shadow
Diocese de Dili > NOTÍCIAS > LETURA DIÁRIA > Sexta – Feira, XXVIII Semana do Tempo Comum (Ano C)

Sexta – Feira, XXVIII Semana do Tempo Comum (Ano C)

Primeira Leitura                        Rom. 4. 1-8

Lia housi São Paulo nia Surat ba sarani sira iha Roma:

Maun alin sira: Ita bele dehan sá lós kona ba Abraão, ita bei ala tuir isin? Abraão sai ema lós  tan nia hahalok karik, nia bele gaba an; maibé Maromak la haré hanesan ne’e. Escritura dehan sá? “Abraão fiar Maromak, no Maromak sura ne’e nu’udar justiça”. Ema la sura servisu na’in nia kolen nu’udar presente ida, maibé nu’udar buat nebé nia soi atu simu. Maibé wainhira ema la servisu, maibé fial iha Ida nebé halo lós ema nebé la hatene Maromak, nia fiar sei sura nu’udar justiça. Nune’e mak David fó sai katak ema rahun di’ak wainhira Maromak sura nia justiça ketak housi nia hahalok: “Rahun di’ak ba sira nebé hetan perdua ba sira nia hahalok áat no sira nia sala kasu tiha, rahun di’ak ba ema nebé Maroamak la hakerek nia sala”.

Maromak Futar Lia.

 

Salmo Responsorial                                                                                                                                      Sal. 31(32). 1-2, 5, 11 (R. 7)

Refrão : Ita, ha’u heli an fatin, haraik mai ha’u ksolok Ita maksoyn nian!!! Repete-se

Rahun di’ak ba ida nebé hetan perdua ba nia salan,

Ba ida nebé, nia salan kasu ona.

Rahun di’ak ba ida nebé Na’i la hetan sala iha nia,

No la hetan bosok iha nia klamar. Refrão

 

Na’i, ha’u sala, maibé, ha’u hakribi ha’u salan;

Ha’u la subar ha’u salan.

Ha’u dehan: “Ha’u sei hakribi ha’u salan,

Itaboot perdua duni ha’u salan”. Refrão

 

Haksolok ba, imi sira be laran mós,

Haksolok iha Na’i ba.

Imi sira be fuan mós,

Hahí Na’i ba. Refrão

 

Aclamação                                                                                                                                                                                Sal. 32(33). 22

Refrão : Aleluia, Aleluia!! Repete-se

Haraik Ita kmanek mai ami;

Na’i, ami hein Ita tulun. Refrão

 

Evangelho                                                                                                                                                                                           Lc. 12. 1-7

Na’i Jesus Cristo nia Evangelho nu’udar São Lucas haktuir:

Iha tempo nebá, wainhira ema lubun boot teb-tebes halibur an hamutuk to’o sira hanehan malu, Jesus hahu ko’alia ba nia escolante sira dehan: “Imi matan moris ba kona ba fariseu nia fermento, katak sira nia laran makerek. Buat hotu nebé taka hela, sei nakloke; no buat hotu nebé subar hela, sei fó hatene sai. Tan ne’e, buat nebé imi dehan iha nakukun laran, ema sei rona iha loron nabilan; no buat hotu nebé imi hateten nei-neik ba ema nia tilun sub-subar, ema sei fó sai maka’as iha uma nia kakuluk.

Ha’u nia belun sira, Ha’u dehan ba imi: keta ta’uk sira nebé oho isin, hafoin la bele halo tan buat ida. Ha’u sei dehan ba imi se lós mak imi tenki ta’uk: imi sei ta’uk ida nebé, oho tiha isin, iha mós biit atu soe ema ba infernu. Tebes, Ha’u dehan ba imi, Nia mak imi tenki ta’uk. Ema la faan manulin lima ho osan rua? Maibé Maromak la haluha sira ne’e ida. Fu’uk lahan housi imi nia ulun sura tiha hotu; ne’e duni, keta ta’uk, basá imi folin liu manulin barak”.

Lia Maksoyn.

Leave a Reply

Your email address will not be published. Required fields are marked *