shadow
Diocese de Dili > NOTÍCIAS > REFLEXÃO > RIKU LA IHA NARAN

RIKU LA IHA NARAN

REFLEXÃO BA DOMINGO XXVI COMUM, ANO C

 

Oração Salmista Domingo Semana nee harohan:” Na’i tulun ema sira be ema fo terus Haraik ai-han ba ema sira be hamlaha, Fo liberdade ba sira be dadur”.

Santa Teresa de Ávila hameno ba ita nobun dehan: ”Oras nee Cristo la iha isin (físico), Ninia isin mak o; Cristo la iha liman-ain oras nee, Ninia liman-ain mak o; liu husi o nia matan mak Cristo hatudu Ninia domin ba mundo; o nia ain be hakat mak bele haktadak Cristo nia domin; o nia ibun be tenik mak expressa Cristo nia diak sira; o nia liman mak Cristo nia liman be haraik bensão ba mundo”.

Evangelho São Lucas Domingo semana nee, relata ai-knanoik ida maibé, se ita refelcte liu deit, ita sente hanesan provoca oitoan ita nia sentimento, sadik mos ema nia emoção kona ba Jesus nia impressão ba ema riku nomos ema kiak.

Maibé, wainhira Evangelho nee ita lee eh rona didiak ho hakmatek no nakonu ho fiar no princípio moris, então leitura Evangélica nee sei lori ita ksolok nebe rohan laek. Tan nee, Evangelho Domingo semana nee, precisa ita lee eh rona ho hakmatek, la iha presuposto (prasangka), maibé, precisa liu mak fiar ba Liafuan hirak nee nudar Lia Foun Diak (Boa Nova) basá, LÁZARO significa: “Maromak fo tulun”. Tanba nee mak ema kiak nee wainhira mate, nia bele tur hakmatek iha aman Abrão nia hitin. 

Ema riku nebe Jesus temi iha ai-knanoik nee mak; ema hirak nebe durante moris tomak, hanoin-an deit (self-centered) hodi haluha ema seluk nebe hetan susar iha nia sociedade. Ema riku nee hatais mesak furak, lor-loron han didiak deit. Iha nia moris, nia la kuran buat ida tan nia iha buat hotu. Nia la hanoin oinsa atu lolo netik liman hodi apoio ba ema seluk. Buat nebe importante liu mak hanoin uluk nia kabun. Precisa ita tau iha consideração katak; Bíblia Sagrada la temi ema riku nee nia naran. Nunee hodi justifica katak; keta ema riku nee mak ita hirak nebe rona dadaun Maromak nia lia fuan eh keta riku nee mak ita sira nebe sai ona sarani nee.

Buat nebe ita considera iha valor boot dalaruma ninia valor nee válido temporário (sementara) deit tan wainhira ita sei loke matan, ita haree sira importante tebes ba moris nee. Ema riku nudar ai-knanoik haktuir, nia la iha vontade atu servi Maromak nem precisa Maromak hodi guia nia moris. Nia so precisa mak satisfaz deit ninia necessidade sira iha rai nee, buka gosto deit, liliu ksolok mundo nian. Nunee, nia habelun-an iha ninia mundo rasik, nia husi Lázaro habelun ho nia moras sira. St. Vincent Palloti hatete lia murak ida nunee: Not the goods of the world, but God. Not riches, but God. Not honors, but God. Not distinction, but God. Not dignities, but God. Not advancement, but God. God always and in everything—Bukan harta duniawi, namun Tuhan. Bukan kekayaan, namun Tuhan. Bukan kehormatan, namun Tuhan. Bukan kemajuan, namun Tuhan. Tuhan selalu dan didalam segala sesuatu.

Ema riku nee conhece didiak oinsa Lázaro goza nia moris kiak durante vida tomak, maibé, ema riku nee finge la hatene ou linguagem moderna dehan nia hateke Lázaro la hetan. Nunee, riku nia lalaok nee reflecte lalaok ninian ba Maromak. Basá, ema riku nee tau matan deit ba nia-an hodi lakon consideração ba Lázaro ao mesmo tempo ba Maromak.

Ema kiak sira iha sociedade laos ema nebe lakon valor eh la iha dignidade maibé, ema hotu iha dignidade no ema hotu mak imagem concreta Maromak nian. Tanba nee, bele kiak rabat rai ba….bele riku perlente ba…ema hotu mak Maromak nia lalatak.

Wainhira, ema riku nee mate, nia hanoin katak nia sei goza lalehan hanesan iha rai nee, maibé, buat nebe acontece dook tebes husi ninia espectativa mundo nian. Nia fatin iha ahi laran nebe sunu la hotu rai…….Lázaro nebe hetan susar ona iha mundo nee, too ona nia tempo atu sente mos ksolok Reino Lalehan nian. Lázaro merece halibur hamutuk ho aman Abraão. Maske Evangelho haktuir kona ba diálogo badak entre ema riku ho Lázaro maibé, conversa nee la resolve saudades ema riku nian hodi ba hamutuk ho Lázaro iha fatin nebe Abraão horik ba.

Lázaro, maske durante nia moris tomak terus ho ninia condição kiak maibé, certamente nia fuan besik ba Maromak. Realidade moris Cristão nian mos reflecte ba lalaok nee ou ita bele justifica katak; so ema kiak deit mak barak liu precisa Maromak nia tulun. Ema riku balu buka Maromak wainhira nia iha interece balu ou buka Maromak wainhira nia monu iha susar.

