shadow
Diocese de Dili > NOTÍCIAS > LETURA DIÁRIA > Quinta – Feira, XXVI Semana do Tempo Comum (Ano C)

Quinta – Feira, XXVI Semana do Tempo Comum (Ano C)

Primeira Leitura        Ne. 8. 1-4ª, 5-6, 7b-12

Lia housi livro Neemias nian:

Iha loron hirak nebá, povo Israel tomak halibur hamutuk hanesan ema ida de’it iha praça Jerusalém nian nebé iha odamatan Wé nian, nia oin. Sira dehan ba escriba Esdras atu lori Moisés nia livro Lei nian mai, nebé Na’i haruka nanis ba Israel. Nune’e, Na’ilulik Esdras lori livro Lei nian mai, iha povo tomak nia oin, nebé iha mane no feto barak, no ema hotu nebé bele comprende nia oin. Iha loron ida fulan ba dala hitu, hahu lê livro Lei nian ne’e housi dader to’o loron fahe rua, iha rai luan boot, iha Odamatan Wé nian, iha mane no feto sira oin, no ema hotu nebé bele comprende nia oin. Povo tomak sée tilun hodi rona ho neon liafuan hirak sai housi livro Lei nian.

Esdras, escriba ne’e, hamriik hela iha fatin áas nebé ho ai-kabelak halo nanis ona ba ne’e, nia leten. Esdras loke livro iha sira hotu nia oin, basá, nia hamriik iha fatin áas. Esdras hasa’e agradece ba Na’i Maromak boot. Povo tomak hasa’e liman hodi hatan. “Aman, Amen!” Hafoin, sira takrabat rai, hodi adora Na’i.

Levita sira explica Lei ba povo nebé hamriik hela. Sira lê Maromak Nia liafuan, hafoin explica nia sentido ba povo, atu nune’e sira hotu bele comprende.

Nune’e, embo’ot Neemias, Na’ilulik no escriba Esdras, hamutuk ho levita sira nebé hanourin povo, dehan ba ema hotu: “Loron ne’e, loron halulik ba Na’i, imi nia Maromak. Imi keta neon sala no keta tanis”. Basá, povo tomak tanis wainhira rona liafuan hirak ne’e.

Tuir mai, Neemias dehan ba sira: “Imi ba han naan bokur, hemu tua midar, hodi fahe balu ba sira be la dauk prepara buat ida, basá, loron ne’e, loron santo ba ita Na’i. Imi keta neon sala, tan Na’i Nia ksolok mak kbiit imi nian”. Levita sira haruka ema hot-hotu nonok, hodi dehan: “Nonok ba, basá, loron ne’e, loron santo! Imi keta neon sala”. Povo tomak ba han no hemu, hodi haruka hahan balu ba kiak sira. Sira hotu hatudu sira nia ksolok boot, basá, sira hotu comprende Lia sira hotu nebé haklaken ba sira.

Maromak Futar Lia.

 

Salmo Responsorial                                                                                                                               Sal. 18(19). 8, 9, 10, 11, (R. 9ª)

Refrão : Na’i Nia ukunfuan haksolok fuan!!! Repete-se

Na’i Nia Lei lós tebes,

Hamoris ema nia laran.

Na’i Nia ordem metin tebes,

Fó matenek ba ema haraik-an sira. Refrão

 

Na’i Nia ukunfuan lós tebes,

Sira haksolok fuan.

Na’i Nia Lei sira mós tebes,

Leno ita nia matan. Refrão

 

Hamtauk Na’i, mós tebes,

Hela metin tinan-ba-tinan,

Na’i tesi lia ho lialós tebes;

Nia hanoin hotu mesa lós duni. Refrão

 

Nia liafuan folin boot liu osan mean,

Osan mean nebé kmook liu.

Sira midar liu wani wen,

Wani wen nebé midar tebes. Refrão

 

Aclamação                                                                                                                                                                                            Mc. 1. 15

Refrão : Aleluia, Aleluia!! Repete-se

Maromak Nia reino besik ona;

hakribi imi nia salan no fiar iha Evangelho. Refrão

 

Evangelho                                                                                                                                                                                        Lc. 10. 1-12

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus hili esscolante hitu nulu resin rua tan, hodi haruka sira rua rua ba uluk iha cidade no fatin sira nebé Nia atu ba. Nia dehan ba sira: “To’os boot duni, maibé serbisu Na’in sira uitoan de’it. Tan ne’e, husu to’os Na’in atu ba haruka serbisu Na’in sira ba Nia to’os. La’o ba. Ha’u haruka imi ba nu’udar bibi oan sira iha asu fuik sira leet. Keta lori bukae, kohe eh sandálias. Keta cumprimenta ema ida iha dalan. Imi tama karik iha uma ida, uluk knaNa’in dehan: ‘Dame ba uma ne’e!’ Iha karik ema dame Na’in ida iha nebá, imi nia dame sei hôrik ho nia; lae karik, sei fila fali ba imi. Hela iha uma ne’e ba, han hemu buat nebé sira iha; basá serbisu Na’in soi atu simu nia kolen. Keta tama uma sai uma sira. Imi tama iha cidade ida no sira simu imi karik, han ba buat nebé sira fó ba imi. Fó isin di’ak ba ema moras sira iha  nebá, hodi hateten ba sira: ‘Maromak nia reino besik ona imi’ Maibé imi tama iha cidade ida no sira la simu imi karik, sai ba dalan sira hodi dehan: ‘Rai rahun mós housi imi nia cidade, nebé belit ba ami nia ain, ami liki tiha ba imi! Maibé imi hatene ba katak Maromak nia reino besik liu ona’. Ha’u dehan tebes ba imi: aban bainrua Sodoma sei la hetan susar hanesan cidade nebá.”

Lia Maksoyn.

Leave a Reply

Your email address will not be published. Required fields are marked *