shadow
Diocese de Dili > NOTÍCIAS > Notícias > Dom. Norberto Ordena Diácono nain 2 ba Nailulik

Dom. Norberto Ordena Diácono nain 2 ba Nailulik

DCAD-LIQUIÇA (18/10/2019) Ordenação Sacerdotal ba Diácono Angelino da Cruz Fernandes no Joanico Pereira Alves halao iha Igreja São João de Brito Liquiça iha oras 09:00 OTL ne’ebe preside housi Presidente Episcopal Timorense atual Bispo Maliana Dom Norberto do Amaral. Iha missa ne’e hetan participação diak housi Nailulik sira, Madres, Seminaristas, sarani Liquiça nian, sarani sira housi paróquia sira sel-seluk, Autoridade Civil e militar,  grupos Categoriais, inclui família housi diácono nain rua nian.

Dom Norberto iha nia homilia ba celebração Festa São Lucas Evangelista ne’e hateten; “Ema sira ne’ebe Nia hili no Nia haruka sei hatene situação concreta ne’ebe sira hasoru ba; situação defícil, la’o ba iha asu fuik sira le’et, labele lori buat ida, lori de’it reino Maromak nian hodi tau sira nia an dependente de’it ba providência Divina, hodi hala’o de’it buat ida ne’ebe Nia haruka atu haklaken ba. Situação ida ne’e mak Na’i Maromak bolu imi nain rua atu consagra imi nia an hodi lao tuir Nia. Ne’e duni, husu ba imi rua atu tau an ba didiak, hamamuk imi nia an ne’e, tau confiança boot iha Maromak hodi obedece de’it Maromak. Hamamuk imi nia an ba atu Nia consagra imi atu nune’e laos atu fó ba imi nia família, ba imi nia an, maibe fó fali ba ema hotu-hotu atu imi sai nu’udar Nia sentinela no mos nia manu ain hodi haklaken Ninia Liafuan.

Dom Norberto hateten; “Buat ne’ebe importante teb-tebes ne’e mak confiança iha Na’i Maromak. Labele haluha atu reza bebeik, confessa bebeik, Missa bebeik. Tan ne’e ba imi nain rua buka tau didiak buat hirak ne’e iha kakutak hodi halao atu nune’e bele hasanto imi nia an ne’e tanba atu hasanto povo sira ne’e ita nu’udar sacerdote ne’e temque hasanto uluk ita nia an. Wainhira ema consagrado ida ne’e katak atu sai nu’udar estrume ba sarani sira nia moris. Basá Sai Padre ne’e laos atu sai liurai no funcionário, maibe sai Padre ne’e atu sai rai metan ba sarani sira.

Mai ita reza ba Na’i Maromak hodi agradece ba Nia ba graça boot ne’ebe haraik mai ita Padre foun nai rua tan atu sira bele metin iha sira nia vocação. ba família tomak ne’ebe hasae ona sira nia oan nain rua hanesan bé iha kopu ida atu bé kopu ne’e bele fó matak malirin ba ema sira nia moris, atu bé ne’e mos bele nakonu nafatin ho graça Na’i Maromak nian ita hotu-hotu temque tane lisuk ho oração.”

Remata tiha missa, Pe. Joanico Pereira Alves iha ninia discurço hateten; “Dalan Na’i Maromak nian ne’e mak los liu, maibe tanba ho ema nia ego halo ema lao se’es housi Dalan Maromak nian. Atu responde ba ida ne’e mak ita nia oração, basá ho tulun oração mak lori ita ba dalan los Maromk nian. Tanba ne’e, ami husu reza ba ami hanesan Padre foun basá ohin ami nain rua foin hahu ami nia moris. Reza mos ba ita nia Bispo, Nailulik sira no Reza mos ba vocação. (Alin)

Leave a Reply

Your email address will not be published. Required fields are marked *