shadow
Diocese de Dili > NOTÍCIAS > Notícias > 13 DE OUTUBRO, MANIFESTAÇÃO FIAR BA MAROMAK LIU HUSI MARIA

13 DE OUTUBRO, MANIFESTAÇÃO FIAR BA MAROMAK LIU HUSI MARIA

DCAD-DILI, iha loron 13 fulan Outubro tinan 2019 sai hanesan loron importante ba sarani católica iha mundo tomak nebe tinan-tinan sempre celebra loron boot ne’e hodi hanoin hikas Na’in Feto Maria ninia hatan ba Maromak. Iha celebração ida ne’e hala’o ho processão hosi Igreja Motael ba to’o iha Lecidere. Hafoin remata processão, uainhira halo reflexão ba evangelho Pe. Guilhermino da Silva dehan “ita foin manisfesta daudaun ita nia fiar ba Maromak hamutuk ho Feto Kmanek Wa’in Basuk, Feto Rahun Di’ak Liu Feto Hot-Hotu nebe Maromak hili hodi halo Nia kous Maromak nia Oan no sai Maromak nia Inan”.

Padre paróco ne’e hatutan ninia reflexão hodi dehan “iha ita nia manisfestação da fé ohin nian ita la hare ba buat nebe aas no boot maibe ita hakarak ho Maria lao iha dalan fiar nian liu hosi dalan simples ema bai-bain nian ba Na’i Maromak leten aas ba, nebe ba Nia Maria fiar no saran-An tomak”.

“Ita hakarak hare saida mak sagrada escritura hato’o ba ita kona ba Maria no kna’ar nebe Maromak haraik ba Nia?” tenik Pe. Guilhermino da Silva. “Sagrada escritura hato’o mai ita kona ba Maria nia presença iha história salvação Maromak nian ba ita ema” Pe. Guilhermino da Silva comenta. “Maria nia presença hahu hosi no iha história salvação nian ne’e iha momento Na’i Maromak haruka Anjo Gabriel ba ko’alia ho Nia iha Galileia”, Pe. Guilhermino da Silva asentua tan.

Pe. Guilhermino da Silva hato’o conteudo Evangelho nian katak “uainhira anjo to’o iha Maria nia uma iha Galileia, anjo comprimenta Maria hodi dehan : “Rahun Di’ak Feto Kmanek Wa’in Basuk, Ita Di’ak Liu Feto Hotu-Hotu”. Pe. Pároco Motael ne’e hatutan “rona liafuan Feto kmanek wa’in tebes, Ita di’ak liu feto hotu-hotu, Maria hakarak tebes, laos deit tan hare Anjo maibe Nia hakfodak tan liafuan Feto kmanek wa’in, Nia hatene nia-An feto bai-bain ida hela iha sociedade simples no iha fatin simples iha Galileia”.

Ne’e katak iha Maria nia laran bele mosu hanoin “imposivel liafuan hanesan ne’e ema bele fo ba nia-An, liafuan ne’e so ba deit feto sira iha Palacio, karik iha Herodes nia uma ka Herodes nia feen maibe lia ne’e hato’o fali ba Maria tan ne’e Nia iha duni razão atu hakfodak no tauk, Anjo Gabriel nu’udar mensageiro lialos nian hodi continua missão nebe mak iha kona ba lialos Maksoyn nian hahu kedas ho halo hakmatek no halo Na’in Feto compriende kona ba misterio boot ne’e hodi dehan ba Na’in Feto : keta tauk Maria, Ó hetan rahun di’ak tebes iha Maromak futar oin”. Tenik Pe. Guilhermino da Silva.

Padre paróco Motael ne’e salienta tan “masque nune’e nu’udar atan simples ida nebe iha Ninia moris buka lao tuir deit Maromak nia hakarak. Maria reflete deit iha nia laran ho haraik-An tebes”.

