shadow
Diocese de Dili > NOTÍCIAS > LETURA DIÁRIA > Sexta – Feira, XXV Semana do Tempo Comum (Ano C)

Sexta – Feira, XXV Semana do Tempo Comum (Ano C)

Primeira Leitura                    Ag. 1. 15b-2. 9

Lia housi Profecia Ageu nian:

Iha liurai Dario nia ukun ba tinan rua, iha loron ruanulu resin ida fulan bad ala hitu nian, Na’I Nia laifuan tun nune’e housi profeta Ageu: “Ba hateten ba Zorobabel, Salatiel nia oan, embo’ot judá nian; ba Josué, na’ilulik boot Josadac nia oan; ba povo nebé sei moris: ‘Iha imi leet sei moris ema ruma nebé houri uluk haré templo ne’e nia furak no  nia kmanek? Oras ne’e imi haré nia oinsá? Imi haré nia hanesan buat ida la folin? Di’ak aten barani ba Zorobabel – Na’i dehan. Aten barani ba, Josué, na’ilulik boot, Josadac nia oan. Aten barani ba, povo tomak rai nia – Na’i dehan. Tau imi liman ba serbisu basá, Ha’u hôrik ho imi – Na’i dehan. Tuir moruk nebé Ha’u halo ho imi, wainhira imi  sai housi Egipto, Ha’u Nia espírito hôrik iha imi leet. Imi la bele tauk buat ida! Basá, Na’i lalehan ho rai nian hateten nune’e: La kleur de’it, Ha’u sei halo nakdoko lalehan no rai, tasi no rai hotu. Ha’u sei halo nakdoko nação tomak, atu riku-soi tomak nação hirak ne’e nian, bele suli hotu mai iha ne’e. Ha’u sei halo nakonu templo ne’e glória – Na’i lalehan no rai nian dehan. Osa mean no osa mutin Ha’u Nian – Na’i, Mundo rai-klaran nia dehan. Glória templo foun nian sei boot liu fali ida uluk nian – Na’i, Mundo rai-Klaran nian dehan. Iha fatin ne’e, Ha’u sei hari dame – Na’i, mundo rai-klaran nian dehan.”

Maromak Futar Lia.

 

Salmo Responsorial                                                                                                                            Sal. 42(43). 1, 2, 3, 4 (R. cf. 5bc)

Refrão : Ha’u hein iha Maromak, ha’u Maksoyn!!! Repete-se

Ha’u Maromak, halo justiça mai ha’u,

tahan ha’u hasouru ema áat.

Housi ema makerek no laran áat,

soi ha’u Oh! Maromak. Refrão

 

Ita mak ha’u Maromak no ha’u tulun,

tan sá heuwai ha’u?

Tan sá ha’u la’o neon kraik,

Wainhira funu baluk sira hanehan ha’u? Refrão

 

Haraik Ita naroman no lialós mai,

nu’udar ha’u nia mata dalan,

atu sira hatudu dalan lós mai ha’u,

ba Ita hôrik fatin santo. Refrão

 

Nune’e ha’u sei to’o altar Maromak nian,

Maromak ha’u ksolok nian.

Ha’u Maksoyn, ha’u agradece Ita ho citara,

Na’i ha’u Maromak. Refrão

 

Aclamação                                                                                                                                                                                         Mc. 10. 45

Refrão : Aleluia, Aleluia!! Repete-se

Oan Mane mai atu serbi ema,

no saran Nia moris atu soi ema hotu. Refrão

 

Evangelho                                                                                                                                                                                       Lc. 9. 18-22

Na’i Jesus Cristo nia Evangelho nu’udar São Lucas haktuir:

Iha tempo nebá, loron ida, wainhira Jesus harohan mesa-mesak ho nia escolante sira de’it, Jesus husu ba sira: “Ema dehan H’au se lós?” Escolante sira hatan: “João Baptista; balun dehan, Elias; balun fali dehan, profeta ida uluk nian mak moris hi’as.” Nia husu ba sira: “Imi rasik dehan Ha’u se lós?” Pedro simu hodi dehan: “Ita Maromak nia Cristo.” Nia bandu sira atu la bele fó sai buat ne’e ba ema ida, dehan: “Oan Mane sei terus barak: katuas sira, na’ilulik boot no escriba sira sei hakribi Nia hodi oho Nia; no liu tiha loron tolu Nia sei moris hi’as”.

Lia Maksoyn.

Leave a Reply

Your email address will not be published. Required fields are marked *