shadow
Diocese de Dili > NOTÍCIAS > LETURA DIÁRIA > Sábado, XXVI Semana do Tempo Comum (Ano C)

Sábado, XXVI Semana do Tempo Comum (Ano C)

Primeira Leitura            Bar. 4. 5-12, 27-29

Lia housi livro Baruc nian:

Povo Maromak Nian, ó be káer metin Israel nia naran, aten barani ba. Faan tiha imi ba gentio sira, maibé, la’os atu halakon imi. Tan imi halo sadik Maromak nia hirus, saran imi ba imi nia funu baluk sira, basá, imi halo hirus ida nebé halo imi moris hodi hasa’e fali sacrifício ba demónio sira, la hasa’e ba Maromak. Imi haluha tiha Maromak rohan laek, Ida nebé fó han imi; imi hasusar Jerusalém nebé fó susu ba imi, basá, wainhira nia haré Maromak Nia hirus monu ba imi leten, Nia dehan: “Cidade sira be hela besik Sião, imi rona mai! Maromak halo ha’u neon susar, basá, ha’u haré ha’u oan sira, mane no feto, terus iha kadeia nebé Na’i hamonu iha sira leten. Ha’u fó susu sira ho ksolok, ha’u husik sai sira ho matan wen no laran terus. Ha’u, feto faluk, mesa-mesak, la iha ema ida haksolok ha’u. Ha’u hela mesak tan ha’u oan sira nia hahalok áat, basá, sira fila kotuk ba Maromak Nia Lei. Aten barani ba, ha’u oan sira, hodi bolu Na’i Maromak, basá, Ida nebé fó castigo ba imi, Nia sei hanoin fali imi. Hanesan uluk imi hanoin fila kotuk ba Maromak. Oras ne’e imi fila fali ba Nia hodi buka Nia ho laran manas liu fali dala sanulu. Basá, Ida nebé haraik terus ba imi, sei haraik ksolok rohan laek ba imi, hamutuk ho imi nia salvação”.

Maromak Futar Lia.

 

Salmo Responsorial                                                                                                                  Sal. 68(69). 33-35, 36-37 (R. cf. 34ª)

Refrão : Na’i rona ema kiak sira nia harohan!!! Repete-se

Ema haraik an sira, rona mai hodi haksolok,

Buka Maromak, imi laran sei hetan iis foun.

Na’i rona ema kiak, la hakribi sira be iha dadur.

Lalehan ho rai hahí Na’i, tasi no buat hotu be moris iha Nia. Refrão

 

Na’i sei souri Sião, sei hari hikas cidade sira Judá nian,

Ema dadur sira fila mai hodi hôrik iha nebá,

Nia atan sira sei simu nu’udar liman rohan,

Sei hôrik iha nebá, sira be hadomi Nia naran. Refrão

 

Aclamação                                                                                                                                                                                     cf. Mt. 11. 25

Refrão : Aleluia, Aleluia!! Repete-se

Rahun di’ak ba Ita, Aman, Na’i lalehan no rai nian,

tan Ita hatudu mistério reino lalehan nian ba kiik sira. Refrão

 

Evangelho                                                                                                                                                                                      Lc. 10. 17-24

Na’i Jesus Cristo nia Evangelho nu’udar São Lucas haktuir:

Iha tempo nebá, escolante Na’in hitu nulu resin rua ne’e fila fali hodi haksolok dehan: “Na’i, diabo sira mós tuir ami hodi Ita nia naran.” Nia hatan ba sira: “Ha’u foin haré Satanás monu housi lalehan hanesan rai lakan. Los duni, Ha’u haraik tiha biit ba imi atu sama samea no sakunar sira, hodi manan funu baluk nia biit tomak; la iha buat ida nebé bele halo áat imi. Maski nune’e, keta haksolok tanba espírito sira tuir imi; haksolok de’it tanba imi nia naran hakerek tiha ona iha lalehan.”

Iha oras nebá Nia haksolok teb-tebes ho Espírito Santo dehan: “Ha’u hahí Ita, Aman, lalehan no rai nia Na’in, basá Ita subar tiha buat sira ne’e housi ema matenek sira hodi fó hatene fali ba sira nebé kiik. Tebes, Aman, Ita hakarak duni nune’e. Ha’u nia Aman saran tiha buat hotu mai Ha’u. Ema ida la hatene se mak Oan, Aman de’it mak hatene; no ema ida la hatene se mak Aman, Oan de’it mak hatene, no ida nebé Oan Mane hakarak fó hatene ba nia.”

Hafoin, haketak tiha nia escolante sira housi sira seluk, Nia dehan: “Ksolok ba matan sira nebé haré buat nebé imi haré, Basá Ha’u dehan ba imi katak profeta no liurai sira barak uluk nian hakarak haré buat nebé imi haré, maibé sira la haré; no rona buat nebé imi rona, maibé sira la rona”.

Lia Maksoyn.

Leave a Reply

Your email address will not be published. Required fields are marked *