Sentido lia hirak ne’e katak sá los ba Nia no Nia buka atu compriende didi’ak hodi bele moris tuir? Pe. Guilhermino da Silva husu. “Anjo Gabriel tulun esplica liu tan hodi halo Maria compriende, hakmatek no laran metin liu tan ba Maromak ninia  hakarak boot liu hotu ne’e hodi dehan : Na’i Maromak sei soi ninia povo nu’udar Nia promete nanis ona nia sei halo ida ne’e liu hosi ninia Oan Mane mesak nebe nia atu haruka mai mundo ba Maromak hakarak atu o mak sai ninia Inan ba Oan Maksoyn ne’e, Maromak hakarak atu Ó tau matan ba nia hodi akompanha nia halao missão maksoyn ne’e to’o rohan. Rona Anjo nia lian no kna’ar nebe nia sei simu Maria dehan hirak ne’e hotu sei sai oinsa hau la hola mane”. Pe. Guilhermino da Silva explica.

Pe. Guilhermino da Silva haklean tan “Maria consciente nia An rasik, declara nia An lolos katak nia sei feto ran nu’u aibalun Maromak nian nebe soyn duni atu kous Maromak nia santo nune’e dala ida tan Anjo esplica klaru liu tan Maria katak Espírito  santo  nia kbit sei hamahan Ó tan ne’e oan nebe o kous ne’e sei hanaran Maromak nia oan, iha misterio boot be Maromak sei halo ne’e Maromak rasik ninia kbit mak sei ukun, Maromak mak sei halo buat hotu liu hosi ninia Oan Mane ninia kna’ar no ninia colaboração nu’udar inan ida. Inan ida ba ninia oan no inan ba ninia emar sira hotu ho haraik an Maria hatan nesá Na’i nia atan oan mak ne’e halo tuir Ita liafuan ba”.

Padre paróco ne’e esplica dehan “Na’in Feto Virgem ninia disponibilidade simu kna’ar ne’e halo nia sai kmanek liu feto hotu-hotu tanba nia hatudu ninia domin ba Maromak no ninia domin ba mundo nia salvação, sasin ida nebe Nia hatudu nafatin mai ita to’o ohin loron hosi fatin aas lalehan ba tan Maria nia disponibilidade hodi aceita Maromak nia hakarak ne’e Maromak halo kmanek wa’in tebes ba mundo hahu kedas ho kmanek nebe halo ba Na’in Feto hodi halo sai Maromak ninia inan no sai feto kmanek liu hotu”.

Liu tan ne’e Pe. Guilhermino da Silva haklean tan “Feto kmanek ne’e la hela hanesan liurai feto iha trono lalehan nian deit maibe Nia preocupa ho nia oan sira, Nia oan nia maun alin sira be sei lao hela iha rai klaran nune’e mak Nia mosu iha fatin barak iha mundo hodi hato’o atu ema hotu bele participa iha salvação be nia oan mane Cristo mai iha mundo liu hosi manifesta fiar iha terço”.

Pe. Guilhermino da Silva observa “Ita cumpri ita nia obrigação iha fulan Rosário buat nebe Na’in Feto husu atu halo lor-loron iha moris no intensivo liu tan sei iha fulan Outubro ida ne’e ita hakarak hamutuk ho Maria nu’udar Maromak nia Inan no ita nia Inan atu salva ema barak ninia klamar mai ita ba setia an hanesan Maria rasik husu iha nia aparisões sira iha rai Lurdes no Fátima atu ita reza terço husu perdão sala hotu nebe mundo halo liu-liu sala hasoru Maromak nia domin reza klamar sira iha purgatório atu bele hetan Maromak ninia laran luak no hetan maksoyn iha Maromak”.

Pe. Guilhermino da Silva dehan tan “ohin iha ita hotu nia processão hosi Motael mai iha Lecidere ita reza oração husu perdão nian pelo menus dala 9 oração nebe Na’in Feto husu ba labarik na’in tolu no husu mos mai ita hotu atu reza hafoin ita  reza misterio Rosário nian nebe dehan : Ó Jesus doben haraik perdão mai ami salan hasai ami hosi ahi inferno no lori klamar sira ba lalehan liu-liu sira nebe precisa tebes ita boot nia laran luak liu hosi Na’in Feto ninia aparisões sira iha Lurdes no iha fatin seluk iha mundo, Maromak hatudu ona ba ita katak sei iha mundo  trançendencia ida nebe ita Na’i esperiencia humana labele to’o Maria ninia aparisões hakarak reforça ita ninia fiar ba Maromak be ita Na’i hodi hatudu ba reino lalehan liu-liu liu hosi imi nia husu atu ema hotu hakribi salan”.

