Primeira Leitura 1Tim. 1. 15-17
Lia housi São Paulo nia primeira Surat ba Timóteo:
Oan doben: imi bele fiar ne’e no ema la bele heli lia katak: Jesus Cristo mai iha mundo ne’e atu soi ema maksalak sira. Iha ema maksalak sira ne’e, ha’u mak boot liu. Tan ne’e mak Maromak hatudu Nia laran luak mai ha’u, atu iha ha’u, ema maksalak boot liu, Jesus Cristo bele hatudu nia paciência rohan laek ba ema seluk hotu nebé fiar Nia atu to’o ba moris rohan laek. Ba Liurai rohan laek ne’e, ba Maromak mesak ida de’it nebé sei la mate no matan la haré, ba Nia naran boot no glória tinan ba tinan nafatin. Amen.
Maromak Futar Lia.
Salmo Responsorial Sal. 112(113). 1-2, 3-4, 5a, 6-7 (R. 2)
Refrão : Rahun di’ak ba Na’i Nia naran ba nafatin!!! Repete-se
Atan sira Na’i nian, hahí Na’i,
Hahí Na’i nia naran!
Rahun di’ak ba Na’i nia naran
Tinan-ba-tinan. Refrão
Housi dader to’o loron monu,
Hahí nafatin Na’i nia naran;
Na’i ukun povo hotu,
Nia glória iha Lalehan hotu. Refrão
Tanesan sé Na’i, ita Maromak,
Be hakruuk housi leten atu haré lalehan no rai,
Nia foti housi rai, ema sira be kiak,
Hodi halo sira tur hamutuk
Ho ulu sira Nia povo nian. Refrão
Aclamação Jo. 14. 23
Refrão : Aleluia, Aleluia! Repete-se
Na’i dehan, ema sé hadomi Ha’u, sei halo tuir Ha’u nia liafuan;
Ha’u Aman sei hadomi nia, ami sei mai hela ho nia. Refrão
Evangelho Lc. 6. 43-49
† Na’i Jesus Cristo nia Evangelho tuir São Lucas
Iha tempo nebá, Jesus dehan ba escolante sira: “La iha aihun di’ak nebé fó fali fuan áat, eh aihun áat nebé fó fuan di’ak. Ema bele hatene aihun ida-idak housi nia fuan: ema la ku’u ai figueira nia fuan housi aitarak sira, eh uvas fuan housi ai fuik. Ema di’ak hasa’i buat di’ak housi nia laran di’ak, ema áat hasai buat áat housi nia laran áat. Ema nia ibun ko’alia housi buat nebé hakonu nia fuan”.
“Tan sá imi bolu ha’u ‘Na’i, Na’i’, maibé la halo tuir buat nebé Ha’u hateten? Ema nebé mai besik Ha’u no rona hodi halo tuir Ha’u nia liafuan, Ha’u sei hatudu ba imi ema ne’e hanesan sá lós? Nia hanesan ema nebé hari uma ida: nia ke’e kle’an, hodi tau nia hun iha fatuk leten; wainhira mota sai boot, be baku hasouru uma ne’e, maibé la bele sobu, basá hari tiha iha fatuk leten. Maibé ida nebé rona hodi la halo tuir, nia hanesan ema nebé hari tiha uma ida iha rai leten, hun metin la iha. Wainhira mota sai boot no be baku hasouru nia, uma ne’e monu kedas, sobu rahun áat liu”.
Lia Maksoyn.
