shadow
Diocese de Dili > NOTÍCIAS > LETURA DIÁRIA > Segunda – Feira, XXIV Semana do Tempo Comum (Ano C)

Segunda – Feira, XXIV Semana do Tempo Comum (Ano C)

Primeira Leitura                      1Tim. 2. 1-8

Lia housi livro São Paulo nia primeira Surat ba Timóteo:

Oan doben: Uluk knana’in, ha’u husu atu ó harohan ba ema hot-hotu nia di’ak, hodi husu, hamulak no fó agradece: ba liurai no na’i ulun sira, atu ita bele moris hakmatek no iha dame, hodi hamta’uk Maromak no moris nu’udar ema. Harohan hanesan ne’e monu lós ba Maromak, ita Maksoyn, nia laran. Nia hakarak katak ema hotu hetan maksoyn no simu matenek kona ba lialós. Tanba iha Maromak mesak ida de’it, no iha Maromak no ema hotu sira leet iha lia na’in ida de’it. Nia mós ema: Cristo Jesus, nebé saran an atu soi ema hotu. Nia mak sasin nebé Maromak haruka mai iha tempo lolós, no Maromak foti ha’u nu’udar nia manu ain no apóstolo, no, ha’u dehan lialós no la bosok ida, nu’udar mestre fiar no lialós nia nian ba gentio sira.

Ne’e duni, iha fatin hot-hotu ha’u hakarak halo ema tomak atu foti sira nia liman hodi harohan ho laran, la hodi hirus eh haksesuk malu.

Maromak Futar Lia.

 

Salmo Responsorial                                                                                                                                      Sal. 27(28). 2, 7, 8-9 (R. 6)

Refrão : Rahun di’ak ba Na’i, nebé rona ha’u nia harohan!!! Repete-se

Na’i, rona ha’u nia hamulak,

Wainhira ha’u harohan ba Ita,

Wainhira ha’u hasa’e ha’u liman,

Ba Ita Nia santuário. Refrão

 

Na’i, ha’u kbiit no ha’u tulun,

Iha Nia, ha’u tau ha’u neon tomak.

Na’i tahan ha’u no soi ha’u!

Ha’u fuan haksolok no agradece. Refrão

 

Na’i mak Nia povo nia heli-an fatin,

Kota maksoyn ba Nia Ungido.

Soi ba, Ita povo no fó bensa ba Ita liman-rohan,

Ita mak hatau sira no lori sira liu tempo hotu. Refrão

 

Aclamação                                                                                                                                                                                             Jo. 3. 16

Refrão : Aleluia, Aleluia!! Repete-se

Maromak hadomi tebes mundo, Nia fó Nia Oan-Mane-Mesak ba nia.

Ema hotu nebé fiar Nia, hetan moris rohan laek. Refrão

 

Evangelho                                                                                                                                                                                           Lc. 7. 1-10

Na’i Jesus Cristo nia Evangelho        Nu’udar São Lucas haktuir:

Iha tempo nebá, Wainhira Jesus hato’o tiha liafuan hirak ne’e hotu ba povo sira nia tilun, Nia tama iha Cafarnaum. Centurião ida nia atan nebé hadomi teb-tebes moras todan, besik atu mate. Rona tiha kona ba Jesus, nia haruka katuas Judeu sira nian atu husu Nia mai fó isin di’ak ba nia atan ne’e. To’o tiha ba Jesus, sira husu namanas ba Nia dehan: “Nia so’i atu Ita haraik buat ne’e ba nia, basá nia hadomi ita nia povo; nia rasik hari ami nia sinagoga.” Jesus ba hamutuk ho sira. Wainhira sira besik ona uma, centurião haruka nia belun sira atu hateten ba Nia: “Na’i, keta hakole an, basá ha’u la soi atu Ita tama iha ha’u nia uma. Tan ne’e mak ha’u la barani atu mai hasouru Ita. Dehan de’it liafuan ida, no ha’u atan sei hetan fali isin di’ak. Basá ha’u, nebé halo tuir ema boot liu, iha mós soldado sira nebé halo tuir ha’u.

Ha’u dehan ba ida: ‘Ba’, nia ba; ba ida seluk: ‘Mai’, nia mai; ba ha’u nia atan: ‘Halo ne’e’, nia halo.” Rona tiha liafuan hirak ne’e, Jesus hakfodak, hodi fila oin ba ema lubun boot nebé tuir Nia dehan: “Tebes, Ha’u dehan ba imi katak iha Israel mós ha’u la hetan fiar hanesan ne’e.”

Wainhira manuain sira to’o uma, sira hetan atan isin di’ak fali ona.

Lia Maksoyn.

Leave a Reply

Your email address will not be published. Required fields are marked *