shadow
Diocese de Dili > NOTÍCIAS > LETURA DIÁRIA > Sábado, XXVII Semana do Tempo Comum (Ano C)

Sábado, XXVII Semana do Tempo Comum (Ano C)

Primeira Leitura                   Joel. 4. 12-21

Lia housi Profecia Joel nian:

Na’i lia tun nune’e: “Nação sira hamriik ba hodi sa’e ba rai tetuk Josafat nian! ha’u sei tur iha nebá atu tesi lia ba nação hot-hotu be tur hale’u. Imi tau ona tudik ba hodi ko’a, basá, trigo tasak ona, mai ona sama ho ain ba, tanki sira naresin liu ona, hahalok áat nação sira nian boot tebes!”

Ema lubun wa’in tebes libur iha rai tetuk, tesi lia fatin! Basá, Na’i nia loron besik ona; loron no fulan sei sai nakukun; fitun sira nia lakan sei lakon nia nabilan. Na’i sei hakilar housi Sião; Nia lian sei rona to’o Jerusalém; lalehan no rai sei nakdoko. Maibé, Na’i mak subar fatin di’ak ba Nia povo, hôrik fatin metin ida ba Israel oan sira. “Nune’e, imi sei hatene katak Ha’u mak Na’i, imi nia Maromak, nebé tur iha Sião, iha Ha’u Nia Foho Santo! Jerusalém sei sai fatin santo, ema housi rai seluk sei la liu housi nebá!”

Iha loron nebá, tua foun sei suli foho sira, foho kiik sira sei halo suli susu-wen, mota sira hotu Judá nian, wé sei suli tuir. Wé matan ida sei mosu housi templo Na’i nian, atu habokon rai tetuk Acácias nian. Rai Egipto tomak sei sai krebek, Edon sei sai rai fuik maran, tanba sira foti liman hasouru Judá oan sira, basá, sira halo suli ran sala laek iha nia rain. Maibé, iha Judá, ema sei hôrik ba nafatin, no Jerusalém housi otas ba otas. ‘Ha’u sei rai kuna hasouru sira ran no ema ida mós la soi an’. Na’i sei hôrik iha Sião.

Maromak Futar Lia.

 

Salmo Responsorial                                                                                               Sal. 96(97). 1-2, 5-6, 11-12 (R. 12ª)

Refrão : Imi sira be justo, haksolok iha Na’i ba!!! Repete-se

Na’i mak liurai, rai tomak haksolok ba;

Nusa lub-lubun haksolok ba.

Nia hatais kalohan no nakukun,

Justice no direito mak Nia trono nia hun. Refrão

 

Foho sira naben hanesan lilin,

Iha Na’I be rai tomak nian, Nia oin;

Lalehan haklaken Nia justice,

Povo tomak hare Nia glória. Refrão

 

Mosu naroman ba ema di’ak,

Ksolok ba ema sira be fuan mós.

Haksolok iha Na’i ba,

imi sira be laran di’ak,

Hodi hahí Nia naran Santo. Refrão

 

Aclamação                                                                                                                                                                  Lc. 11. 28

Refrão : Aleluia, Aleluia!! Repete-se

Rahun di’ak ba sira nebé rona Maromak

Nia futar lia hodi moris tuir. Refrão

 

Evangelho                                                                                                                                                             Lc. 11. 27-28

Na’i Jesus Cristo nia Evangelho nu’udar São Lucas haktuir:

Iha tempo nebá, Wainhira Jesus sei ko’alia daudaun, feto ida housi ema lubun sira leet foti lia dehan: “Ksolok ba knotak nebé kô’us Ita, no hirus matan nebé fó susuben ba Ita!” Maibé Nia hatan: “Lolós, ksolok liu ba sira nebé rona Maromak futar lia hodi moris tuir!”

Lia Maksoyn.

Leave a Reply

Your email address will not be published. Required fields are marked *