shadow
Diocese de Dili > NOTÍCIAS > LETURA DIÁRIA > Terça – Feira, XXIV Semana do Tempo Comum (Ano C)

Terça – Feira, XXIV Semana do Tempo Comum (Ano C)

Primeira Leitura                      1 Tim. 3. 1-13

Lia housi livro São Paulo nia primeira Surat ba Timóteo:

Oan doben: imi bele laran metin ba liafuan ida ne’e: Hakarak sai bispo mak hakarak halo serbisu nebé di’ak lós. Tan ne’e, bispo ida tenki moris di’ak, hola feto dala ida de’it; nia hatene ukun an, matenek no laran maus no sai mestre di’ak ida; la’os lanuten ka si’akten, maibé laran di’ak no dame na’in. Nia la kaan ba osan. Nia hatene tau matan didi’ak ba nia família hodi hanourin nia oan sira atu halo tuir nia haruka no sai ema ho hahalok di’ak: oin sá ema ida bele tau matan ba Maromak nia Kreda wainhira nia la hatene tau matan ba nia família rasik? Sarani foun la bele sai bispo; keta nia sai loko an, no tuir mai simu naran áat nu’udar diabo simu naran áat. Mós, ema nebé la halo parte iha Kreda ko’alia di’ak kona ba nia, atu nune’e nia la bele hetan naran fo’er hodi monu ba diabo nia hani.

Nune’e mós, diácono sira tenki sai ema ho naran di’ak; la’os bosokten; lanuten, no la buka osan, laran metin kona ba mistério fiar nian, no ho laran mós, la konta ema nia moris, maibé neon na’in np ema bele fiar.

Diácono sira hola feto dala ida de’it, no hatene tau matan didi’ak ba sira nia oan no família. Nune’e sira nebé káer didi’ak knaar diácono nian bele hetan naran di’ak ba sira an rasik no ema sei fiar lolós sira iha sira nia servisu ba fiar iha Cristo Jesus.

Maromak Futar Lia.

 

Salmo Responsorial                                                                                                       Sal. 100(101). 1-2ab, 2cd-3ab, 5-6 (R. cf. 2b)

Refrão : Ha’u sei la’o tuir dalan lós!!! Repete-se

Ha’u sei hananu laran luak no justiça;

Ba Na’i, ha’u sei hananu salmo!

Ha’u hakarak la’o tuir dalan lós;

Wainhira lós Ita sei mai to’o iha ha’u?. Refrão

 

Ha’u sei moris ho laran mós

Iha ha’u uma laran;

Ha’u sei la tau iha ha’u matan oin,

Hahalok áat sira. Refrão

 

Ha’u sei halo ema laran makerek taka ibun,

Ida be hafo’er nia maun-alin nian naran.

Ha’u la tahan ema laran áat sira nia fuan,

Ha’u sei la fó liu ema loko an. Refrão

 

Ha’u sei hateke ba ema laran maus sira iha ha’u rain,

Atu sira sei hôrik ho ha’u;

Ema sira be halo tuir dalan lós

Sei bele sai ha’u nia atan. Refrão

 

Aclamação                                                                                                                                                                                             Lc. 7. 16

Refrão : Aleluia, Aleluia!! Repete-se

Profeta boot ida mosu tiha iha ita nia leet;

Maromak mai haré tiha Nia povo. Refrão

 

Evangelho                                                                                                                                                                                         Lc. 7. 11-17

Na’i Jesus Cristo nia Evangelho Nu’udar São Lucas haktuir:

Iha tempo nebá, Jesus ba cidade ida naran Na’im. Nia escolante sira no ema lubun boot tuir Nia. Wainhira Nia besik ona cidade nia odamatan, ema lori atu hakoi ema mate ida, feto faluk ida nia oan mane mesak. Ema barak housi cidade ba hamutuk ho feto ne’e. Haré tiha nia, Na’i hanoin nia ho laran hodi dehan ba nia: “Keta tanis!” Nia hakbesik, hodi kona caixão. Sira nebé lori nia hamriik tiha. Hafoin nia dehan: “Klosan, Ha’u dehan ba ó, hamriik ba!” Ema mate ne’e tur no hahu ko’alia. Jesus saran nia ba nia inan. Ema hotu hakfodak hodi hahí Na’i Maromak dehan: “Profeta ida mosu tiha iha ita nia leet; Maromak mai haré tiha Nia povo!” Lia kona ba Nia naklekar ba Judeia tomak no ba rai hot-hotu besik nebá.

Lia Maksoyn.

Leave a Reply

Your email address will not be published. Required fields are marked *