shadow
Diocese de Dili > NOTÍCIAS > LETURA DIÁRIA > Quarta – Feira, XXVI Semana do Tempo Comum (Ano C)

Quarta – Feira, XXVI Semana do Tempo Comum (Ano C)

Primeira Leitura                            Ne. 2. 1-8

Lia housi livro Neemias nian:

Iha fulan Nisã, tinan ruanulu iha liurai Artaxerxes nia ukun, iha nebé ha’u simu knaar serbi tua nian, ha’u káer tua hodi fui ba liurai. Houri uluk kedas, ha’u la dauk hatudu oin nakraik iha nia oin. Tan ne’e, liurai husu mai ha’u: “Tan sá ó hatudu oin nakraik nune’e? Ó la moras; ne’e hatudu katak ó laran susar!” Ha’u hakfodak tebes hodi hatan ba liurai: “Viva liurai ba nafatin! Oinsá ha’u la bele hatudu laran susar, wainhira cidade nebé ha’u nia bei-ala sira nia rate hela ba, naksobu hotu tiha ona, nia odamatan sira ahi mak han hotu tiha ona?” Liurai hateten mai ha’u: “Ó hakarak husu saidá?” Ha’u harohan ba Maromak hodi dehan ba liurai: “Ha’u hetan karik di’ak iha ita oin, ita iha laran-luak ba ita atan, husik atan ha’u ba Judeia, cidade nebé ha’u nia bei-ala sira nia rate hela ba, atu hadi’a fila fali rate sira”. Liurai hodi liurai feto tur hela iha nia sorin husu mai ha’u: “Ó lori loron hira atu to’o iha nebá? Wainhira mak ó fila mai?” “Ita husik ha’u ba karik ha’u sei hakotu loron nebé ha’u sei fila mai”. Ha’u dehan teni ba liurai: “Ha’u hetan di’ak iha ita oin karik, halo surat ida ba liurai iha mota Eufrates nia sorin balu ba, ha’u lori entrega ba sira atu sira husik ha’u liu ba Judeia; halo mós surat ida ba Asaf, nebé hein liurai nia uma, atu fó ai-kabelak ba ha’u hodi hadi’a fali odamatan cidade templo nian, baki sira cidade nian, no uma nebé ha’u hôri ba”. Liurai fó duni mai ha’u buat nebé ha’u husu, basá, Ha’u Maromak Nia laran-luak hela ho ha’u.

Maromak Futar Lia.

 

Salmo Responsorial                                                                                                                        Sal. 136(137). 1-2, 3, 4-5, 6 (R. 6ª)

Refrão : Jerusalém, ha’u haluha karik ó, ha’u nanal sei tós tiha!!! Repete-se

Iha Babilónia, mota sira ninin,

Ami tur tanis hodi hanoin Sião;

Iha ai salgueiro be moris mota ninin,

Ami tara ami harpa sira. Refrão

 

Sira be lori ami ba dadur

Hakarak rona ami hananu;

Sira be hanehan ami, knananuk ksolok nian:

“Hananu ba knananuk ida Sião nian”. Refrão

 

Oinsá ami bele hananu knananuk Na’i Nian,

Iha ema seluk rain?

Ha’u haluha tiha karik ó, Jerusalém,

Ha’u liman lós maten tiha ba. Refrão

 

Ha’u nanal belit tiha iha ibun laran ba,

Ha’u la hanoin hetan karik o,

Ha’u la tauk karik Jarusalém,

Iha ha’u ksolok hotu nia leten! Refrão

 

Aclamação                                                                                                                                                                                     Filip. 3. 8, 9

Refrão : Aleluia, Aleluia!! Repete-se

Ha’u hakribi sasan hotu nu’udar buat folin laek

atu bele fó fatin ba Cristo no hasouru malu ho Nia. Refrão

 

Evangelho                                                                                                                                                                                       Lc. 9. 57-62

Na’i Jesus Cristo nia Evangelho nu’udar São Lucas haktuir:

Iha tempo nebá, tuir dalan ema ida dehan ba Jesus: “Ha’u sei la’o tuir Ita ba fatin hotu!” Jesus hatan ba nia, “Asu fuik iha rai kuak, manu sira lalehan nian iha knuuk; maibé Oan Mane la iha fatin atu sadere nia ulun ba.”

Ba ida seluk Nia dehan: “Ó tuir Ha’u mai!” Maibé ema ne’e hatan: “Na’i, husik ha’u ba hakoi lai ha’u nia aman”. Jesus hatan ba nia: “Husik matebian sira hakoi matebian sira; maibé ó fali, ba hodi haklaken Maromak nia reino”.

Ema seluk dehan: “Ha’u sei tuir Ita, Na’i; maibé husik ha’u fó hatene lai ba sira nebé iha ha’u nia uma laran”. Jesus hatan ba nia, “Ema nebé tau ona liman ba sarua, hafoin fila oin ba kotuk, nia la soi ba Maromak nia reino”.

Lia Maksoyn.

Leave a Reply

Your email address will not be published. Required fields are marked *