Exaltação da Santa Cruz
Primeira Leitura Num. 21. 4b-9
Lia housi livro Números nian
Iha loron hirak nebá, iha dalan, povo lakon ona paciência hodi ko’alia hasouru Maromak ho Moisés: “Tan sá halo ami sai housi rai Egipto atu ami mate iha rai-fuik maran ne’e? Ai-han no ué la iha. Ami laran kabeik ona ho aihan mihis ida ne’e”.
Nune’e, Na’i haruka hasouru povo samea manaas nebé tata ema; Israel nia emar barak mate. Povo ba ko’alia ho Moisés dehan: Ami sal tan ko’alia hasouru Na’i no mós hasouru ita. Husu ba Na’i atu hadook tiha samea sira housi ami”. Moisés harohan duni tanba povo. Ne’e duni, Na’i lia tun ba Moisés: “Halo samea manas ida hodi tara ba ai-rin ida. Ema hotu nebé, samea tata tiha nia, hateke ba samea be tara ne’e, sei hetan moris”. Moisés halo samea idariti hodi tara ba ai-riin. Ema nebé samea ruma tata karik, hatéke ba samea riti ne’e, nia la mate.
Maromak Futar Lia.
Salmo Responsorial Sal. 77(78). 1-2, 34-37, 39 (R. cf. 7c)
Refrão : Imi keta haluha Na’i Nia hahalok kmanek!!! Repete-se
Ha’u povo, rona ha’u hanourin ba;
Sée tilun didiak ba liafuan hirak
Nebé sai housi ha’u ibun.
Ha’u ba ko’alia nu’udar dadolin,
Ha’u ba hatudu mistério sira uluk nian. Refrão
Wainhira Maromak fó castigo ba bei-ala sira,
Sira buka Nia, sira fila fali ba Nia,
No sira hanourin hikas fali katak
Maromak mak sira nia kbiit,
Maromak be áas ba mak sira nia maksoyn. Refrão
Maibé sira ibun bosok Nia,
Sira nanal lohi Nia;
Sira fuan la mós, no mós sira laran
La metin ba Nia lia moruk. Refrão
Maibé Maromak laran-luak,
Perdua sira salan, hodi la hamohu sira.
Dala barak tahan tiha Nia laran hirus,
Hodi la hala’o Nia laran nakali. Refrão
Segunda Leitura Flp. 2. 6-11
Lia housi São Paulo nia Surat ba Sarani iha Filipos
Maun alin sira: Maski nia Maromak lós, Nia la halo Nia-an nu’udar Maromak, maibé Nia haraik-an, hodi sai atan no halo An nu’udar ema; ema sira haré duni Nia nu’udar ema. Nia haraik An hodi halo tuir to’o mate, mate iha Cruz. Tan ne’e, Maromak foti Nia hodi fó ba Nia naran ida nebé boot liu naran sira hotu, atu nune’e, ba Jesus nia, aintur sira hotu hakne’ak, iha lalehan, iha rai, iha mate sira leet, no nanal tomak haklaken katak Cristo Jesus mak Na’i, ba Aman Maromak nia glória.
Maromak Futar Lia.
Aclamação
Refrão : Aleluia, Aleluia! Repete-se
Ami hahi Na’i Jesus Cristo, tanba hodi
Ita nia Cruz Santa, Ita soi mundo. Refrão
Evangelho Jo. 3. 13-17
† Na’i Jesus Cristo nia Evangelho nu’udar São João haktuir:
Iha tempo nebá, Jesus dehan ba Nicodemus: “Ema ida la dauk sa’e ba lalehan; maibé Ida nebé tun housi lalehan, katak Oan Mane. Nu’udar Moisés foti samea iha rai fuik maran, nune’e mós ema tenki foti Oan Mane, atu ema hotu nebé fiar iha Nia bele hetan moris rohan laek. Basa Maromak hadomi tebes mundo to’o fó Nia Oan-Mane-Mesak, atu ema hotu nebé fiar iha Nia, la bele lakon, maibé hetan moris rohan laek. Basá, Maromak la haruka nia Oan Mane mai iha mundo atu tesi lia ba mundo, maibé atu mundo hetan maksoyn hodi Nia”.
Lia Maksoyn.
