shadow
Diocese de Dili > NOTÍCIAS > Notícias > Paróquia Bedois Simu Ilas São João Paulo II

Paróquia Bedois Simu Ilas São João Paulo II

DCAD –  Durante semana ida ho balun Ilas São João Paulo II hela hamutuk ho sarani Quase Paróquia São Tiago, Hera  no iha Quarta-Feira, loron 25 fulan Setembro tinan 2019, sarani lubun housi Paróquia Balide acompanha hikas Ilas São João Paulo II iha ambiente oração nian hodi entrega hikas Ilas São João Paulo II ne’e ba Paróquia Santa Terezinha do Menino Jesus Bedois.

Iha biban kmanek ne’e, Padre Quase Paróquia São Tiago Hera Padre Jose Tasain iha nia mensagem hateten, “durante kalan 9 no loron 10, ami simu Ilas São João Paulo II iha raihenek mutin hodi tama sai ami nia bairros no Capelas. Ho presença Ilas ida ne’e sarani sira contente no participação sarani Hera nian máximo tebes diferente ho tempo bai-bain nian. Ho visita Ilas São João Paulo II nian iha ami nia le’et, ami mos halo formação sira durante visita Ilas ida ne’e. No ohin ami mai hodi entrega hikas Ilas São João Paulo II ba Amo Pároco hamutuk ho sarani sira Bedois nian. Além ne’e mos ami sei entrega cixa colecta nian ba Amo hamutuk ho sasan sira seluk ne’ebe  comunidade bairros oferece durante visita Ilas iha ami nia Quase Paróquia ne’e.  

Ami entrega ho laran haksolok katak Ilas ne’e bele mai visita ami depois ami mos sei entrega ba ita boot sira maske sarani sira hotu-hotu hatudu sira nia sentimento triste laos tanba atu Santo ida ne’e ba ona, maibe durante loron 9 nian laran ne’e, sira sente duni katak mahein ida ne’e mai lori duni graça no benção ba sarani tomak Quase Paróquia Hera nian”.

Iha sorin seluk Padre Pároco Paróquia Santa Terezinha do Menino Jesus Bedois, Padre Alberty Franco Morato hateten, “ohin ita simu fila fali Ilas São João Paulo II mai iha ita nia le’et no sei lao fo volta Bairros no Capela sira ne’ebe pertence ba iha Paróquia Bedois nian to’o loron 20 fulan Outubro ita sei entrega hikas Ilas São João Paulo II ba iha Arquidiocese. Tanba ne’e iha durante visita Ilas ida ne’e iha ita nia Bairros no Capelas, ita sei realiza atividade sira Espiritual nian no mos missa. Tanba ne’e ohin lori sarani tomak Paróquia Bedois nian fatin sente haksolok ho presença Ilas São João Paulo II nian iha ami le’et. No ami hein katak presença Ilas Santo ida ne’e nian la liu le’et de’it, maibe sei husik buat murak mean ruma ba sarani Bedois”.

Remata tiha atividade entrega no simu Ilas São João Paulo II ne’e, continua kedas ho missa ne’ebe preside housi Diretor Missio Dili nian atual Prefeito Disciplina Seminário Menor Balide Padre Patrocínio da Cunha Nunes iha Igreja Paróquia Santa Terezinha do Menino Jesus Bedois, Dili hamutuk ho padre concelebrantes sira housi Paróquia sira bes-besik ne’ebe pertence ba iha Arquidiocese Dili nian. (Alin)

Leave a Reply

Your email address will not be published. Required fields are marked *