Ema kiak iha ai-knanoik nee, bele dehan nunca husik Maromak iha ninia condição kiak. Nia roupa be fofoer, hamlaha-hamrook, luta atu nia sobrvive nafatin, ninia isin be nakonu ho moras oioin, até asu sira mai lambe, nia mos horik iha ema riku nia uma tatis até hili hahan restu be monu husi mesa leten…irónico tebes.

Nunee, wainhira nia mate, anjo sira mai lori nia ba lalehan hodi bele sente ksolok hamutuk ho Abraão iha neba. Iha fatin neba, Lázaro mos bele sente furak oinsa moris iha Reino Maromak nian.

Diferença nebe ita bele haree entre Lázaro ho ema riku wainhira sira sei moris iha rai nee mak; wainhira sira sei moris iha rai klaran, la iha rai-horun (jurang pemisah) entre sira nain rua. Lázaro moris hanesan mendigo/pengemis ida iha ema riku nia odamatan liur, iha neba, ema riku nee bele lao tama sai hodi haree hela oinsa Lázaro toba terus hela iha nia uma tatis husi loron ba loron, ema riku nee mos iha possibilidade atu fo tulun tan sira besik malu hela maibé, saida mak acontece mak nee; ema riku nee fihir Lázaro la hetan.

Maibé, iha mundo seluk, iha Rai horun (abismo) ida nebe haketak lalehan ho inferno. Jesus utiliza imagem abismo nee hodi expressa fatin mamuk no luan, fatin naruk ida, nebe la bele liga ida ho ida seluk. Tanba nee mak iha Diálogo ai-knanoik nee, ema riku husu Abraão atu Lázaro hanoin netik nia:”Ha’u Aman Abraão, sadia atan ha’u! haruka netik Lázaro habokon nia liman fuan ba wé hodi halo malirin ha’u nánal, basá, áhi han ha’u maka’as tebes iha ne’e! “Abraão simu hodi dehan:“oan, hanoin ba, Ó nia di’ak ó simu ona iha ó nia moris tomak; Lázaro fali simu mak susar iha nia moris tomak. Oras ne’e Lázaro haksolok iha ne’e, maibé, ó fali hetan terus maka’as. Hafoin, housi ami ba imi mos, rai-horun naruk boot haketak ita. Ema ida hakarak karik liu ba imi, sei labele; imi ida hakarak hakatak mai ami, mos sei la bele! “”

Certamente, ema riku nee, durante nia moris tomak, nia rona bebeik profeta eh nailulik sira koalia kona ba oinsa fo tulun ba ema kiak sira. Buat nebe nia halo mak nee; nia la consegue tulun Lázaro nebe tanaat/tane liman iha nia uma tatis/odamatan oin. Profeta sira mos desde tempo uluk haklaken ona katak; Maksoin sei moris iha Belém, no kosok oan nee sei sai belun ba ema kiak sira no ema marginalizado sira (Is 61, 1-2).

Maibé ema riku iha la iha fuan no la tau matan ba nia maluk sira nebe precisa nia tulun. Profeta sira hanorin, Jesus mos hanorin maibé, ema balu deit mak hakarak rona hodi halo tuir iha moris. Talves, ema riku nee hanoin katak; nia iha posição diak ona nunee, nia la merece atu fo tulun ba ema kiak/marginalizado sira.

Iha ita nia nação Timor Leste, Lei Pensão Vitalícia sai tópico interessante, ema debate iha sociedade. Ema barak prefere halakon lei nee tanba ema balu hetan diak, iha momento nebe povo barak sei mukit hela. Maibé, ukun nain sira defende nafatin continuidade lei nee tanba, se halakon, então, sira nia dignidade mos sei lakon …irónico tebes.

Presidente Taur Matan Ruak rasik iha ninia descurso iha Parlamento Nacional dehan: lei Pensão Vitalícia hamosu paracita iha nação Timor Leste.

Capítulo 16, Evangelho São Lucas nian, laos deit koalia kona ba problema osan ho riku soin maibé, koalia mos kona ba relação entre ema ida ho ema seluk nebe ao mesmo tempo reflecte ba relação entre ema ho Maromak.

Mensagem principal liu nebe ita bele capta iha capítulo 16 Evangelho São Lucas nian mak: relação pessoal. Hodi ajuda/tulun ema seluk, ita forma ona ita nia personalidade nudar ema Cristão Católico nebe diak. Nunee, iha expressão ema indonésia nebe hateten:” Karena itu dengan memberi kita justru menerima! Apakah yang lebih berguna, lebih luhur serta mulia dan lebih berkenan kepada Allah daripada menjadi seperti Yesus yang menjadi mulia karena menghargai kaum miskin?”. Relaciona ho expressão nee, Santa Teresa de Calcutá dala ida hatete dehan:”Mãos que servem são mais santas que os lábios que rezam”.

Ita taka refelxão nee ho Santo Agostinho nia lia menon nebe hatete:” Take care of your body as if you were going to live forever; and take care of your soul as if you were going to die tomorrow—peliharalah tubuhmu seakan hendak hidup selamanya; peliharalah jiwamu seakan esok adalah kematianmu~St Agostinho”.  (Ignas lopes)

Leave a Reply

Your email address will not be published. Required fields are marked *