shadow
Diocese de Dili > NOTÍCIAS > REFLEXÃO > LABELE SERVI OSAN HO MAROMAK DALA IDA

LABELE SERVI OSAN HO MAROMAK DALA IDA

Leitura no Reflexão ba Domingo XXV Comum, Ano  C

 

               Impasse política iha Timor Leste iha tinan tolu ikus ne’e hamosu vingança politica tama too sector hot-hotu iha estrutura esrado nian. Maske nune’e, povo baibain moris la nakdoko no ida rua nebé acompanha situação mak sente inflenciado.

               Buat nebé halo ita hanoin la too mak ne’e; lider política sira trata malu husi media social, sira lakon sentido diálogo, se kotuk ba malu, lekar segredo sira ba público, ida-idak konta ninia história tuir versão rasik no ikus mai halo povo sira dehan; afinal ukun nain sira nebé uluk sai mata dalan ba ukun rasik-an ida ne’e mesak kan ten poder, matan osan, fahe projecto ba malu, fo prioridade liu ba partido, recruta funcionário tuir partido. Pior liu mak sira nia hahalok ne’e hamihis povo nia sentido respeita ba sira.

               Poder no riku soin bele halo ema haluha-an tiha katak loron ida sira mate, buat hotu rai hanesan história deit. Precisa discerne didiak hodi tau saida mak prioridade ba povo no saida mak sai interece privado eh interece grupo/partido.

               Evangelho Domingo semana ne’e (Lc 16, 1-13) relato naruk oitoan no mos la fácil ba ita atu compreende klean conteudo husi mensagem Evangelho ne’e. Atu entende didiak ita precisa hanoin hakmatek hodi compreende lia menon Evangelho ne’e ho fiar metin. Pelo menos, lia menon principal nebé ita bele hetan husi reflexão Evangelho Domingo semana ne’e mak ne’e: ita nudar ema fiar nain, precisa hatene no hakarak duni valoriza no utiliza valor husi riku soin mundo ho riku soin lalehan prudentemente banati tuir Jesus nia doutrina sira. Jesus rasik hanorin dehan: ”Atan ida la bele servi patrão Na’in rua : basá, nia servi ida hodi husik ida seluk, eh nia sei hadomi ida hodi hewai ida seluk. Imi la bele servi Na’i Maromak hodi servi mos osan!” // Nenhum servo pode servir a dois senhores; ou há-de aborrecer a um e amar o outro, ou dedicar-se a um e desprezar o outro. Não podeis servir a Deus e ao dinheiro.» (Lc 16,13).

                Saida mak Jesus dehan, bele considera hanesan lia fuan kroat basá, Jesus halo comparação kona ba tesoreiro (bendahara) nebé la sincere (la jujur) alias bosok ten:” “Anak-anak dunia ini lebih cerdik terhadap sesamanya dari pada anak-anak terang” // É que os filhos deste mundo são mais sagazes que os filhos da luz, no trato com os seus semelhantes». (Lc 16,8).

               Iha ai-knanoik ne’e, Jesus hakarak convida ita hodi bele hamoris sentido nebé lolos kona ba relação entre moris iha mundo rai klaran no moris aban bainrua iha Lalehan. Jesus haree iha sociedade judeu altura neba no mos sociedade ohin loron katak; ema iha tendência no matenek buka segurança, certesa (kepastian) no garáncia ba futuro moris iha rai klaran ne’e. Exemplo: wainhira ema ida halibur osan eh rai osan barbarak iha banco, nia hanoin dehan nia futuro garantido ona…..ba Jesus, ida ne’e seidauk seguro 100%

               Jesus prefere liu mak; ema iha hanoin diak hodi tulun ema seluk nebé precisa ou halo netik lalaok diak ka serviço caritativa ruma. Jesus nia preferência ida ne’e atu encoraja eh fanun ema nia hanoin katak; hahalok diak ne’e assegura ona condição hakmatek ba klamar iha loron ikus.

