domin nian nee iha sanulu hanesan ita hatene nebe habadak ba “Hadomi Maromak liu sasan hotu hotu no hadomi ema seluk hanesan ita ninia an rasik”.

Evangelho ohin nian Jesus hanorin ita atu kona ba ukun fuan uluk liu be dehan Hadomi Maromak liu sasan hotu hotu. Nai Jesus dehan “Ema se mai buka hau maibe la husik hadomi aman ho inan, kaben, oan, alin, maun no moris. La bele sai hau nia escolante. Ema se la lori ninia cruz lao tuir hau, labele sai hau nia escolante”. Maun alin doben sira, buat nebe Nai Jesus dehan la katak ita labele hadomi ita nia aman inan, bin feton, maun  alin, kaben no oan sira, maibe ao contrário buat nebe nia dehan nee katak ita tem que hadomi no hadomi lolos sira maibe ita percisa hadomi nai Maromak liu sira hotu. Ita nia domin la para deit iha sira maibe tem que lori to’o ba iha hadomi lolos mos Nai Maromak. Cristo ninia liafuan ne’e nia dehan no convida ita atu moris tuir iha contexto Maromak ninia ukunfuan hadomi Maromak liu sasan hotu hotu ne’e. Wainhira ita ninia domin para deit iha ema sira, la to’o iha hadomi mos Na’i Maromak ita ninia domin ne’e sei la nakonu ida, loron ida sei maran fila fali basa la hetan ninia abut iha Maromak be domin ninia hun ne’e, maibe wainhira ita ninia domin hahu husi ema no lori ba to’o iha hadomi mos Nai Maromak domin ne’e sei la maran, sei nakonu nafatin basa ita hakat to’o iha domin ninia hun be mak Maromak rasik.  Segunda leitura S.Paulo hanorin ita atu moris tuir ukun fuan boot liu daruak nian “Hadomi ema seluk nundar ita-an rasik. Iha ninia carta ba Filemon, Paulo husu atu Filemon bele simu Onésimo nundar alin ida laos ona nundar atan ida. Hare malu nundar maun ho alin hamoris no haburas ksolok lolos ida iha ita nia an, ita nia familia no ita ninia sociedade basa ita nia hahalok ida nune’e tidin-an iha domin, hetan ninia razão iha domin lolos. Wainhira ema hadomi malu lolos nundar maun ho alin nee katak ema hadomi ninia-an rasik, basa ninia maun alin nee mos mai husi Maromak, mesak Maromak ninia criatura be hanesan mos ho nia. Na’i Maromak husu ita hadomi malu tuir ninia ukun fuan domin nian atu nune’e domin nee la menus, la maran no la mohu iha ita, maibe buras nakonu no naresin nafatin ba nafatin iha ita nia moris tomak.

Iha ita nia experiência moris nian dala barak mos mak ita experimenta moris ida la tuir Maromak ninia ukun fuan ida nee. Ita rejeita, la simu ita nia maun alin sira tamba sira salan hasoru ita, tamba riku soin, tamba laran moras, tamba rai odio no sira seluk seluk tan. Buat hirak nee lori ita ba halao moris ida nakonu ho terus no terus leet deit nia laran. Maromak bolu nafatin ita atu husik dalan moris ida hanesan nee hodi fila fali ba dalan moris ksolok nian be hari iha moris ida metin tuir ukun fuan domin nian, hadomi maun ho alin ka ema seluk nundar ita ninia an rasik.

Maun alin doben sira, Nai Maromak ninia ukun fuan ne’e mak expressão clara, real no concreta ninia hakarak mai ita ema sira. Iha primeira leitura haktuir katak laiha ema ida mak hatene Maromak ninia hakarak no Maromak ninia hanoin. So Maromak rasik mak fo hatene mai ita ninia hanoin no ninia hakarak sira. Nia halo ida ne’e liu husi ninia revela-an ba ema sira hotu nebe hatudu iha história ita ema nian iha ita ninia relação ho Maromak no ho maun alin sira. Maromak ninia hanoin no ninia hakarak mak ida ne’e atu ita hotu moris iha domin lolos ba Maromak no ba maun alin ka ema seluk. Ninia hanoin no hakarak ne’e realiza sai nakonu lolos to’o rohan laek iha ita Nain Jesus Cristo nebe fo ninia-an terus to mate iha Cruz atu soi ita hotu no atu nune’e ema bele hatene domin lolos nee mak ida oinsa liu husi moris lao tuir lolos Jesus Cristo iha buat hotu. Nai Maromak husu atu ita hotu moris tuir no hanorin tutan ba ema hotu to’o mundo nee nia rohan hadomi Maromak no hadomi ema seluk nundar ita-an rasik nafatin ba nafatin. Amen.       

Bidau, 08.09.19, Pb.

Leave a Reply

Your email address will not be published. Required fields are marked *