Pe. Guilhermino da Silva mos hato’o “Maria hanesan inan hakarak lori ita ba Jesus ba salvação nebe Jesus manan tiha ona ho nia mate iha cruz Na’in Feto nu’udar Inan Na’i Maromak nian no ita nia Inan iha preocupação boot ba ita ema nia salvação.  ita hotu sei hanoin passagem história casamento kaben iha rai Kana nia preocupa ho festa na’in nebe sira nia tua hotu molok festa remata Nia fiar iha nia oan mane Jesus nia kbit Maromak nian nia fiar katak nia oan tan Maromak ida nebe impossivel bele acontese Nia hakarak buat hotu di’ak ba ita nia an iha moris ohin loron liu-liu iha moris loron ikus, iha nia aparisões iha rai Fatima entre fulan maio to’o 13 de Outubro atu halo liu tan ema reza terço oração Rosário nian be salva ema wa’in hosi inferno tan ne’e nia husu atu ita badinas reza terço lor-loron bele ema nebe iha kbiit no matenek haluha terço maibe hanesan ema sarani ita keta haluha ita nia terço iha ita nia moris lori nafatin ita nia terço no uza nafatin terço ne’e iha ita nia oração terço nian, ita la bele sai ema nebe gosta tara terço maibe nunca hatene reza terço iha rai Lurdes, Fatima no seluk tan iha mundo ne’e kona ba Na’in Feto nia aparisões laos lia mamuk maibe lia nebe iha nia provas sira hirak nebe nia hatudu ba sira no sira hotu nebe badinas no fiar iha terço sira sei hetan ksolok lalehan”.

Ikus liu Vigario Assuntos Educação iha Arquediocese Metropolitana-Dili ne’e mos dehan “maluk sira, ita iha hela tempo jubileu extraordinario missionário nian, jubileu tempo graça nian nebe creda fo ba ita atu bele manan indulgencia plenaria, atu hetan indulgencia plenaria ita precisa lao tuir pelo menus condição tolu mak hanesan  Simu sacramento comfessa katak komfesa ita nia sala, Simu comunhão,  Reza ba sumo pontifice ka amu papa nia intenção sira, liu tan ida ne’e tem que certeza katak ita nia hakarak ba salan sira tanto sala kiik  mos laiha ona”.

Tamba ne’e Pe. Guilhermino da Silva hameno “Na’in Feto mak modelo lolos iha Cristo nia redenção nia Maromak nia oan feto nebe ho fiel halo tuir Maromak nia hakarak nune’e nia hetan rahun di’ak hanesan ema primeiro nebe nia Oan soy, Maria hetan rahun di’ak liu hotu Nia sai privada especial iha Maromak nia futar matan no iha ita ema hotu nia matan, Nia laos Maromak maibe Maromak valoriza Nia, nia laos Cristo maibe nia kous Cristo no hahoris Cristo, nia laos Messias maibe nia hola fatin sai hanesan mediador ba Jesus per Mariam ad Iesum iha Cristo nia redenção laos ita nia salan mak hetan perdão maibe haraik fali lolos ita ema nia existência katak Maromak nia ilas santo lolos, Maria hetan rahun di’ak tanba nia fidelidade no fo an total ba Maromak nia hakarak se ita obedece no fiel ba ita nia fiar to’o rohan ita sei hetan salvação mai hosi Maromak nebe Maria lori ba ita iha mundo iha Jesus nia an”.

Participa iha procissão ne’e, Padres, Religiosos/as, seminaristas, grupos categorias sira nebe existe iha paroquia sira, autoridades sivis, militares inclui sarani tomak Arquediocese Metropolitana-Dili nian. (Marta & Alin)

Leave a Reply

Your email address will not be published. Required fields are marked *