               Ema bele deit hetan osan barak eh rai osan rihun ba rihun iha banco maibé, hakas-an ba atu keta sai atan ba riku soin temporário (sementara) ne’e. Se ema coloca Maromak nia hakarak nudar centro ba moris, certamente ema sei hatene fahe soin balu ba ema seluk tanto materialmente, tanto espiritualmente. Basá, Maromak hakarak nia emar hotu moris ksolok no moris naton (la kuran buat ida).

               Sarani barak durante ne’e considera-an katak; sira cumpri didiak ona sira nia dever nudar Cristão ba Maromak. Sira confia katak; liu husi serviço oioin nebé sira submete iha moris. Ba Maromak, ida ne’e seidauk suficiente hodi justifica ita nia relação diak ho Maromak wainhira sarani ida la justifica fiar ne’e ho hahalok caridade sira.

               Tanba ne’e mak São Tiago apóstolo dehan: Fiar nebé la hatudu iha moris, fiar ne’e buat maten boot ida: Assim como o corpo sem alma está morto, assim também a fé sem obras está morta (Tg 2,26). Passagem Bíblica São Tiago ne’e hakarak fanun ita nia consciência hodi hatudu hahalok diak ruma hodi justifica ita nia fiar ba Maromak. Fiar ho hahalok mak bele kesi metin relação diak entre ema ho Maromak.

               Ema precisa serviço makas hodi fahe tempo ba moris no mos fahe tempo ba Maromak. Maneira fácil atu habelun ho Maromak mak oração hafoin aplica mos acto caritativo ruma iha vida lorloron. La bele preocupa demais ho osan hodi haluha fo tempo ba Maromak. Nudar sarani ema precisa conscinte katak; ema por natureza, ser social nebé sempre precisa mos ema seluk nia tulun/apoio. Ho presença ema seluk nian ne’e, sarani ida precisa esforço-an hodi hetan felicidade (ksolok) no prosperidade espiritual iha rai no mos iha lalehan. Ne’e laos predicção maibé, ne’e dever absoluta ida hodi hariku sarani ida iha aspecto espiritual; tanto iha mundo no mos iha moris aban bainrua nian.

Nune’e, mensagem principal husi relato Evangelho nebé São Lucas haktuir ba ita iha Domingo semana ne’e mak:

Primeiro: atu ita nudar Cristão Católico hetan nafatin kbiit no perseverança (ketekunan) wainhira hasoru desafio sira iha moris sarani nian.

Segundo: atu sarani ida-idak esforço-an no utiliza ninia riku soin sira iha rai ne’e hodi hametin diak liu tan relação ho Maromak liliu tulun ema hira nebé moris kuran liu (os necessitados).

Terceiro: Se se deit mak iha soin barak, precisa consciente nafatin katak: ita ema laos nain lolos (dono absoluto) ba riku soin sira iha rai ne’e maibé, Maromak mak hakbiit ema ne’e hodi hola parte iha mundo ne’e. Nune’e, riku soin oi-oin iha rai ne’e merece ba ema hotu hodi goza laos ema eh grupo balun deit bas’a, ne’e injustiça contra regra natural.

Atu sarani hotu bele halao lalaok hirak ne’e, sarani ida-idak hetan bolu eh convite hodi determina rasik lalaok moris tuir liberdade nebé Maromak tau iha nia kbaas. Empresário ida precisa tau iha consideração katak: oinsa nia bele buka maneira atu ema hotu hetan acesso ba ninia resultado serviço. Nune’e mos ema Cristão Católico ida precisa brani hodi tuir Nia Jesus nia ain fatin, atu ikus mai nia merece Maromak nia laran luak. Iha reino Lalehan, responsabilidade ho graça Maromak nian, sei fo deit ba ema hirak nebé perseverante no hatudu duni fidelidade ba doutrina Jesus Cristo nian durante iha rai ne’e. Assim Seja….. (Ignaslopes)

Leave a Reply

Your email address will not be published. Required fields are marked *